sonin.mn
Сэтгэгдэл (15)

Нийслэлчүүдийг хөл залгуудаг нэртэй хэдхэн хувийн автобус компани, тэдгээрийг төсвийн мөнгөөр угжиж ирсэн төр-хувийн хэвшил дагнасан мафийн сүлжээ сүүлийн саруудад амь тавьж байна.


Тэдний хамгийн том луйвар “Ногоон” автобус тэргүүтэй хуучин автобус будаж янзлан, төсвөөс мөнгө шамшигдуулсан хэргээр ил болсон. Нийт 27 этгээд бүлэглэн улсад 134.5 тэрбум төгрөг буюу онц их хэмжээний хохирол учруулсан болохыг Авлигатай тэмцэх газар тогтоогоод байгаа. Өөрөөр хэлбэл, өнгөрсөн хугацаанд улс төр-эдийн засгийн бүлэглэл нийтийн тээврийн салбарыг удирдаж ирснийг үүнээс харж болно.



Тэгвэл өнөөдөр автобус компанийн эзэд нийслэлийн төсвөөс авдаг татаас хэлбэрээр сул авдаг 200 тэрбум төгрөг, дээр нь нийтийн тээрийн үйлчилгээнээс хүртдэг 50 тэрбум төгрөгийн ашгаа хамгаалж үлдэхээр автобусны үйлчилгээг тасалдуулах бойкот хийж эхлээд байна.



Тоон мэдээллээс харахад, өнгөрсөн хугацаанд нийтийн тээврийн орлогын 70 хувийг хэдхэн хувийн компанийн эзэд хуваан хүртэж ирсэн. Хотын захиргаанаас танилцуулсан автобусны шинэ чиглэл компанийн эздэд 200 тэрбумаар тоологдох ашгаа хамгаалах том далим болов. Шинэ чиглэл нэвтрүүлсэн эхний өдөр салбартаа томд тооцогддог хэд хэдэн компани автобуснуудаа үйлчилгээнд гаргаагүй.



Нийтийн тээврийн үйлчилгээнд гаргасан хэсэг нь цөөн тооны автобус явууж, хот даяар нь бухимдуулжээ.  



Улаанбаатар хотын захиргаанаас нийтийн тээврийн салбарт шинэчлэл хийж эхэлсэн бөгөөд автобусны үйлчилгээ эрхэлдэг хувийн компаниудад өгдөг сул татаасыг бууруулах асуудлыг хөндөж эхэлсэн. Улмаар автобусаар зорчих үнэд өөрчлөлт оруулж, нийтийн тээврийн салбарыг зах зээлийн зарчмаар хөл дээр нь босгох менежментийн болон парк шинэчлэл ажил эхлүүлээд байгаа юм. Цогц арга хэмжээний нэг нь хэсэг нь автобусны богино эргэлт. Энэ нь ашигтай урт чиглэлд автобус явуулдаг, түүнийгээ тооцуулан төсвөөс сул татаас авдаг хувийн компаниудын эздийн эрх ашгийг хөндөөд байгаа юм.



О.Чулуу