sonin.mn
Сэтгэгдэл (43)

АНУ-ын Ерөнхийлөгч Дональд Трамп Аргентины Ерөнхийлөгч Хавьер Милейтэй уулзсаны дараа сэтгүүлчдэд мэдээлэл хийх үеэрээ Оросын эдийн засаг “нуран унаж байна” гэж мэдэгдэв. Түүний хэлснээр, Орост шатахуун түгээх станцуудад урт дараалал үүссэн нь эдийн засгийн хямрал улам гүнзгийрч буйг харуулж байгаа гэнэ.


“Орост одоо бензин авах гэж урт дараалал үүсч байна. Үүнийг төсөөлж байна уу? Ийм зүйл болно гэж хэн бодох вэ? Оросын эдийн засаг үнэндээ сүйрлийн байдалд орсон” хэмээн Трамп онцлов.


АНУ-ын төрийн тэргүүн мөн ОХУ-ын Ерөнхийлөгч Владимир Путинд сэтгэл дундуур байгаагаа илэрхийлжээ. “Би үнэхээр урам хугарсан. Бид Владимиртай маш сайн харилцаатай байсан, магадгүй одоо ч хэвээр байх. Гэвч энэ дайн түүнд маш хүнд туссан” гэж Трамп хэлэв. Түүний үзэж буйгаар, Путин анх “нэг долоо хоногийн дотор дуусгана” гэж тооцсон дайнд оролцсон ч, энэ дайн бараг дөрвөн жил үргэлжилж байна.


“Тэр ойролцоогоор нэг сая таван зуун мянган цэрэгээ алдсан. Харин шархадсан, гар, хөлөө алдсан хүмүүсийн тоо бүр ч их. Энэ бол аймшигтай дайн — Дэлхийн II дайнаас хойших хамгийн хүнд хохирол дагуулсан үйл явдал юм,” гэж тэр нэмж дурдлаа.


Трампын хэлснээр, Москва дайн зогсоох бодолгүй байгаа нь Оросын нэр хүндэд хүчтэй цохилт өгч байна. АНУ-ын Ерөнхийлөгч мөн ирэх Баасан гарагт Украины Ерөнхийлөгч Владимир Зеленский түүнийг Вашингтонд айлчлах гэж буйг баталсан. “Би тэр юу хэлэх гэж байгааг мэднэ. Тэр зэвсэг хүсэж байгаа. Тэр "Томагавк" пуужин авахыг хүсэж байгаа. Бүгд л "Томагавк" хүсэж байна. Аз болоход, манайд хангалттай бий,” гэж Трамп хошигнон хэлэв.




Н.Отгончимэг

Эх сурвалж: moscowtimes.ru