sonin.mn
Сэтгэгдэл (0)

Airbus компанийн ТУЗ-ийн дарга Рене Оберманн Берлиний аюулгүй байдлын бага хурлын үеэр Европын орнуудад тактикийн цөмийн зэвсэг байрлуулж, Оросын заналхийллийг сөрөн зогсохыг санал болгосон байна. Тэрээр үүнийгээ Калининград, Беларусьт байрлуулсан “Искандер” пуужинуудаас үүсэж буй шууд заналхийлэлд хариу өгөх арга гэж тодорхойлжээ.


“Манай сул тал ил тод байгаа. Калининградын үүдэнд, мөн Беларусьт саяхан байрлуулсан ‘Искандер’ пуужингууд дээр 500 гаруй тактикийн цөмийн хошуу байрлаж байна”, — гэж Оберманн Reuters-д ярьсан байна.


Тэрээр Гермaн, Франц, Их Британи болон бусад сонирхсон орнууд үе шатыг нь тодорхойлсон, нэгдсэн цөмийн сөргөлдөөний хөтөлбөр боловсруулах ёстой гэж үзэж байна. Түүний хэлснээр, уг хөтөлбөрт тактикийн түвшинг ч багтаах нь Европт хүчтэй дохио өгнө. Тэрээр Европ зөвхөн стратегийн цөмийн хүчнүүдэд анхаарал хандуулж, Оросын тактикийн чадавхийг үл тоомсорлох ёсгүй гэж онцолжээ.


Тактикийн цөмийн зэвсэг нь ихэвчлэн 1–50 килотонн хүчин чадалтай бөгөөд тулалдааны талбарт ашиглагддаг бол стратегийн цөмийн цэнэгүүд нь 100 килотонноос дээш хүчин чадалтай, томоохон хотыг онох зориулалттай байдаг.


Politico-гийн мэдээлснээр, Франц ойролцоогоор 290, Их Британи 225 цөмийн хошуутай боловч зөвхөн стратегийн зэвсэгтэй бөгөөд тактикийн цэнэггүй аж. Европт хязгаарлагдмал цөмийн цохилтод хариу өгөх нэгдсэн бодлого ч үгүй. Герман НАТО-гийн цөмийн хуваалцах хөтөлбөрт оролцдог ч өөрийн арсеналгүй. Харин Орос улс дэлхийн хамгийн том цөмийн нөөцтэй бөгөөд 5580 нэгж цөмийн зэвсэгтэй байна.


Н.Отгончимэг


Эх сурвалж: moscowtimes.ru