sonin.mn
Сэтгэгдэл (46)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд би дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Дайны түүх, цэргийн урлагийн түүх сонирхдог. Ялангуяа Зөвлөлтийн армийн түүхээс багагүй мэднэ.


Тэр мэдлэгээрээ дүгнээд Орос ба Путин Украиныг дийлэх нь өнгөрлөө гэсэн дүгнэлтийг бүр 2022 оны хавар Киевийн дэргэдээс оросын спецназ хөөгдөхөд хийчихсэн. Харьков, Херсоноос оросын цэрэг шившигтэй хөөгдөн гарч байхад итгэл үнэмшлээ бүр ч сориод авсан.


Миний зөв. Дөнгөж саяхан оросууд “СВО” ажиллагааныхаа 1418 өдрийг давсан, украинчууд тусгаар тогтнол, бүрэн эрхт байдал, нутаг дэвсгэрийн бүрэн бүтэн байдал, эрх чөлөөнийхөө төлөө ёстой жинхэнэ эх орны дайнд орсныхоо 1418 өдрийг өнгөрүүлсэн. “Великая Отечественная война” гэж манайхан чихээ дөжиртөл сонссон бол тэр дайны өнгөрүүлсэн өдөр шөнийг давчихлаа. Гитлерийн эсрэг дайн чөлөөлөх дайн байсан бол одоо Украиныг эзлэн түрэмгийлэх дайн явагдаж байна. 1941-1945 онд дайснаа Москва, Сталинградаас хөөж, Орос, бүх Украин, бүх Беларусь, бүх Прибалтик, Берлин тэргүүтэй Европын хэд хэдэн нийслэлийг чөлөөлөх ариун дайн явуулж байсан бол энэ удаа Путин нь нэг нийслэл байтугай, ядаж мужийн төвийг ч чөлөөлж чадалгүй 1418 өдөр шөнийг өнгөрүүлжээ. “СВО” гэдгийг нь 1941-1945 онтой харьцуулбаас Орос эх орондоо, Оросын бүх улс төрчдөд дайны гэмт хэргийн ял тулгачихсан юм шиг.


Одоо Орос орныг, явуулж байгаа дайныг нь юу гэж нэрлэмээр юм бэ дээ? Тэр чигтээ коррупц, хомхойрол, профессионализмгүйтэл, тал тохой татах, хүний амь насанд хайр гамгүй хандах, өөр юу ч гэмээр юм. Ах дүүсээ алан хядсан дайн–ганц үгээр.


Харин одоо арай өөр өнцгөөс, холбоотонгүй болж буй Оросын төрхийг илчилсэн сэдвээр үргэлжлүүлье. 2026 оны нэгдүгээр сар Кремлийн хувьд төсөөлж байгаагүй угсраа цохилт амссан сар болж байна. Үнэхээр Николас Мадурог Зул сарын баярынх нь өмнө өргөөнөөс нь ачаад аваад явчихна гэж оросын эрх баригчид ёстой зүүдлээ ч үгүй. Мадуро гэж хэн бэ? Ердөө өчигдрийн “сайн найз”. “Сайн найз”-яагаад хашилтад авав? Одоо найзын хэрэгцээ өнгөрсөн, суллагдвал Орост, магадгүй Хятадад бүр ч их гай тарьж мэдэх найз. Мадуро бол маш их нууцыг хадгалагч, гэтэл америкийн хууль-шүүхийн гарт орчихсон, хамаг байдгийг нь дэлгэж эхлээд байна. Энэ тухай оросын сөрөг хүчнийхний “Контур реальности” гэдэг сайтад тавигдсан ярилцлагыг хөрвүүлье. Москвагаас дэлхий даяар явуулдаг гибрид нөлөөллийн схемийн бүх системийг Мадуро америкийн мөрдөн байцаагчдад ярьж эхэлсэн тухай оросын нэртэй шинжээч эрдэмтэн Борис Надеждин “Венесуэлын архив” хэмээн нэрлэжээ. АНУ-ын “Дельта” тусгай хүчнийхэн зөвхөн Венесуэлын Ерөнхийлөгчийг баривчлан авчирсан хэрэг бус. Мадуро бол оросын олигархи-генералуудын хамаг булайг дэлгэх бие хүн, гэрч, сүлжээний нэг гол гүйцэтгэгч байсан болж таарлаа.


Надеждин дүгнэж байна:


–Одоо оросын хувьд урвагчаар тооцогдох болж буй Мадуро нь тэрхүү схем-механизмыг илчилж эхэлснээр хоёр гурав хоногт л Оросын сүүдрийн флотын худалдааны 5 хөлөг онгоц дэлхийн далайд илчлэгдэн ачиж явсан нефть, эд бараатайгаа америкийн тусгай хүчний гарт орох нь тэр. Мадуро хойшид геополитикт тоглолт хийх хөг нь өнгөрсөн, одоо тэр зөвхөн наймаалцана. Дубай, Хонконг дахь оросын эрх баригчдын офшор сейфнүүдийн кодыг зааж өгнө. Тэгснээрээ АНУ-д үлдэх насаа гэргийтэйгээ тайван амгалан өнгөрүүлэх зам сонгоно. Өөр сонголт байхгүй гэжээ. Эхний хэдхэн өдрийн мэдүүлгээр ийм үзүүлэлттэй байна. Одоо Мадурог “алтан хоригдол” гэж америкийн хэвлэлүүд егөөдөн нэрлэж байна. Оросын сүүдрийн флотын олон зуун тооцооны баримт, угааж байсан мөнгө, нууц актив “алтан хоригдол”-ын ачаар царцаагдаж, үүн дээр нь Трамп “арктикийн хавх”-аараа тоглолт хийж, энд тэнд далай тэнгист хөвж яваа оросын сүүдрийн флотыг авлаад байх нь тэр. Хурааж авлаа, АНУ-д авчирлаа, нэг бол дүүрэн нефть, нэг бол дүүрэн алт. Оросын дайны санхүүжилт явж байгаа нь тэр аж.


