УИХ 18.3 тэрбум төгрөгийн киноны ваучер тараах Соёл, Спорт, Аялал Жуулчлал, Залуучуудын Сайд Ч.Номингийн "Соёлын эрхийн бичиг" санаачилгыг дэмжсэн нь нийгэмд ихээхэн шүүмжлэл дагуулаад байна.

Мордохын хазгай гэгчээр Соёл, Спорт, Аялал Жуулчлал, Залуучуудын Сайд Ч.Номингийн хийж буй тайлбар, хариу арга хэмжээ нь ч олон нийтийг эгдүүцүүлж буй юм. Жишээлбэл түүний сошиал хуудсандаа бичсэн: "Хэд хоног сэтгэл сэргэтэл сайхан балбууллаа. Номхон тэмээ ноолоход амар гэж юм л бол соёл, спортын салбарыг хэн дуртай нь ад үздэг байж таарахгүй. Хариуцсан салбараа цээжээрээ хамгаална. Монгол соёлын дархлаа, хүүхдийн хөгжлийн төлөө бол насаараа балбуулсан ч харамсахгүй" гэсэн үгс нь Ч.Номинг Соёлын салбар удирдах нь бүү хэл өөрөө наад захын соёл, хүмүүжилтэй хүн эсэхэд эргэлзэхэд хүргэж буй.

Мөн өчигдөр Соёл, Спорт, Аялал Жуулчлал, Залуучуудын Яамны Төрийн Нарийн Бичгийн Дарга А.Даваажаргал тус яамны харьяа байгууллагуудын удирдлагын хамт Төрийн ордонд хэвлэлийн хурал хийв. Тэд хурал хийх газраа сонгохоосоо л хууль, журам зөрчсөн юм.

УИХ-ын даргын 72-р захирамжаар баталсан журмын 6.2-т заахдаа Төрийн ордонд зөвхөн УИХ-ын гишүүн хэвлэлийн бага хурал хийж, түүнд нь ажлын алба болон УИХ-ын Тамгын Газрын төлөөлөл оролцож болохоор тогтоосон аж.

 Энэ мэтчилэн хурал хийх газраа сонгохоосоо л хууль, журмыг үл тоосон дээрх этгээдүүд "18.3 тэрбумын ваучер"-ыг дэмжээгүй хүн бүр Монголын дархлааны эсрэг дайсан болох утгатай дэндүү бүдүүлэг зүйлс ярьсан юм.

Хачирхалтай нь энэ мэтээр нийгэмд асар их шүүмжлэл дагуулж буй ч Ч.Номин МАН-д асар их нөлөөтэй, бяртай байгааг эх сурвалж өгүүлж байна.

Ч.Номинг МАН-д элсэж, улс төрд орох урилгыг Монгол Улсын Ерөнхий Сайд, МАН-ын дарга Л.Оюун-Эрдэнэ, УИХ-ын дарга Д.Амарбаясгалан нар өгсөн байдаг.

Мөн Ч.Номин УИХ-ын 2024 оны сонгуулийн дараа ЗГХЭГ-ийн дарга болох хүсэлтэй байсан ч Ерөнхийлөгч зөвшөөрөөгүй гэнэ. Гэсэн хэдий ч Соёлын Яамныхаа хариуцах чиглэл, эрх мэдлийг Аялал Жуулчлал, Спорт, Залуучууд гэж нэмж чадсан. Мөн 2025 оны улсын төсвийн төслөөр хамгийн их төсөв захиран зарцуулах эрхтэй сайд нарын нэг болж буй билээ.

Тэр бүү хэл Ч.Номин УИХ-ын Тамгын Газрын томилгоонд ч оролцох хэмжээний бяртай байгаа гэж эх сурвалжууд өгүүлж буй юм.

Тодруулбал түүний туслах асан Ж.Эрдэнэбаяр УИХ-ын Тамгын Газрын Парламентын Сурталчилгааны хэлтсийн даргаар, түүний хувийн "Монгол HD" телевизийн сэтгүүлч асан Э.Лхагва УИХ-ын Тамгын Газрын дэд даргаар тус тус томилогдон ажиллаж буй ажээ.

Өөрөөр хэлбэл МАН-д Ч.Номин гэдэг ихээхэн эрх мэдэлтэй, мундаг том лидер бий болсон бололтой.

Н.Оюун