sonin.mn
Сэтгэгдэл (39)

Украин дахь Оросын цэргийн тусгай ажиллагаа (СВО) 2 жил 11 дэх сар руугаа (1042 өдөр шөнө) орсонтой холбогдуулан мэдээллийн тэнцвэртэй байдал хангах үүднээс украины Freeдом ТВ, dialog.ua/war/ сайт, Украины Ерөнхийлөгч В.Зеленский, АНУ-ын шинэ Ерөнхийлөгч Д.Трамп, Оросын Засгийн газрын экс-дарга Михаил Касьянов, оросын сөрөг хүчний улс төрч А.Пивоваров нарын хэлсэн ярьснаас орчуулж сонирхуулъя. Энд sonin.mn сайтын байр суурь тусгагдаагүй болно.


2024 он дүнгээ гаргаж байна. Украины баатарлаг ард түмэн Путины оккупант террористуудай байлдсаар, тулалдсаар тусгаар тогтнолоо хамгаалсаар нэг оныг үдлээ. Путины улаан тахлаас Украинаа аврах тэмцэл үргэлжилсээр шинэ оноо угтлаа. Гурван өдрийн СВО (бүх зүйл төлөвлөгөөний дагуу, хатуу графикийн дагуу) үргэлжилсээр гурван жилийг туулах гэж байна.


ОХУ 2025 оныг 800 мянган цэргийн үхэл хорогдолтой угтаж байна. Украины зэвсэгт хүчний ерөнхий командлагч Александр Сырскийн хэлснээр 2024 он Украины хувьд үхэл сэхлийн хүндхэн сорилтын жил болсон бөгөөд харин Орос маш том өртөг төлж энэ оныг авлаа. Орос нийт 420 мянган цэргээ зөвхөн 2024 онд алджээ.


ОХУ бол эрчүүдээ үхлийн конвейр руу нь найдвартай илгээж, байлдуулдаг, ялуулдаг, ялагдуулдаг, бас үхүүлдэг. Энэ бол Украин дахь дайных нь гол парадокс. Оросын сөрөг хүчний улс төрч Андрей Пивоваров аргаа бараад орос эрчүүддээ хандан уриалга дэвшүүлжээ. “Мөнгөнд автаж дайнд бүү яв, энэ бодлоосоо татгалз. Хүний амь наснаас үнэтэй юм гэж үгүй. Харин Путин энэ дайнаараа Оросыг дотроос нь илт устгаж хөнөөж байна” гэжээ. Оросын ард түмний 80%, тэр ч байтугай төрийн мэдлийн судалгаа тандалтаар түүнээс ч дутахгүй хувь ирээдүйдээ итгэлгүй, эдийн засгийн байдалд таагүй хандаж байна.


Миний ойлгосноор дайныг хэн дэмжиж байна вэ гэвэл түүнээс яг бодитой мөнгө хийж байгаа тийм хэсэг л хүсч дэмжиж байна. Тэдний мөнгө цэрэг-аж үйлдвэрийн хамсалтай холбогдсон мөнгө. Мөн ойр төрөл, анд нөхдөө дайнд үхүүлснүүд өс хонзон авах гэж дайн хүсдэг. Гэхдээ ихэнхи масс амьдрал жил ирэх тусам дордож байгааг мэдэж мэдэрч байвч үүнд ёс суртахууны талаас хандаж чадахгүй байгаа нь харамсалтай.


Украин ба Барууны орнуудын харилцаанд оросууд бид нөлөөлж чадахгүй. Петербург, Москва руу беспилотник нисч ирээд, Курск мужаас дүрвэгсэд цувж байгааг хараад баярлах хэн байх вэ. Учир нь тэд бол хэлмэгдэж хохирч буй манай л иргэд. Гэхдээ Украины ард түмэнд учруулсан тэр их хүнд дарамтын дэргэд харьцуулахаар юм биш. Хэрэв Владимир Путин тэртээх хоёрдугаар сарын 24-нд дайн эхлүүлээгүй бол энэ бүх гай зовлон учрахгүй байсан шүү дээ гэж Андрей Пивоваров бичжээ.


Владимир Зеленский ярьжээ:–Дайчилгааны цэргийн насыг буулгах ёстой гэж зарим улс төрчид шахаж байна. Энэ бол маш шударга биш явдал. Хамгийн чухал нь бид хүмүүсийнхээ амийг хайрлах ёстой, бидний ирээдүйн залуу үеэ хайрлах ёстой. Орчин үеийн дайн шал өөр. Энэ бол дэлхийн нэгдүгээр дайн биш, гардан тулаан биш, нуувчин дотор буу бариад гүйлдэх биш. Энэ бол дрон, агаарын довтолгоон, алсын тусгалтай пуужин, их буу, хамгийн гол нь орчин үеийн зэр зэвсэг, оюун ухаан, технологийн тулалдаан юм. Агаарын хамгаалалтгүй ямар ч тулалдаан боломжгүй. Лидерүүд үүнийг мэдэж байгаа, гэхдээ улс төрийн тоглолт хийж болохгүй. Орчин үеийн дайн бол тэр чигтээ технологи! Тийм учраас бидэнд зөвхөн шинэ зэвсгийн лиценз, технологи хөгжүүлэх мөнгө, орчин үеийн зэвсэг л хэрэгтэй гэжээ.

