sonin.mn
Сэтгэгдэл (19)

Хөгжил дэвшил ярьж, гарц гаргалгаа хайх нь буруу биш. Гэвч мал, малчдаа цас зуданд дараатай, зутарч байхад “Монголын Эдийн засгийн чуулган-Бүсчилсэн хөгжил” чуулган хэмээх сүржин нэрээр аймгийн дарга нарыг цуглуулж, сонгуулийн кампанит ажил өрнүүлж байгааг зөвтгөх арга алга. 


Тус чуулганд 21 аймгийн Засаг дарга тэргүүтэй дарга нар хүрэлцэн ирсэн. Ингэхдээ Хойд бүсийг “Новотель” зочид буудалд, говийн бүсийг “Блю Скай” зочид буудалд, зүүн бүсийг “Туушин” зочид буудалд, хангайн бүсийг Соёлын төв өргөөнд, Төвийн бүсийг Дуурь бүжгийн эрдмийн театрт, баруун бүсийг Төрийн ордонд тус тус зохион байгуулж, чуулах нэрээр тансаглуулж байна. 



Ямартай ч бүсчилсэн хөгжлийн чуулган гэхээсээ илүүтэй, МАН-аас сонгогдсон Засаг дарга нар Тусгаар тогтнолын ордон бараадаж, Өмнөговь, Дундговь, Сүхбаатар гэх мэт аймгийн АН-аас сонгогдсон Засаг дарга нар намын дарга Л.Гантөмөртэйгөө хэвлэлийн хурал зохион байгуулан улс төрийн шоу хийж, сонгуулийн төлөвлөгөө ярьж явна.



Үүнээс гадна орон нутгаас сонгогдсон УИХ-ын гишүүд илтгэл нэрээр сонгуулийнхаа сурталчилгааг сайтар хийж амжив.


Орон нутаг цасанд боогдсон байдалтай, мал сүрэг үрэгдэж, малчид маань зутруухан байна. Машин техникийн хүчээр ч хүрч чадахгүй байгаа алслагдсан сум, багийн малчид өвч тэжээлгүй, хүн хүч хүрэлцэхгүй, хотоо харласан байдалтай, туйлдаж ядарсан байхад аймгийн Засаг дарга нар нь Улаанбаатарт чуулах нэрээр шоудаж байгаа нь увайгүй, цагаа олоогүй хэрэг.  


Уг нь Засгийн газар, УИХ, Засаг дарга нар хамтдаа малаа, малчдаа яаж аврах вэ, зээлтэй байгаа 100 орчим мянган малчдынхаа зээлийг хэрхэх вэ, нэгэнт амьжиргаагаа алдаж байгаа малчдынхаа ирээдүйг яах вэ гэх мэт тулгамдсан асуудлыг хэлэлцэж, бодит дэмжлэг үзүүлэх бодлого гаргасан бол хилээ, газар нутгаа, өв соёлоо хамгаалж буй малчид маань ингэтлээ ядарч туйлдаж, байгалийн үзэгдлийн өмнө хүчин мөхөстөхгүй байх сан. Ядаж л арай бага эрсдэл хүлээнэ. 



ШИНЭ намын дарга, доктор PhD Цэндсүрэнгийн ГАНТУЛГА