sonin.mn
Сэтгэгдэл (0)

Засгийн газрын хуралдаанаас Эрдэнэс Тавантолгой ХК-ийн хувьцаагаа борлуулах санал өгсөн иргэдэд саналаа буцаах, оюутнуудад урьчилж авсан мөнгөө төлөөд хувьцаа авах боломж олгосон нь олны анхаарлын төв орсон. Зарим хүн “Ардчилсан намынхан хувьцаатай холбоотой асуудал гаргасан учир Засгийн газраас ийм шийдвэр гаргаж байна” гээд байгаа. Ямар учраас ийм шийдвэр гаргасан юм бэ?


- Эрдэнэс Тавантолгой ХК-ийн хувьцаанд итгэх иргэдийн итгэл маш бага байна. Учир нь 1990 оны хувьчлал шударга бус болсныг хүн бүр мэдэж байгаа. Тиймээс иргэд тэр үеийнх шиг алдааг дахиад гаргачих вий гэсэн үүднээс хувьцаагаа зарах санал маш ихээр өгсөн. Гэхдээ одоо тийм санал өгсөн хүмүүс “өргөдлөө буцаая” гэсэн саналыг маш ихээр ирүүлсэн учир Засгийн газрын хуралдаанаас буцаах журам баталж наймдугаар сарын 1 хүртэл саналаа буцаах боломжийг иргэдэд олгохоор шийдсэн.


-Өндөр настан болон хөгжлийн бэрхшээлтэй иргэд, оюутнуудад ямар сонголт байгаа вэ?


-Өндөр настан болон хөгжлийн бэрхшээлтэй иргэдэд ч ялгаагүй хувьцаа эсвэл мөнгөө сонгох боломж олгож байгаа. Хувьцаагаа сонгоод үр хүүхэддээ өвлүүлэх хүсэлтэй ахмадууд байвал сая авсан мөнгөн дүнгээ хасаж тооцоод үлдсэн үнийн дүндээ тааруулж хувьцаа авах боломжтой. Эсвэл 500 мянган төгрөгийн хувьцаа авах хүсэлтэй ч байж болох шүү дээ. Тэгвэл тэрхүү хүсэлтийг нь харгалзаж үзнэ гэдгийг ч тусгасан байгаа. Оюутнуудын хувьд ч мөн ялгаагүй. Сонголт өгч байгаа. Тухайлбал, 1.5 сая төгрөг авсан оюутнууд нэг сая төгрөгөө эргүүлж өгөөд хувьцаа авах боломжтой юм.


-Гэтэл Ардчилсан намынхан “оюутнуудад олгосон мөнгөнөөс гадна хувьцаа олгох ёстой” гэсэн байр суурийг илэрхийлж байгаа шүү дээ?


-Бид иргэн бүртээ тэгш боломжийг олгохыг л хүссэн юм. Учир нь зөвхөн энэ цаг үед оюутан байгаа хүмүүс 1.5 сая төгрөг, нэг сая төгрөгийн үнэтэй дүйцэх хэмжээний хувьцаа авбал шударга бус үйлдэл болно биз дээ. Иргэн бүртээ тэгш эрхийн үүднээс хандах ёстой гэж бодсны үндсэн дээр ийм шийдвэр гаргасан юм. Түүнээс биш зөвхөн оюутан гэж туйлшрах ёсгүй. Тэд бүх л зүйл дээр хөнгөлөлт эдэлдэг гэдгийг хүн бүр мэдэж байгаа.


-Мөнгө авахыг хүсэж байгаа өндөр настан болон хөгжлийн бэрхшээлтэй иргэдэд олгож буй бэлэн мөнгөний үлдэгдлийг хэзээнээс олгож эхлэх вэ?


-Одоогийн байдлаар дээрх хүмүүст тус бүрт нь 330 мянган төгрөг олгосон байгаа. Үлдсэн мөнгийг нь ирэх долоо хоногт багтаан олгохоор төлөвлөсөн.


-Санхүүжилтын асуудлыг хэрхэн шийдвэрлэсэн юм бэ. “Хүний хөгжил сан”-гийн данс улайссан гэсэн мэдээлэл байсан?


-“Хүний хөгжил сан”-гийн эх үүсвэр тодорхой байдаг. Стратегийн ордуудаас орж ирэх ногдол ашиг, нөөцийн төлбөр, ордуудаас орж ирэх урьдчилгаа төлбөрөөс бүрддэг. Нөөцийн төлбөрөөс 50 тэрбум төгрөг төвлөрүүлэх үүргийг Татварын ерөнхий газар хүлээсэн. Үүнийхээ дагуу холбогдох аж ахуйн нэгжүүдээс нөөцийн төлбөр барагдуулаад тодорхой хэмжээний мөнгийг “Хүний хөгжил сан”-д төвлөрүүлж байна. Мөн Эрдэнэт үйлдвэр түрүү жилийн ногдол ашгаа өгөөгүй байна. Учир нь Эрдэнэт үйлдвэр хамтарсан компани. Тиймээс удирдах зөвлөл нь хуралдаж байж ТӨХ-ны даргатай 110 тэрбум төгрөгийг оруулж ирсэн. Үүний дээр Эрдэнэс Тавантолгой компаниас ч гэсэн мөнгө орж ирж байгаа. Эрдэнэс МГЛ компанийн харьяанд Оюу толгой, Эрдэнэт, Монголросцветмет, үлдэж байгаа 15 стратегийн орд хамаардаг. Үүнээс иргэддээ давуу эрхтэй хувьцаа олгохоор тогтсон байгаа. Давуу эрхтэй хувьцааны онцлог нь төр хувьцаа эзэмшигч юм. Тиймээс энэ хувьцааг шилжүүлж болохгүй, худалдаж болохгүй. Ашгаас гарсан ногдол ашгаа л хүртэх боломжтой. Өөрөөр хэлбэл, иргэдээ тогтмол эргэлтийн хөрөнгөтэй болгох гээд байгаа юм.


-“Эдийн засгийн өсөлт маш өндөр хувьтай гарч байна” гэсэн мэдээллийг Засгийн газраас хийж байгаа ч бодит амьдрал дээр мэдрэгдэхгүй байгаа. Энэ тэгэхээр хуурамч өсөлт үү?


-Цалин, тэтгэвэр нэмсэн нь эдийн засгийн өсөлтөөр бий болсон орлогыг Сангийн яаманд хуримтуулаад тарааж буй нэг хэлбэр юм. Эхний ээлжинд бид иргэддээ мөнгөн хэлбэрээр олгосон. Цаашид тэгш хуваарилалтаар олгох үүднээс дэд бүтцийг хөгжүүлэх ажлуудыг хийхээр төлөвлөсөн. Монгол Улсын нэг иргэнд жилд дунджаар гурван мянган ам.долларын дотоодын нийт бүтээгдэхүүн оногдож байна. Энэ бол Монгол хүний жилийн дундаж орлого нь дөрөв орчим сая төгрөг байна л гэсэн үг. Үүнийг бид 10 мянган ам.доларт хүргэнэ гэж мөрийн хөтөлбөртөө оруулсан. Эдийн засгийн өсөлт ч өсөх магадлал өндөр байгаа юм.


-Ярилцсанд баярлалаа.