УИХ-ын гишүүн С.Ганбаатар Эрүүгийн хуулийн 22.1-т заасан “Эрх мэдэл, албан тушаалын байдлаа урвуулан ашигласан” буюу өөрийн гэр бүлийн хамаарал бүхий хүмүүст давуу байдал бий болгосон, Эрүүгийн хуулийн 22.4 дүгээр зүйлд заасан, “хахууль авсан”, 18.6 дугаар зүйлд заасан “Мөнгө угаасан”, 2.10 дугаар зүйлд заасан, “Үндэслэлгүйгээр хөрөнгөжсөн” зэрэг нийт 6 хэрэгт яллагдагчаар татагдаад буй билээ. Гэсэн атлаа тэрээр мөрдөн шалгах ажиллагаанд оролцохоос зайлсхийж, мэдүүлэг өгөхөөс татгалзан, зөвхөн шүүхэд очсон цагтаа мэдүүлнэ гэсэн байр суурь илэрхийлж буй нь хууль зүйн хариуцлагаас зайлсхийж байгаа хэрэг мөн. Үүнээс ч ноцтой нь, яллагдагчаар татагдсан гишүүнээ хамгаалах, түүнийг “парламентын дархлаа” гэх нэрийн дор үлдээх оролдлого УИХ-ын зарим гишүүдийн дунд ажиглагдаж байна.

УИХ дахь АН-ын бүлэг завсарлага авч, бүр гүйцэтгэх ажиллагаа явуулж байна гэсэн үндэслэлээр шүүх, хуулийн байгууллагын ажиллагаанд саад хийх хүртэл алхам хийж байгаа нь ардчиллын үнэт зарчмыг уландаа гишгэж буй үйлдэл юм.

Монгол Улсын Үндсэн хуульд "Хүн бүр хуулийн өмнө эрх тэгш байна” гэж заасан байдаг. Энэ зарчим бол ардчилсан төрийн үндэс, нийгмийн шударга ёсны тулгуур билээ. Төрийн өндөр албан тушаал хашиж байгаа нь гэмт хэрэг үйлдсэн хүнд давуу байдал олгох ёсгүй. Харин ч эсрэгээрээ, ард иргэдийн итгэлийг хүлээн, хууль тогтоох дээд байгууллагад сонгогдсон хүн илүү өндөр хариуцлага үүрэх учиртай. Тиймээс УИХ нь өөрийн гишүүдийг гэмт хэрэгт шалгагдаж байгаа тохиолдолд хамгаалах бус, харин ч шударга ёсны зарчмыг хэрэгжүүлэхэд үлгэр жишээ болж ажиллах учиртай.

Яллагдагчийг хаацайлах нь парламентын дархлаа бус, харин ардчиллын суурь зарчмыг эвдэх бодит аюул юм.

Жинхэнэ ардчиллын дархлаа гэдэг нь хууль хүн бүрт тэгш үйлчлэх, гэм буруутай нь тогтоогдсон этгээдэд шударгаар шийтгэл оногдуулах явдал мөн. Монголын ардчиллыг хамгаалах зам бол хувь хүний ашиг сонирхол, намын дархлаа биш. Харин хууль дээдлэх зарчим, шударга ёсыг хэрэгжүүлэх эр зориг юм.

Э.Мягмар