Мадуро яагаад Москва руу дүрвэхийг яараагүй юм бол? Оросын цэргийн хамгаалалт, Орос, Хятадын ПВО-нд найдав уу? Орос руу зугтсан бол Нью-Йоркт “алтан гэрч” болохоос долоон дор Лубянкийн хонгилд камер хүлээж байсан бол яах вэ? Оросын тоглоомын дүрмээр бол гэрчийг амьд үлдээх нь нэн халгаатай тул ердөө л далд оруулна.


Одоо цаашаа Нью-Йоркийн “алтан гэрч”–Мадуро нь санхүүгийн цунами дэгдээх мэдүүлэг рүүгээ орно. Оростой нэр холбогдох олон улсын компани, фирмүүдийн санхүүгийн тооцоо, тэдний сүлжээний тухай нууц мэдээллийг АНУ-ын Сангийн яаманд “өргөн барина”.


Бараг л эхний байцаалтаар тэр тухай яриад эхэлсэн гэж америкийн эх сурвалж мэдээлж байна. Арктик ба Гренландын асуудал ийм ил цагаан, идэвхтэй дэгдэхэд Мадуро хэрэг дээрээ түлхэц өгсөн болж таарлаа. Трамп гэв гэнэт тулган шаардлага тавиад эхэлсэн. Венесуэлын экс Ерөнхийлөгчийн мэдүүлэг Трампын хувьд Кремлийг дарамтлах далим гаргаад өгсөн бололтой. Хойд мөсөн далайд Орос, Хятад, өөр бас бус түншүүд нь хэт анхаараад байсны цаад утга учрыг Мадуро илчилсэн байх магадлал өндөр. Одоо хамгийн их паникт байгаа гадаад түнш нь Орос болж хувирсан. Хамаг булай нь дэлгэгдсэн, цаашаа бүр ихээр дэлгэгдэнэ. Венесуэлын схем ийнхүү илчлэгдэж эхэлсний дараа яагаад ч юм оросын эрх бүхий түшмэд огцроод эхэллээ. Олуулаа огцорно. Оросоос оргон зайлна. Ингэснээр гибрид эзэнт улсын эрин үе дуусах шат руугаа явна.


Надеждин анхааруулж байна:


–Дарангуйлагчдаа үнэнч байх нь цаг хугацаатай. Мадуро Нью-Йоркт очингуутаа тэр л замаар орсон. Одоо тэр бол зөвхөн гэрч төдийгүй Москвагийн гибрид нөлөөллийн бүх системийг албан ёсоор устгагч (официальный ликвидатор) болж хувирсан. Оросын дарангуйлагч Путин өөрөө авилга, итгэл хоёр дээр тэр системээ босгосон, одоо цаасан байшин шиг нурж унах болж байна. Ганцхан тоглогч нь арьсаа хамгаалахаар шийдэхэд л бүх зүйл дууслаа гэжээ.

 

“Контур реальности” сайтад бичсэнээр өнөөдөр дэлгэгдэж байгаа ийм факт маргааш түүх болно. 2026 он дөнгөж гараад л Мадуро–Путин, Венесуэл, сүүдрийн флот, АНУ-ын санкц, Путины нэр хүндийн уналт, Кремлийн офшор бүгд ил болж эхэллээ шүү дээ. Хэрэг дээрээ Мадуро Путинээ, Кремлийн сүүдрийн схемийг худалдаж эхэлсэн юм биш үү?

 

Өчигдөр орой авсан шинэ мэдээ. АНУ оросын сүүдрийн флотын бас нэг танкерыг 7 хоног хөөцөлдсөний эцэст баривчилжээ. “Вероника” нэртэй хөлөг онгоц мөрдлөгөөс мултрахын тулд “Галилео” гэсэн нэр зүүсэн ч оросын далбаагаар нь таньжээ. Бодвол Мадуро “Вероника” гэдгээр нь мэдүүлсэн байх.


Энд би юу хөрвүүлж буулгав. Хараал урсгалгүйгээр эрүүлээр сэтгээд үзээрэй. ОХУ, Путин ч дүүрчээ. Мафиоз-олигархийн фашист маягийн дэглэм ёроол руугаа явах эхлэлийг Мадуро хаа холын Латин Америкаас санаандгүй тавьчихсан юм биш үү? Нэг зуун тэрбум ам.доллараараа Мадурод дэнчин тавиад мад суучихсан Хятадыг яах вэ? Мадуро баривчлагдахынхаа өмнөхөн Си Жинпиний тусгай элчийг ордондоо хүлээн авч баахан хятадуудтай баярлалдан байсныг яана гээч. Путин, Си нарыг Мадуро зэрэг зэрэг матаж (яллаж) эхэлбэл яана?


Адьяaгийн Батсайхан (бэлтгэл хошууч)