sonin.mn
Сэтгэгдэл (52)

Украинд Оросын цэргийн тусгай ажиллагаа 2 жил хагас үргэлжилж, тэгэх тусмаа фронт ОХУ-ын нутагт дэвсгэрт шилжиж орж ирсэнтэй холбогдуулан мэдээллийн тэнцвэртэй байдал хангах үүднээс украины Freeдом ТВ, www.unian.net/war сайт, оросын The Moscow Times, мөн The Telegraph сонины мэдээнээс орчуулж сонирхуулъя. Энд sonin.mn сайтын байр суурь тусгагдаагүй болно.



Дэлхий даяараа Оросыг үзэн ядаж, ялагдулахыг хүсч байгаа нь нууц биш. Орост Путины эсрэг үзэн ядалт дээд цэгтээ тулсан нь бас нууц биш. Украины эсрэг дайнд амь үрэгдсэн орос цэргүүдийн гэр бүл, үр хүүхэд, хамаатан садан гэхэд л хэдэн сая давна. Яг л тэсрэхээ хүлээн хэзээ мөдгүй дэлбэрэх гэж байгаа тэсрэх бөмбөг мэт Орос орон дэнжигнэнэ. Курскийг хамгаалан байлдахгүй, бууж өгцгөөж, цэрэг нь замбараагаа алдаж, генералууд нь Путингээ мэхлэнэ.



ОХУ-ын хамгийн баян хүмүүсийн нэг, тэрбумтан олигархи Олег Дерипаска АПЕК-ийн ажлын уулзалтад оролцонгоо японы хэвлэлд өгсөн ярилцлагадаа Путины цэргийн тусгай ажиллагааг солиорол, ёстой галзуу явдал хэмээн нэрлэж, дайн өдөөснөөр оросын зардал асар их хэмжээгээр нэмэгдснийг шүүмжлэн, нэн даруй дайнаа зогсоохыг эрх баригчдаасаа шаарджээ. Энэ нь 2022 онд Орос түрэмгийллээ эхлүүлснээс хойш Путины элит, төрийн дээдчүүл, нийгмийн дээд хэсгийнхний дотроос дайнаа зогсоохыг шууд уриалан дуудсан анхны тохиолдол боллоо. Оросын армийг гутаавал дор хаяж 15 жил гэсэн ял Дерипаскад хамаатай эсэхийг харах л үлдлээ.

 

В.Зеленскийн албан ёсны мэдэгдэл: Украинд дайн авчирсан түрэмгийлэгч Орост хэдий чинээ дарамт шахалт үзүүлэх тусам энх тайван ойртох болно. Фронтын шугам болон түрэмгийлэгчдийн довтолгооноос хамгаалах ажиллагаа үргэлжилсээр байгаа, “янз бүрийн байршил”-д тулалдаж буй украины цэрэг дайчдад талархал илэрхийлэе! Би Украины армийн авч хэрэгжүүлж буй арга хэмжээ, алхмуудын талаар зэвсэгт хүчний ерөнхий командлагч Александр Сирскийтэй ярилцсан гэжээ.


Ингэхэд украин үндэстэн гурван жил зууралдан тулалдсаны эцэст асар их туршлага хуримтлуулан, цэрэг зэвсэг сайтай армитай болжээ. Эх орноо хамгаалан байлдахын сацуу өнгөрөгч 7 хоногоос түрэмгийлэгч Оросын нутаг дэвсгэрт цөмрөн орж байлдаж байна.

