sonin.mn
Сэтгэгдэл (30)

Мэдээж. Голдоо ортол ойлгох албатай биш ч “ах нар” заавал ялж байх ёстой гэсэн фанатууд манайх ахмадуудын дунд мэр сэр байгаа учраас аргагүй эрхэнд хөрвүүлгээ хийлээ. Би бол Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Бас дайны түүх сонирхдог. Ялангуяа Зөвлөлтийн армийн түүхийн тухай их уншдаг. Муугүй мэднэ. Тэр мэдлэгээрээ дүгнээд Орос ба Путин Украиныг дийлэх нь өнгөрлөө гэсэн дүгнэлтийг бүр 2022 оны хавар Киевийн дэргэдээс оросын спецназ хөөгдөхөд хийчихсэн. Үргэлжлүүлье.

 

Украины зэвсэгт хүчний цэргийн тагнуулын газрын дарга К.Буданов оросоор ингэж ярьсан бичлэг байна:


–Орос нь ийм урт удаан хугацааны дайны төлөвлөлт хэзээ ч хийж байгаагүй. Шууд л ялчихна гэсэн итгэлтэй, эсвэл Оросыг хүндэтгээд ялагдаж өгөх үүрэгтэй гээд ойлгочихсон. Гэтэл Хойд Солонгос, Хятад гэх мэт холбоотон нь туслаагүй бол Москва аль хэдийнээ ялагдаад дуусах байлаа гэжээ.

 

The Economist сэтгүүлд прогноз маягтай зүйл бичсэнийг оросын нэгэн блогер цацжээ. Өнөөгийн өрнөж буй байлдааны хурд Оросыг нуман тулгуурт оруулжээ. Украины 4 мужийг бүтэн эзлэхэд Орост дахин 5 жил шаардлагатай, Украин орныг бүхэлд нь эзлэж буулган авахад 103 жил шаардагдана.


2022 оны 10 дугаар сард Украины арми анхны сөрөг довтолгооноо хийж, фронтыг тогтворжуулсан. Орос нь тус улсын нийт нутаг дэвсгэрийн 17 орчим хувийг хяналтдаа барьж байснаа одоо дөнгөж 2%-иар ахиулжээ. Бүтэн хоёр жил үхтлээ байлдаж байлдчихаад ердөө 2%. 2025 оны зуны турш Украины газар нутгийн ердөө 0.4%-ийг эзлэн авсан, гэхдээ нэг ч том хотыг хяналтандаа авч чадаагүй. Сүүлийн ганц сард оросын давшилт тасралтгүй явсан ч энэ хурдаараа Луганск, Донецк, Херсон, Запорож мужуудыг бүхэлд нь эзлэхэд 2030 оны 6 дугаар сар хүртэл хугацаа шаардагдахаар байна. Зөвхөн энэ 2025 оны эхний 9 сарын байдлаар Оросын арми 100 мянган цэргээ алдсан бөгөөд бүрэн хэмжээний довтолгоо эхэлснээс хойш 2022-2024 онд Оросын арми 640-877 мянган цэргийнхээ амиар тогложээ хэмээн англи сэтгүүлд бичжээ. Үнэн л болов уу.


Алагдсан орос цэргийн талаар Д.Трамп юу гэж ярьсныг moscowtimes.ru сайтаас орчуулъя. Ерөнхийлөгч Дональд Трамп Аргентины Ерөнхийлөгч Хавьер Милейтэй уулзсаны дараа сэтгүүлчдэд мэдээлэл хийх үеэрээ “Оросын эдийн засаг нуран унаж байна, Орост шатахуун түгээх станцуудад урт дараалал үүссэн нь эдийн засгийн хямрал улам гүнзгийрч байгааг харуулж байна.


Бензин авах гэж урт дараалал үүссэнийг Та нар төсөөлж байна уу? Ийм зүйл болно гэж хэн бодох вэ дээ? Оросын эдийн засаг үнэндээ сүйрлийн байдалд орсон” гээд Трамп нь ОХУ-ын Ерөнхийлөгч Владимир Путинд сэтгэл дундуур байгаагаа илэрхийлж, “Би үнэхээр урам хугарсан. Бид Владимиртай маш сайн харилцаатай байсан, магадгүй одоо ч хэвээр байж болно. Гэвч энэ дайн түүнд маш хүнд туссан” гэжээ.


Трампын яриагаар бол Путин анх “Ганц 7 хоногийн дотор дуусгана” гэж тооцон дайнд орсон ч энэ дайн бараг 4 жил үргэлжилж байна гээд “Путин ойролцоогоор 1 сая 500 мянган цэргээ алдсан. Харин шархадсан, гар хөлөө тайруулсан хүмүүсийн тоо бүр ч их. Энэ бол аймшигтай дайн. Дэлхийн II дайнаас хойшхи хамгийн хүнд хохирол дагуулсан дайн. Москва дайн зогсоох бодолгүй байгаа нь Оросын нэр хүндэд хүчтэй цохилт болж байна” хэмээн ярьжээ. Ингэхэд оросууд Путинтэйгээ эвлэрээд бүгд дайндаа бие сэтгэлээ зориулсан гэж манайхан бүү эндүүрээрэй. Сайтад мэдээ явж байна. Санкт-Петербургт олон зуун залуус цугларч илт Путины эсрэг утгатай дуу дуулцгаажээ.


Залуусыг баривчлаад эхэлсэн мэдээ байна. Дууны утга “Хөгшин эр титмээ алдахаас үхтлээ айдаг! Бункерын хөгшин одоог 1985 он гэж боддог хэвээр. Хаан үхэхэд бид Хунт нуурын аянд бүжиглэх болно” гэж!

 

Энд би юу хөрвүүлж буулгав. Хараал урсгалгүйгээр эрүүлээр сэтгээд үзэхэд Украинд энх тайван тогтооход гол тээг саад нь Орос, Путин юм байна. Дайныг ялалтаар дуусгах тухай Путины яриа мэдэгдэл бол зүгээр л агаарт цацсан цууриа. Хоосон үг сүрдүүлэг. Цаасан бар нэрэндээ Орос одоо бүр яг тохирчихоод байна. Путин хэлчихээр биелчихдэг гэж үздэг монгол хүн байгаа бол тархи мэдрэлээ цоо шинээр цэнэглэх хэрэгтэй гэж зөвлөе.  



Адьяaгийн Батсайхан (бэлтгэл хошууч)