sonin.mn
Сэтгэгдэл (78)

Бид Монголын спортын түүхэнд шинэ хуудас нээсэн бахархам амжилтын гэрч боллоо. 3x3 эмэгтэй сагсан бөмбөгийн үндэсний шигшээ баг дэлхийн аваргын мөнгөн медалийг эх орондоо авчирсан нь зүгээр нэг спортын амжилт биш. Энэ бол Монголын залуучууд дэлхийн тавцанд гарч, хэний ч төсөөлөөгүй амжилтыг бүтээж чадах чадвартай гэдгийг бодитоор харуулсан, итгэл найдварын бэлгэдэл боллоо.


Энэхүү түүхэн амжилтын ард зөвхөн тамирчдын хөдөлмөр, зүтгэл байсангүй. Монголд 3x3 сагсан бөмбөгийг хөгжүүлэхэд тууштай, тогтвортой хөрөнгө оруулалт хийж ирсэн бизнесийн салбарын манлайлагч, "М-Си-Эс" групп болон "Энержи Ресурс" компанийн ТУЗ-ийн дарга Ж.Оджаргалын дэмжлэг чухал үүрэг гүйцэтгэсэн нь тодорхой юм. Тэрбээр энэ спортын төрлийг олон жилийн турш тасралтгүй ивээн тэтгэж, орчин үеийн стандартад нийцсэн зөөлөн дэд бүтэц, тэмцээн уралдаан, сургалтын орчныг бүрдүүлэхэд томоохон хувь нэмэр оруулсаар ирсэн.


Ингээд ч зогсохгүй, дэлхийн аваргын мөнгөн медаль хүртсэн шигшээ багийн охидыг 1 тэрбум төгрөгөөр шагнасан нь зөвхөн урамшуулал бус, Монголын залуучуудад хандсан томоохон мессеж байлаа. “Та бүхний хөдөлмөр үнэлэгдэнэ. Та бүхний авьяас дэмжигдэнэ.” гэсэн урамыг залуучуудад өглөө.


Энэ үйлдэл нь нийгмийн хариуцлагаа ухамсарласан бизнесмэнүүдийн үүрэг Монголд ямар их нөлөөтэйг харуулж байна. Төрийн дэмжлэг хязгаартай, боломж бололцоо хүрэлцээгүй нөхцөлд хувийн хэвшлийн бодит дэмжлэг хэрхэн залуусын ирээдүйг гэрэлтүүлж болдгийг Ж.Оджаргалын жишээ тод томруунаар харууллаа. Монгол залуус авьяастай, дайчин, тууштай. Гагцхүү боломж, орчин, дэмжлэг л хэрэгтэй.


Тэгвэл ийм Ж.Оджаргал шиг бизнес эрхлэгчид, тэрбумтнууд олон байвал, тэд эх орныхоо хөгжилд хөрөнгө оруулж, залуусаа дэмжиж чадвал Монгол залуус зөвхөн спорт төдийгүй шинжлэх ухаан, урлаг, технологи, гарааны бизнес зэрэг олон салбарт дэлхийн түвшинд гарах бүрэн чадамжтай гэдгийг харуулж чадна.


Өнөөдөр нэг тэрбум төгрөгөөр шагнасан энэ түүх маргааш Монголын олон залууст итгэл, сэдэл, урам зориг болж хувирна. Ийм л хөрөнгө оруулалт, ийм л дэмжлэг Монголын ирээдүйг гэрэлтүүлнэ.


Т.Ундрахбаяр