sonin.mn
Сэтгэгдэл (33)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүдээс үзвэл Оросын зэвсэгт хүчин стратеги–оперативын нөөцөө бараад голдуу тактикийн нөөцөө дайчлан байлдаж байна. Энэ удаа Оросын нутагт байлдахыг хориглосноо АНУ, Британи цуцласан тухайд гадаадын мэдээнээс хөрвүүлж буулгая.

 

Их Британийн Ерөнхий сайд Кир Стармер АНУ-д айлчилж, Ерөнхийлөгч Жо Байдентай хэлэлцээ хийгээд Орос дахь байнуудыг эхлээд Storm Shadow пуужингаар цохиж болохыг зөвшөөрөв. Тэр нь украины гуйлтаар ч биш, Орос нь холбоотон Иранаасаа 200 гаруй баллистик пуужин авч, дайныг шатлан өргөжүүлэхтэй холбоотой.

 

Оросын эрх баригчид Иранаас пуужин авч Украин руу харваж үхэл тарихаа хууль ёсных, харин Украин нь АНУ, Британиас пуужин авч Оросын цэрэг-стратегийн объектуудыг харвахыг хууль бус хэмээн үзсээр, хариу элдэв аман заналхийлэл урсгасаар өнөө хүрчээ. “Мөргөлдөөний өнгө төрхийг эрс өөрчилнө”, “НАТО-гийн орнууд Оростой дайны байдалд орно гэсэн үг болно”, “Цөмийн зэвсгээр хариу барина”, “Бид айхгүй” гэх мэт Москвагаас цууриатсан мэдэгдэл цөөнгүй. Бүр улиг болсон.

 

Британид засгийн эрх солигдоод 2022 оноос Украиныг тууштай дэмжиж ирсэн консервативчууд ялагдаад цөөнхи болсон, хариуд нь социалистууд гараад ирсэн. Украинд нөлөөлөөд Оросыг дэмжэсгээд явах болов уу гэсэн нь бүр байдаггүй. АНУ-д ч ялгаагүй, Трамп гарч ирлээ гээд Орост гэгээтэй, ялалт хангуулчих итгэл алга.

 

Британийн социалист Ерөнхий сайд Стармер Оросыг ёстой хэлэх шиг болжээ. “Энэ мөргөлдөөнийг Орос эхлүүлсэн. Орос нь  Украин руу хууль бусаар довтолсон. Иймд Орос энэ мөргөлдөөнийг нэн даруй зогсоож чадна. Украин нь өөрийгөө хамгаалах эрхтэй. Украины өөрийгөө хамгаалах эрхийг бид бүрэн дүүрэн дэмжих нь илэрхий. Харин бид Оростой ямар ч мөргөлдөөнийг хүсэхгүй, тэгж мөргөлдөх нь бидний санаархал биш. Гэхдээ тэд энэ мөргөлдөөнийг өдөөсөн, Украин өөрийгөө хамгаалах эрхтэй” гэжээ. Байден, Стармер нар уулзахдаа Storm Shadow болон францын Scalp пуужингаар цохилт өгөхийг зөвшөөрсөн боловч америкийн өөрийнх нь баллистик ATACMS пуужингийн тухай юу гэсэн нь одоогоор далд байна. Путиныг хэтэрхий уурлуулчих вий, цаадхи нь уурласандаа яачих ч юм билээ хэмээн америкийн шинжээчид дооглон ярилцаж байна.


Гэхдээ украинчууд Барууны алгуурласан, Путиныг хэтэрхий уурлуулчих вий гэсэн байр суурийг шүүмжилсээр ирсэн. Хагас дутуу орхиж болохгүй, тэгвэл энэ дайнд ялахгүй. Өдөр бүр бид олон хүнийхээ амиар, олон арван эвдрэл сүйтгэлээр энэ өртгийг төлж байна. Бид илт нүдэн дээр харагдаж байгаа тэр зүйлийг л, тэсч үлдэхийн төлөө л залбиран гуйж байна. Үй олон хүний амиар ялалт байгуулна гэдэг хэтэрхий шударга бус хэмээн украины албаны хүн ярьж байна.


Харин Орос бол эсрэгээрээ олон хүний амиар, олон зуун эвдрэл сүйтгэл, зэвсэг техникийн гарздалтайгаар өндөр өртөг төлөх нь чухал биш, гол нь ялах нь л чухал. Тийм учраас Сталины үеийн маршал Жуковын фронтод туршсан махан шуурганы цэргийн номлолоосоо татгалзахгүй байлдсаар байна.

 

НАТО-гийн орнуудын хил, агаарын хилд Оросын дрон, пуужингийн хэлтэрхий уналаа, бас Путин НАТО-г алхам тутамдаа заналхийлж байна, гэтэл НАТО хөдлөхгүй байна гэсэн шүүмж дэлхийн хэвлэл мэдээлэлд олонтаа явна. Үүнд НАТО-гийн албаны хүн хариулт өгөхдөө “Бид олон улсын хууль дүрмийг хүндэтгэдэг учраас л Орост шууд цохилт өгөхгүй байгаа болохоос Оросоос айсандаа биш юм. Путин, Медведев, Лавров нар байсхийгээд л “Улаан шугам давбал хохь чинь шүү” гэдэг, одоо тэр сүрдүүлэг заналд нь оросууд нь ч итгэхээ болиод элэг доог болгож, ТВ-ийн ток-шоугаараа одоо боль гэцгээж байна. Өгсөн зэвсгээр нь ОХУ-ын нутгийн гүнд цохилт өгөхөд тавьж байсан хязгаарлалтуудаа НАТО одоо бүгдийг нь цуцлана. Тэр үед ОХУ-ын цэргийн бүх объект, нефтийн үйлдвэр баазууд, төмөр зам, авто замын зангилаанууд, гүүрнүүд, зэвсэг, сум галт хэрэгсэл, хүнд зэвсгийн үйлдвэрүүд жинхэнээсээ бүхэлдээ галд шатаж мэднэ” гэжээ.

 

Барууны пуужин байлдаанд орохоос өмнө бай-объектоо онилж зөв буудсаны эхний үр дүн гарч байна. Оросын Екатеринбург (Свердловск) дэх Росгвардийн цэргийн ангид украины дрон халдаж дэлбэлэн, өмнө нь эзлэгдсэн Украинд онц зэрлэг авирласан орос цэрэг офицеруудаас өшөөгөө авчээ.


Омск хотод оросын танкийн үйлдвэр шатаж байсныг RosSMI мэдээлсэн. “Омсктрансмаш” нь танк, галаар шүршдэг “Солнцепек” систем үйлдвэрлэдэг, тэгээд л дрондуулсан байж магадгүй.


Украинчууд дроныг 325км/цаг хурдлуулж чадаж байна. Маш их боломж цэрэг-дайны талбарт нээгдэж байна. Нисдэг тэрэг лав ямар ч хэрэггүй болж мэдэхээр байна. Покровский чиглэлд дайралт хийж буй оросын хүнд техникийн цувааг украин дронууд бүгдийг устгасан бичлэг зурагтаар үзүүлж байна. 


Эндээс юу харагдаж байна. Эрүүл ухаантай монгол хүн бол ойлгохоор болсон. Оросын үзэл суртлын тархи угаалтад төөрч будилж, Путин ялахыг хүсэн хүлээж, тэр талын суртал нэвтрүүлэг хийж, хараалаа урсгаж байгаа бол та бүтэшгүй цөхрөлөөсөө яаралтай салах хэрэгтэй. Украин, Зеленский, АНУ, НАТО-г мянгантаа харааж муулж зүхээд та сэтгэлийн таашаал аваад цаашаа юу ч байхгүй. Путин оросын байнгын цэргийн тоог 2.4 саяд хүргэх зарлигт гарын үсэг зурснаар Хятадаас илүү цэрэгтэй болох биз. Түүнд хөөрцөглөж яваа нөхөртэй таарлаа. Бөөн баяр. Украиныг өлхөн ялчихна гэсэн үг биш шүү!


Адьяaгийн Батсайхан (бэлтгэл хошууч)