МАН-ын гишүүдийн “Цэвэрлэе" түр хөдөлгөөнийг санаачлагчид уриалга гаргажээ.

Уг уриалгад: "Монгол Ардын намын нийт гишүүдээ, эрхэм журмын нөхдөө, манай нам ард түмний итгэл дэмжлэгээр сүүлийн гурван сонгуульд үнэмлэхүй ялалт байгуулж төрийн эрхийг барьж буй нь Монголын ард түмэн, бидний үзэл санааны нэгдэлд үзүүлж буй эрхэм дээд итгэл гэдгийг та бид гүнээ ухамсарлаж байгаа биз ээ. Улс орон шилжилтийн үеэ дуусгаж, өнгөрсөн цаг хугацаандаа үнэлэлт дүгнэлт хийх түүхэн цаг үе энэ жилүүдэд өрнөж байна.

Манай нам ч, энэ улсын ууган институцийн хувьд боловсон хүчний “хэлхээс" бодлогоо хадгалан улс төрийн зоримог шинэчлэлүүдийг хийж, залуу үеэ тууштай дэмжиж, ард түмний хүсэл зорилгод нийцэх бүхий л алхамыг цаг алдалгүй хийсээр ирсэн.

Харамсалтай нь манай намын дотоод эв нэгдлийг бусниулах, өөрсдийн гар хөлөөр дамжуулж Монгол Ардын намыг шууд удирдах, МАН-ын нэрээр Монголын баялгийг луйвардан дээрэмдэх зорилго бүхий, маш том бүлэг этгээдийн санаатай, зохион байгуулалттай ажиллагаанууд улс орны тусгаар тогтнол, аюулгүй байдалд заналхийлэх хэмжээнд ирсэн тул энэхүү уриалгыг намынхаа нийт журмын нөхдөд бичиглэн хүргүүлж байна. Манай нам нэгэнт нүүрсчдийн нам болжээ, хатуу ч гэсэн энэ тодорхойлолт өдөр бүр батлагдсаар байна. Нүүрсчид намын толгойд гарч, нүүрсний хулгайн загалмайлсан эцэг “Жэнко” Баттулга гэгчийн шууд гар хөл болон ажиллаж, нам, журмын нөхөд, үзэл санааныхаа эсрэг зохион байгуулалттай үйл ажиллагаа явуулж, ард түмнээ талцуулж, улс төрийн зорилгоор, төрийн тогтвортой байдлыг эрсдэлд оруулах, улсын төсвийг гацаах зэрэг Монгол хүний санаанд багтамгүй бохир ажиллагааг ил тод хийсээр байна.

Шууд нэр цохон дурдахад МАН-ын дарга /асан/ Лувсаннамсрайн Оюун-Эрдэнэ, УИХ-ын дарга Дашзэвгийн Амарбаясгалан болон тэдний шууд гар хөл болсон, цөөн тооны УИХ-ын гишүүд та бүхэн, улсаасаа том хувийн эрх ашгийн төлөөх бохир үйлдлүүдээ нэн яаралтай зогсооно уу.

Та бүхнийг Монгол Ардын намын мянга мянган гишүүд.төдийгөөс өдий хүртэл Монгол төрийн бүх эрх мэдэлд хүртэл итгэн дэмжсээр ирсэн. Та бүхний хэтийдсэн шуналт үйлдлүүд, түүнээс үүссэн ноцтой гэмт хэргүүдийн сүүдэр Монголын ард түмний зовлон, хуваагдал болж, Монгол Ардын намыг хагалан бутаргах шалтгаан болохыг бид хэрхэвч тэвчихгүй ээ.

Монгол Ардын намын нийт гишүүдээ, Удирдах зөвлөл, Намын бага хурлын гишүүдээ, та бүхэн энэ хариуцлагатай цаг үед эвлэн нэгдэж, эх орныхоо язгуур эрх ашигт үйлчилж, нам дотор шургалсан элдэв гэмт бүлэглэлийн шууд гар хөлүүдийг хөөн зайлуулах үйлсэд зориг, оролцоогоо нэгтгэн зүтгэхийг уриалж байна.

Бидний даван туулсан үйлс, нэгтгэсэн үнэт зүйлс, эх оронч үзэл санаа, үнэ цэнтэй бүхнийг маань “нүүрсчин" авлагчид устган бүдгэрүүлэх ёсгүй ээ. Манай намын боловсон хүчний хэлхээс бодлогыг эвдэж, дипломын ард, тооноор орж ирээд, улс төрийн ууган хүчнийг хагалан бутаргах ажиллагааг ил тод хийж байгаа гэмт бүлэглэлийн гар хөл болсон этгээдүүдийг нэн яаралтай намаас хөөж, улс төрийн болон хуулийн хатуу хариуцлага тооцохын тулд бид тууштай ТЭМЦЭХ болно.

Монгол Улсаа, Монголын төрөө, Монгол Ардын Намаа нүүрсчин дээрэмчдээс салгах их “цэвэрлэгээ”-г эхлүүлье.

ЗОРИГ ЭС ХҮРВЭЛ УХААН ЭС ХҮРНЭ...

Уриалгыг бичиглэсэн:

МОНГОЛ АРДЫН НАМЫН ГИШҮҮД

“Цэвэрлэе" түр хөдөлгөөнийг санаачлагчид 2025.09.24" гэжээ.