БНХАУ-ын БХАТИХ-ын Байнгын хорооны дарга У Банго энэ сарын 31-ны өдөр манай улсад албан ёсны айлчлал хийнэ. Төрийн өндөр дээд хэмжээний айлчлалын талаар БНХАУ-аас Монгол Улсад суугаа Элчин сайд Ван Шяо Лун сэтгүүлчидтэй уулзаж, сонирхсон асуултад хариуллаа.

-Айлчлалын хүрээнд ямар ямар хэлэлцээр хийхээр төлөвлөсөн бэ?

-БНХАУ-ын БХАТИХ-ын Байнгын хорооны дарга 16 жилийн турш Монголд айлчлаагүй юм. Тэгэхээр энэ удаагийн айлчлалд ихээхэн ач холбогдол өгч, өргөн цар хүрээг хамарна гэж итгэж байгаа. Ер нь Хятад, Монгол Улс олон жилийн турш сайн харилцаатай явж ирсэн. Өнгөрсөн жил хоёр улсын худалдааны эргэлт 6.6 тэрбум ам.долларт хүрсэн. 2002 онд энэхүү эргэлт 3.2 сая ам.доллартай тэнцэж байсан.

10 жилийн хугацаанд худалдааны эргэлт 20 дахин өссөн гэсэн үг. Мөн өнгөрсөн онд 1.6 сая хүн харилцан зорчсон байна. Үүний 1.2 сая нь монгол хүн. Энэ удаагийн айлчлал хоёр орны улстөр, эдийн засгийн харилцааг шинэ шатанд гаргасан дээд хэмжээний уулзалт болно гэж найдаж байгаа. БНХАУын БХАТИХ-ын Байнгын хорооны дарга У Банго айлчлалынхаа хүрээнд Ерөнхийлөгчид бараалхаж, Ерөнхий сайдтай уулзан, УИХын даргатай хэлэлцээр хийнэ.

-БНХАУ-д Монголын хэчнээн оюутан боловсрол эзэмшиж байгаа вэ?

-6000 оюутан БНХАУ-ын нэр хүндтэй их, дээд сургуулиудад суралцаж байна. Манай Засгийн газраас монгол залуусын боловсролыг дэмжих зорилгоор жилд 400 оюутныг өөрийн орны тэтгэлгээр суралцуулдаг. Өнөөдрийн байдлаар 1000 гаруй оюутан БНХАУ-ын Засгийн газрын тэтгэлгээр суралцаж байна. Тэд Монголд хэрэгцээтэй мэргэжлээр суралцаад эх орныхоо эдийн засагт ихээхэн хувь нэмэр оруулна гэж найдаж байна.

- Хятадын "Чалко" компанитай "Эрдэнэс Тавантолгой" ХК-ийн хийсэн гэрээг Монголын талд ашиггүй болсон гэж сүүлийн үед хэвлэлээр шүүмжилж байгаа. Айлчлалын үеэр гэрээг өөрчлөх талаар ярилцах уу?

-Цаг үеийн асуудлаар гэрээ хэлэлцээр хийнэ. "Эрдэнэ Тавантолгой" компанийн "Чалко"-той хийсэн нүүрс борлуулах гэрээ нь цаг үеийн асуудал учир ярилцах байх. Гэхдээ гэрээг сайн тооцоолсны үндсэн дээр байгуулсан. Мөн урт хугацааны, тогтвортой, харилцан ашигтай, эрх тэгш байхаар хийсэн. Гарсан эрсдэлийг хамтдаа үүрнэ. Хэвлэлд Монголын нүүрсийг Хятадын "Чалко" компани хэтэрхий хямдаар авч байна гэж бичсэн.

Нүүрсний үнийг тогтоохдоо нүүрс олборлох өртөг болон дэлхийн зах зээлийн нүүрс худалдах, худалдан авах арилжаа ямар байгаа судалж харьцуулсан. Өнөөдөр "Эрдэнэс Тавантолгой" компанийн санхүү хямарсан нь Хятадын талтай ямар ч холбоогүй. Хэвлэлд бичсэнчлэн хариуцлагыг Хятадын тал хүлээх нь бодит байдалтай нийцэхгүй бөгөөд шударга бус асуудал юм. "Чалко" компани Монголын эрх ашгийг хохироогоогүй.

Д.Тэлмэн

Эх сурвалж: