sonin.mn
Сэтгэгдэл (4)

ШИНЭ ДЕЛИ, 2024 оны арваннэгдүгээр сарын 19 /BBC/. Энэтхэгийн нийслэл Дели хотын агаарын бохирдол дээд цэгтээ хүрч, оршин суугчдын амьсгал боогдож, хот бүхэлдээ өтгөн утаанд бүрхэгдсэн байна. IQAir компанийн мэдээллээр, даваа гарагт орон нутгийн 15:00 цагийн байдлаар хэмжигч төхөөрөмжүүдэд 1500 нэгжийн бохирдлын түвшин бүртгэгдсэн нь ДЭМБ-аас тогтоосон хэмжээнээс 15 дахин их байна.


Агаарын бохирдол агаарын тээврийн хөдөлгөөнд саад учруулах болсон ба эрх баригчид сургуулиудыг хааж, хотод барилгын ажил хийхийг хоригложээ. Мөн Дели рүү нэн шаардлагатай бараа бүтээгдэхүүн тээвэрлэж буй ачааны машинуудаас бусад машиныг оруулахыг хориглож, ажилтнуудынхаа тал хувийг гэрээс нь ажиллуулахыг бүх албан байгууллагад уриалсан байна. 


Өнгөрсөн долоо хоногт Энэтхэгийн засгийн газраас онцгой байдлын албанаас бусад бүх газарт нүүрс, түлээ түлш хэрэглэх, мөн дизель генератор ашиглахыг хоригложээ. 


ДЭМБ-ын мэдээлснээр, агаарын чанарын индекс (AQI) 300-аас дээш гарсан тохиолдолд эрүүл мэндэд аюултай гэж үздэг. Даваа гаргийн өглөө Дели хотын агаарын бохирдлын түвшин 450 нэгжээс давсны дараа Энэтхэгийн Бохирдлыг хянах зөвлөл хотын агаарын нөхцөл байдлыг "ноцтой" гэсэн ангилалд оруулжээ. Жил бүрийн 10 дугаар сараас нэгдүгээр сар хүртэл Дели хот, Энэтхэгийн хойд мужууд болон Пакистаны зарим хэсэгт агаарын хэм огцом буурч, салхины хурд багассаны улмаас, мөн машины утаа, тоос шороо, ургац хураалтын дараа сүрэл шатаасны улмаас агаарын чанар эрс мууддаг. Энэ үеэр засгийн газраас агаарын бохирдолтой тэмцэх тусгай арга хэмжээг тогтмол авдаг боловч дорвитой үр дүнд хүрэхгүй байна. Энэтхэгийн хойд нутагт, нийслэлтэй хил залгаа Харьяна, Уттар Прадеш, Бихар мужуудад хяналтгүйгээр сүрэл шатаасны улмаас "эрүүл мэндэд халтай ноцтой байдал" нүүрлэж байна гэж Дели хотын захиргаа мэдэгджээ.



Д.Жаргал

Эх сурвалж: "Монцамэ" агентлаг