sonin.mn
Сэтгэгдэл (0)
Улаанбаатар /МОНЦАМЭ/. Ерөнхийлөгч Х.Баттулга Засгийн газрын гишүүн, Сангийн сайдаар УИХ-ын гишүүн Ч.Хүрэлбаатарыг томилсон УИХ-ын шийдвэрт өчигдөр хориг тавьсан. Үүнтэй холбогдуулж Сангийн сайд Ч.Хүрэлбаатараас байр суурийг нь тодруулав. 
 
-Ерөнхийлөгчийн хоригийг та хэрхэн хүлээж авч байгаа вэ? 
 
-Ерөнхий сайд анх Засгийн газрын гишүүдийг нэр дэвшүүлж, зөвшилцөх саналаа хүргүүлж байхад Ерөнхийлөгч намайг Сангийн сайдаар томилох саналд татгалзсан хариу өгч байсан. Татгалзахдаа бас нэлээд сонин үндэслэлүүд хэлж байсан. Тэгээд томилогдсоноос хоёр хоногийн дараа хориг тавихаа мэдэгдсэн. Энэ нь өчигдөр хориг болж гарч ирсэн. 
 
-Хориг тавих бол үндэслэлийг хэрхэн харж байгаа вэ?
 
-Хориг тавихдаа төрийн албан хаагчдад олгох 300.000 төгрөгийн асуудлыг хөндсөн байна лээ.
 
Нэгдүгээрт 2017 оны Төсвийн тодотголыг У.Хүрэлсүхийн Засгийн газар өргөн бариагүй гэдгийг хэлмээр байна. Хоёрдугаарт 300.000 төгрөг олгох шийдвэрийг Гурван талт хэлэлцээрийн шийдвэрийг үндэслээд УИХ-ын Төсвийн байнгын хорооны Ажлын хэсэг санал гаргасан. Өөрөөр хэлбэл У.Хүрэлсүхийн Засгийн газрын шийдвэр биш. Ингээд 55 тэрбум төгрөгөөр эмч, багш, асрагч, сувилагч, бага орлоготой үйлчилгээний алба хаагчдад 300.000 мянган төгрөгийн нэг удаагийн урамшуулал олгох шийдвэрийг УИХ гаргасан. Энд төрийн өндөр албан тушаалтан, шүүгч, прокурорууд ороогүй. Тэгэхээр УИХ-ын шийдвэрийг үндэслээд тухайн үед Төсвийн тодотгол өргөн бариагүй Сангийн сайд надад хориг тавьж байгаа учрыг ойлгохгүй байна. 
 
-Ерөнхийлөгчийн хувьд таныг анхнаасаа дэмжихгүй байсан шалтгаан нь ашиг сонирхлын зөрчилтэй, уул уурхайн бизнест хамааралтай гэж тайлбарлаж байсан. Үүнийг та хэрхэн тайлбарлах вэ?
 
-Би Рио Тинто-гийн гэрээг ахалж хийсэн. Гэвч тэр гэрээг  УИХ дэмжээгүй. 2009 оны гэрээг батлахад тухайн үед би байгаагүй. Намайг ЗГХЭГ-ын дарга байсан гэж ярьж байсан. Би биш Долгор гэж хүн байсан. Дараа нь Оюутолгойн гэрээ батлагдсаны дараа Сү.Батболд Ерөнхий сайд болоход би ЗГХЭГ-т очсон. Мөн лицензийн асуудлыг надтай холбож яриад байгаа. УИХ-ын чуулганы хариуцлагатай индэр дээрээс би хэлсэн. Дахиад хэлье. Надад лицензтэй холбоотой юу ч байхгүй. 
 
-Ерөнхийлөгчийн хоригийн тайлбарт 30 гэр бүлийн асуудал дурдагдсан байсан. Энэ талаар?
-Ямар 30 гэр бүлийн тухай яриад байгааг мэдэх юм алга. 
 
-Та чуулганы хуралдаанд үг хэлэхдээ хориг тавьсан явдал нь УИХ-ын Тамгын газрын дарга З.Энхболдтой холбоотой гэсэн. Энэ ямар учиртай юм бэ? 
-2016 оны сонгуулийн үеэр Увсад З.Энхболд гэж хүн очсон. Тэнд тун ёсзүйгүй зан байдал гаргаж, Увсын иргэдийн дургүйцлийг төрүүлснийхээ төлөө хөөгдөж байсан юм. Харин үүнийгээ Ч.Хүрэлбаатар зохион байгуулсан гэж, ярьж итгэж явдаг. Угтаа бол Увсын ард түмний итгэл үнэмшил байсан юм. Тэгэхээр УИХ-ын Тамгын газрын дарга З.Энхболд улс төрийн өс зангидаад ийм арга хэмжээнүүд авч байгаа гэдэгт би огт эргэлзэхгүй байгаа. 
 
-Ерөнхийлөгчийн хоригийг УИХ дахь АН-ын бүлэг дэмжихээ илэрхийлсэн. Тэгвэл МАН-ын бүлэг ямар байр суурьтай байх вэ?  
 
-Өнөөдөр өглөө МАН-ын бүлгийн хуралдаан зарласан. Гадаад томилолттой, чөлөөтэйгөөс бусад бараг бүх гишүүд ирж оролцсон. Бүлгийн хурлаас Ерөнхийлөгчийн хоригийг 100 хувь хүлээж авах боломжгүй гэж шийдвэр гаргасан. МАН сахилга хариуцлагатай, АН-аас сонгогдсон Ерөнхийлөгч, АН-ын бүлгийн шийдвэрийг дагахгүй байх. 
 
Н.Гантуяа
Гэрэл зургийг Б.Чадраабал
Эх сурвалж: Монцамэ агентлаг