sonin.mn
Сэтгэгдэл (2)

АНУ-ын Ерөнхийлөгч Дональд Трампын Газын зурваст гал зогсоох болон Израиль–Палестины мөргөлдөөнийг зогсоох төлөвлөгөөг хэрэгжүүлэх нь Ойрх Дорнодын бусад бүс нутагт энх тайвныг тогтоох уур амьсгалыг бүрдүүлээд зогсохгүй, Украины хямралыг зохицуулахад ч нөлөөлж болох талаар АНУ-ын ерөнхийлөгчийн тусгай элч Стив Уиткофф мэдэгджээ.


“Ерөнхийлөгч цогц энх тайвныг хармаар байна. Энэ нь зөвхөн Газын тухай биш харин энэ нь Ойрх Дорнодын бүх бүс нутагт хэрхэн тархах, юу авчрах, магадгүй бүр Орос ба Украин руу ч нөлөөлж болох тухай юм” хэмээн тэрээр АНУ-ын эрх баригчдын Палестины нутаг дэвсгэрт мөргөлдөөнийг зохицуулахын тулд дэвшүүлсэн төлөвлөгөөний талаар Fox News-д ярилцлага өгөхдөө тэмдэглэв. Уиткоффын хэлснээр, Трампын санаачилгыг Персийн булангийн орнууд болон Европын улс орнууд дэмжиж байгаа аж.


Өмнө нь Цагаан ордон Газын зурваст мөргөлдөөнийг шийдвэрлэх төлөвлөгөөг танилцуулсан. Уг баримт бичигт бүх нийтийн дайсагналыг бүрэн зогсоох, мөн Хамасын барьцаанд байгаа хүмүүсийг 72 цагийн дотор суллах тухай тусгасан байна.


Үүнээс гадна, баримт бичигт Газын зурвасыг шилжилтийн хугацаанд гадаад захиргаанд шилжүүлэхийг санал болгожээ. Энэ хугацаанд Газын оршин суугчид гарах, буцаж ирэх боломжтой байх аж. Израилийн Ерөнхий сайд Бенжамин Нетаньяху Вашингтонд Трамптай хамт хэвлэлийн бага хурал хийх үеэрээ АНУ-ын ерөнхийлөгчийн Газад цэргийн ажиллагааг зогсоох төлөвлөгөөг дэмжиж байгаагаа мэдэгдэв. Гэвч тэрээр хэрэв Хамас энэ саналыг няцаах эсвэл саатуулбал Израиль “өөрсдөө ажлыг дуусгана” хэмээн онцолжээ.



Н.Отгончимэг

Эх сурвалж: tass.com