Эрх Чөлөөг Хэрэгжүүлэгч Нам мэдэгдэл гаргалаа. Уг мэдэгдэлд: "Монгол Улсын Үндсэн хуульд олгогдсон иргэдийн язгуур эрх ашиг ноцтой зөрчигдөж, УИХ-ын гишүүдэд ард түмний итгэх итгэл алдарсан гэж нийт ард түмэн үзэж байна. Ийм УИХ-ыг тараах бэлтгэх үйл ажиллагааг орон даяар зохион байгуулахыг Улс төрийн намын тухай хуульд тусгагдсан Монгол Улсын хөгжлийн бодлого, төлөвлөлтөд оролцох эрхийнхээ хүрээнд улс эх орон, иргэдийн эрх ашгийг хамгаалах үүднээс дээрх ажлыг эхлүүлэхээс өөр гарцгүй болсон.

Парламентад суудалгүй шударга, худалдаагүй улс төрийн намууд, төрийн бус байгууллага, иргэний нийгмийн хөдөлгөөн, иргэдийг улс, эх орон, нийгмийн сайн сайхны төлөө бидэнтэй хамтран ажиллахыг уриалж байна.

Бүгдээрээ хэлэлцвэл буруугүй, бүлээн усаар угаавал хиргүй гэж Монголын зүйр цэцэн үг байдаг. Эрх чөлөөг хэрэгжүүлэгч нам улс орон даяар ард түмнийг бидэнтэй хамтарч, УИХ-ыг тараахыг дэмжсэн иргэдийн гарын үсэг зурах үйл ажиллагаанд өргөн цар хүрээтэй, идэвхтэй, шуурхай оролцож, Монгол Улсын үндэсний аюулгүй байдал, тусгаар тогтнолыг хамгаалан бэхжүүлж, нийгэм, эдийн засгийг сэргээн хөгжүүлж, ирээдүй хойч үеэ эрүүл, аюулгүй орчинд амьдрах хүний эрхийг дээдэлсэн шударга нийгмийг бий болгохын тулд УИХ-ыг тараахыг шаардсан иргэдийн гарын үсгийг орон даяар дэмжиж ажиллахыг уриалж байна. Бид орон даяар дэмжигчдийн гарын үсгийг цуглуулахын тулд иргэдийн улс төрийн хүсэл зориг, олон нийтийн хүсэл бодлыг илэрхийлж, төр, иргэдийн хооронд байнгын тогтвортой, идэвхтэй харилцаа холбоог гүүр болгон ажиллана.

УИХ-ыг тараах шалтгаан:

УИХ-ын гишүүд нийт иргэн, улсын ашиг сонирхлыг эрхэмлэн дээдэлж, төрт ёс, түүх соёлынхоо уламжлалыг хүндэтгэж чадаагүйгээс гадна хуулийг дээдлэн ажиллах, ард түмний элч болж чадахгүй нь илт харагдаж байна.

Монгол Улсын Үндсэн хуулийг дээдлэн сахиж, авлига, ашиг сонирхлоос ангид байж, гишүүний үүргээ чин шударгаар биелүүлэх чадамжгүй, хууль дээдлэн ажиллах зарчмыг ил тод зөрчиж байгаа нь нийгмийн сүлжээнд илэрхий мэдрэгдэж байна.

Иймд УИХ-ын гишүүдийг тангаргаасаа няцсан гэж нийт ард түмэн үзэж байна. Цаашид дээрх үйл ажиллагаанд нийт иргэн, улсын ашиг сонирхлыг эрхэмлэн баримталж, үзэл бодлоо чөлөөтэй илэрхийлэн тайван жагсаал, цуглааныг Үндсэн хуулийн хүрээнд зохион байгуулах шаардлагатай гэж үзвэл дэс дараалсан арга хэмжээг авч, орон даяар зохион байгуулах болно. Эрх чөлөөг хэрэгжүүлэгч намаас өмнө нь парламентэд УИХ-ыг тараах тухай хялбарчилсан нэг удаагийн хуулийн төслийн санал агуулсан албан бичгийг УИХ-ын Өргөдлийн байнгын хороонд хүргүүлж байсан боловч үр дүнтэй хариу ирээгүй байна.

Дэмжигчдийн гарын үсгийг хэрхэн авах вэ?

Бид дэмжигчдийн гарын үсгийг: цаасаар, цахим хэлбэрээр, мөн цахим хуудсанд байршуулах байдлаар авна.

Эрх чөлөөг хэрэгжүүлэгч намаас “УИХ дүнг хэрхэн үзэх вэ?” гэж анзаарч байгаа.

Нэгдүгээрт, тодорхой тоо хэмжээнд хүрэхэд байнгын хороогоор хэлэлцэх асуудлыг шийдэх болно.

Хоёрдугаарт, нийтийн сонсгол явуулна.

Гуравдугаарт, арга хэмжээ болбол УИХ-ыг тараах хялбарчилсан нэг удаагийн хуулийн төслийг санаачилгыг зарим гишүүдэд санал тавьж, хуулийн төслийн тухай саналаа хууль санаачлагчдад уламжлах зэрэг улс төрийн намын тухай хуульд заасныг баримтлан ажиллана. " гэсэн байна.

Н.Отгончимэг