sonin.mn
Сэтгэгдэл (0)

ТОКИО, 2025 оны дөрөвдүгээр сарын 4 /NHK/. Японы Осака хотноо дөрөвдүгээр сарын 13-нд нээгдэх Дэлхийн экспо үзэсгэлэнгийн үеэр 10 мянган орчим цагдаа үүрэг гүйцэтгэнэ гэж тус улсын цагдаагийн байгууллага пүрэв гарагт мэдээллээ. 


Тодруулбал, Осака мужийн цагдаагийн газрын 7800 орчим ажилтан, Японы бусад мужаас ирэх 2200 орчим алба хаагч дэг журам сахиулах ажээ. Энэ нь 2005 онд Айчи мужид болсон экспогийн үеэр 4000 орчим алба хаагч ажиллаж байсантай харьцуулахад 2.5 дахин их тоо юм. 


Осака хотод энэ оны 10 дугаар сарын 13 хүртэл зургаан сарын турш үргэлжлэх “Экспо-2025”-ыг 28 сая гаруй хүн үзэж сонирхох төлөвтэй байна. Тус үзэсгэлэнг Осака хотын Конохана тойргийн Юмешима хэмээх хиймэл арал дээр зохион байгуулах юм.


Украин, Ойрхи Дорнод дахь нөхцөл байдлын улмаас эрсдэл үүсээд буй энэ үед цагдаа нар нисгэгчгүй онгоцуудыг ашиглан терроризмтой тэмцэх цогц ажиллагааг явуулахаар төлөвлөж байна.


Экспог үзэх хүмүүс чемодан, дугуйтай цүнх зэргийг авч явахыг хориглоно. Цагдаа нар галт тэрэгний болон нисэх онгоцны буудлууд дээр дээрх журмын талаар мэдээлэл өгч байгаа ажээ. 



Э.Хулан

Эх сурвалж: "Монцамэ" агентлаг