sonin.mn
Сэтгэгдэл (31)

ОХУ-ын эрх баригчид инфляцийн хурдацтай өсөлтийг хязгаарлахын тулд Зөвлөлтийн үеийн эдийн засгийн зохицуулалтын аргуудыг сэргээхээр зэхэж байна. Тухайлбал, нийгмийн хувьд чухал хүнсний бүтээгдэхүүний үнийг төрөөс тогтоох эсвэл хязгаарлах тухай хуулийн төслийг боловсруулж эхэлжээ.


"Коммерсантъ" сонины мэдээлснээр, ОХУ-ын Хөдөө аж ахуйн яам (Минсельхоз) сүү, ногоо, жимс, шувууны мах үйлдвэрлэгчдийн үндэсний холбоодод хандан үнийн зохицуулалтын талаар санал авахаар албан бичиг илгээсэн байна. Саналыг энэ сарын 25-ны дотор хүргүүлэх үүрэг өгсөн бөгөөд тухайн бүтээгдэхүүнүүдийг зах зээлд тогтвортой үнээр нийлүүлэх шинэ тогтолцоо бий болгох зорилготой аж.


Засгийн газар одоогоор хоёр үндсэн хувилбарыг хэлэлцэж байна.


Нэгдүгээр хувилбар: 2026 оноос эхлэн хүнсний бүтээгдэхүүний 80-аас доошгүй хувийг урт хугацааны, тогтсон үнэтэй гэрээгээр борлуулах шаардлагыг худалдааны сүлжээнүүдэд тавина. Гэрээний үнийг жилд нэгээс илүүгүй удаа шинэчилж болох ба дундын маргааныг шүүхээс гадуур цуцлах боломжгүй.


Хоёрдугаар хувилбар: Төрөөс 80%-иас дээш борлуулагдаж буй бүтээгдэхүүнд хамгийн бага ба дээд үнийг буюу “үнийн коридор” тогтоох. Энэ нь шууд төрийн зохицуулалттай хатуу систем байх юм.



Зохицуулалтад дараах бүтээгдэхүүнүүд багтаж болзошгүй:


Төмс


Лууван


Байцаа


Манжин


Сонгино


Улаан лооль


Өндөг


Сүү


Элсэн чихэр


Алим


Өргөст хэмх


Наранцэцгийн тос


Эдгээр бүтээгдэхүүний үнэ сүүлийн саруудад огцом өссөн. Жишээлбэл, 5-р сард төмсний үнэ 2.5 дахин нэмэгдсэн бол “борщны багц”-ын ногоо 57–87%-ийн үнийн өсөлттэй байсан талаар албаны эх сурвалж мэдээлжээ.

Гэсэн ч уг санаачилгыг хүнсний үйлдвэрлэгчид болон худалдааны сүлжээ компаниуд хүчтэй эсэргүүцэж байгаа юм. Тэдний хэлснээр, зардал тасралтгүй өсөж байгаа өнөөгийн нөхцөлд үнээ тогтоон барих нь үйлдвэрлэлийг алдагдалтай болгох эрсдэлтэй.


“Одоогийн эдийн засгийн орчинд жилийн өмнө таамаглаж, үнээ тогтоох боломжгүй. Эрчим хүч, шатахуун, ложистик, хууль эрх зүйн шинэ өөрчлөлт гээд олон хүчин зүйлс өртөгт нөлөөлж байна” хэмээн Үндэсний махны холбооны тэргүүн Сергей Юшин онцолсон байна. Тэрээр хэт хатуу зохицуулалт нь үйлдвэрлэлийн зогсолт, нийлүүлэлтийн доголдолд хүргэж болзошгүйг анхааруулжээ.


X5 групп (Пятерочка, Перекресток, Чижик сүлжээний эзэмшигч) мөн эсэргүүцлээ илэрхийлсэн байна. Тус групп саяхан Mars компанитай үнийн маргаанаас болж чихэр, бохь худалдан авахаа зогсоосон. Тэдний байр суурь: “Зах зээлийн тоглогчдын хоорондын харилцаа өөрөө зохицож ирсэн, шинэ төрийн хязгаарлалт зах зээлийг гажуудуулна” гэжээ.

Засгийн газрын санал болгож буй эдгээр өөрчлөлт нь “Худалдааны үйл ажиллагааны төрийн зохицуулалтын үндсэн хуулийн” нэмэлт болгон 2026 оны 3-р сарын 1-нээс хэрэгжихээр төлөвлөгдөж байна. Хэрэв эхний хувилбар батлагдвал, 2027 онд урт хугацааны гэрээгээр борлуулагдах барааны хувь 85%, 2028 онд 90% болж нэмэгдэх юм.


М.Чой


Эх сурвалж: https://www.moscowtimes.ru/