sonin.mn
Сэтгэгдэл (5)

АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путинтэй хийхээр яригдаж буй уулзалтын талаар анх удаа тодорхой байр сууриа илэрхийлэв. Тэрбээр уулзалтын талаар эцсийн шийдвэр хараахан гаргаагүй, мөн үр дүнгүй хэлэлцээрт оролцох хүсэлгүй байгаагаа онцолсон байна.


Трамп энэ талаар Цагаан ордонд болсон Дивали баярын ёслолын үеэр сэтгүүлчдийн асуултад хариулахдаа:


“Би утгагүй уулзалт хийхийг хүсэхгүй байна. Цагаа дэмий үрэхийг хүсэхгүй байна. Юу болохыг харъя. Шийдвэр одоогоор гараагүй” гэж мэдэгджээ.


Сэтгүүлчдийн “Путинтэй сүүлд утсаар ярьснаас хойш таны байр суурь яагаад өөрчлөгдсөн бэ?” гэсэн асуултад Трамп:


“Би юу ч хэлээгүй. Тийм гэж батлаагүй шүү дээ” хэмээн хариулсан байна.


АНУ-ын удирдагч мөн Украины нөхцөл байдалтай холбоотойгоор олон үйл явдал өрнөж байгааг дурдан, Вашингтон ойрын хоёр хоногийн дотор дараагийн алхмаа зарлах болно гэж мэдэгдэв.


“Юу болохыг хэн ч урьдчилан мэдэхгүй. Украины асуудлаар маш олон зүйл өрнөж байна,” хэмээн Трамп онцолжээ. Энэхүү мэдэгдэл нь Трамп–Путины Будапештэд товлогдсон уулзалт тодорхойгүй байдалд орсон талаар олон улсын хэвлэлүүд мэдээлж буй үед гарсан юм.



Х.Цэцэнноров

Эх сурвалж: Minval.az