 

Үнэхээр ч Украин өнөөдөр зэвсгийн технологи боловсруулалтаар дэлхийд хурдтай урагшилсан. Трамп Ерөнхийлөгчийн суудалдаа очоод Украиныг энх тайванд шахахын тул зэвсгээр туслахгүй байж магад гэдэг дээр Киевийн эрх баригчид санал нэгдсэн тул дайны технологи руу идэвхтэй шимтэн байна.

 

“Украинд өөрийн “Тризуб” хэмээх лазерын зэвсэг аль хэдийнэ бий болсон. Өнөөдөр бид хоёр км-ээс дээш өндөрт онгоц устгах чадалтай болсон хэмээн” Украины зэвсэгт хүчний нисэгчгүй онгоцны системийн хүчний командлагч Вадим Сухаревский мэдэгджээ. “Би хэрэв андуураагүй бол бид лазерын зэвсэгтэй 5 дахь улс боллоо. Украин нь “Пекло” далавчит пуужинг цувралаар үйлдвэрлэж эхэллээ” гэжээ.


The Economist мэдээлж байна. Украин нь Москва хүрэх чадалтай пуужин бүтээж байна гэсэн гарчгийн дор “Тэд 2025 оны эцэс гэхэд 3000 пуужин бөөнөөр нь үйлдвэрлэнэ гэсэн итгэлтэй байна. Нийтдээ 10 гаруй пуужингийн төсөл боловсруулж байгаагийн зарим нь бэлэн болсон. Trembita бол тэдний нэг нь юм. Trembita пуужингийн үндсэн загвар нь 400 км/цагийн хурдтай, 200 км-ийн нислэгийн зайтай боловч Москва руу нисэх боломжтой илүү том, илүү хүчирхэг загварыг яг одоо боловсруулж байна” гэж бичжээ.

 

Украины дайны ид өрнөлтийн энэ цаг үед Трампын ээлжит уриа оросын ч, украины ч анхааралд хүрэхгүй шахам болсон. Учир нь тэр улиг болтол ярьдаг. “Би Украины дайныг зогсоож, Ойрхи Дорнодод эмх замбараагүй байдлыг зогсоож, бидэнд маш ойрхон байгаа Дэлхийн III дайныг гаргуулахгүй гэдгээ амлаж байна. Би Путинтэй уулзахаар бэлтгэж байна” гэх мэт.


Украин улсыг ялагдуулж, газар нутгийг нь хүчээр өөртөө булаан авч, тэгэхдээ гурван жил өдүүлсэн цус дайныхаа ялыг үүрэхгүй, харин ч ялалт болгон тэмдэглэнэ гэж эргэлтгүй шийдчихсэн Путин ба түүний хамсаатнуудыг ухааруулна гэдэгтээ Трамп итгэсээр, гэнэнээр төсөөлсөөр байгаа бол оросын улс төрч Михаил Касьянов шал өөрөөр сөргүүлэн ярьжээ. “Путинтэй хэлэлцээ хийж болохгүй юм байна, хэлэлцээ хийх ч хэрэггүй юм байна гэдгээ хоёр, гурав, дөрвөн сарын дараа, гурав юм уу эсвэл 4 дүгээр сард Трамп ойлгох болно. Тэгээд цаашаа яах вэ? Тэгээд үү? Украинд үзүүлэх цэргийн тусламжаа нэмэх тухай шийдвэрийг л Трамп гаргаж таарна” гэжээ. Путинд бүү итгэ хэмээн түүний Ерөнхий сайд явсан нөхөр дэлхий рүү хандуулан уриалжээ гэж ойлгогдохоор.


ОХУ-ын Курск мужийн хэсэг Украины хяналтад очоод 5 сар болох гэж байна. Оросууд Курск мужаа чөлөөлөхөөр нэмэлт хүч болгон шинээр 5 механикжуулсан бригад, шүхэр-десантын 3 дайрагч бригад, тэнгисийн явган цэргийн 4 бригад, нийт 12 бригадыг тус тус бүлэглэн томхон хүч хуралдуулан Украины цэргийн бүлэглэлд цохилт өгөх гэж оролдсон ч амжилтгүй болжээ.


Бригад гэдэг нь 10-15 мянган цэрэг, зарим тохиолдолд 20-25 мянга орчим цэрэг офицер бүхий цэргийн нэгтгэлийг хэлдэг бөгөөд хээрийн армийн доторхи дивизтэй дүйнэ. Ийм том хүч аяны цуваанд явж байхдаа зарим анги нэгтгэлүүд нь хуугаараа Украины агаарын довтолгоонд өртөж, их бууны зууш болж ялагджээ. Дахин хэлье. 2025 оныг 800 мянган цэргийн үхэл хорогдолтой угтах нээ. Оросын СВО гэгчийн гурван жилийн үр дүн! Олон давтамжтай пропаганда хийгээд Украиныг Баруунтай нь хамт гутаан доромжлох гэсэн Кремлийн пропаганда боксоор бол бүрэн нокаутанд орж босох тэнхээгүй болжээ. 2024 оныг ингэж л үдэж байна!

 

Англи, орос хэлнээс хөрвүүлсэн Дүгэржавын Номиндарь