 

Харьцуулалт байна. Украины арми ганц далайлтаар Оросын гүн рүү 40 км давшсан бол Оросын арми сүүлийн 2.5 жилд Донбасст ердөө 32 км нэвтэрч чаджээ. ОХУ-ын Курск муж дахь атомын цахилгаан станцаас 70 км-ийн зайд Украины зэвсэгт хүчин бараг эхний өдөртөө очиж байрласан бол одоо 30 км зайтай тулж ирсэн, зарим мэдээгээр эзлэн авсан байдалтай байна. Украины зэвсэгт хүчин Суджа хот дахь байгалийн хий дамжуулах хэмжих станцыг хянаж байна гэж оросын Z сувгууд хоолой мэдэн хашгачина. Курск мужид 300 орчим орос цэрэг бууж өгсөн тухай оросын ба гадаадын сувгууд зэрэг зэрэг мэдээлжээ. Оросын цэргийн бие бүрэлдэхүүний урам зориг муу, байлдааны туршлагагүй, зүгээр л окопонд мануухай болгон суулгахаар явуулсан тул тулалдах хүсэл ч тэдэнд алга гэж анхааруулна.


Гадаадын цэргийн шинжээчид ганц л дүгнэлт хийжээ. Юу ажиглагдав гэвэл тэд нутагт нь дайн дэгдвэл шууд ялагдах юм байна. Дайн эхэлсээр анх удаа тэдний нутагт Украин ухаалгаар давшлаа. Курскт оросууд маш их паникт орсон нь харагдав. Өөрсдийнхөө тосгон сууринд бөмбөг хаях ч хэцүү, буруу тийшээ ч галлатай биш, зугтаах, бууж өгөх, учраа олохгүй гүйлдэх, зэвсэг агсан эх орноо хамгаалах нь бүү хэл нэрлэж ч мэдэхгүй хугацаат албаныхан зорилгоо мэдэхгүй сандчин гүйлдэх бичлэгүүд сайтуудаар дүүрэн. Хэт том амлаж худлаа ярьдаг, худлаа хийрхдэг, жүжиглэдэг, хоосон занадаг оросын эрх баригчид, кремлийн суртал нэвтрүүлэгчдийнх нь дүр төрх л илүү харагдаж байна гэжээ.

 

Аргаа барсан Путин Купянск, Северск, Угледарын чиглэлээс цэргийн ангиудаа Курск руу шилжүүлэхээр татлаа. Ингэхэд Украин яах гэж Курск руу нь давшин орсон бэ гэвэл зорилго нь тодорхой. Фронт дээр ялангуяа Часов Яр, Торецк, Покровское чиглэлд Оросоос нэмэлт хүч илгээхгүйгээр хилийн бүс рүү нь анхаарлыг нь татах, нөөцөө тийш нь шилжүүлэхээс аргагүй байдалд оруулах, болж өгвөл хүчийг нь тарамдуулах. Фронтын хэд хэдэн шугамд байлдааны цагийн байдлыг ажвал зарим газарт оросууд суларч шугамаа орхиж, нэгийн зэрэг газарт шинээр довтолгооны шугам нээхийг оролдож, зарим нэг газарт украинчуудыг ухраах, бүслэх оролдлого хийсэн ч амжилтгүй байна. “Россия 1” ТВ-ийн сувгаар Курскийн АЦС-д 45 км зайтай украины арми тулж ирснийг мэдээлэхдээ, “Тэд энэ АЦС-ыг барьцаалж Запорожийн АЦС-аас оросын цэргийг гаргах махинац хийж байна. Хэрэв АЦС-ын ажиллагааг зогсоовол Орос маш том хохирол амсана” гэв.


Курск мужид явагдаж буй гурав дахь өдрийн байлдааны тоймд ингэж бичжээ:


  • Украины цэргүүд Курскийн нутаг дэвсгэрт 40 км гүн нэвтэрсэн.
  • Ганц өдөр 70-80 орос цэрэг олзлогдсон. Нийт 300 хүн олздлогдоод байна.
  • Суджа хот Украины цэргийн хүчний хяналтад байна.
  • Тулалдаан Кореневогийн ойролцоо, Суджагийн хойд талд, Мартыновкад өрнөж байна.
  • Льговахо хотоос 15 км, Курчатовоос (АЦС байрладаг) 30 км зайд тулалдаан болж байна.
  • Украинчууд Курскт 11 тосгон суурин эзэлж, Суджаг бүрэн хяналтдаа авсны дараа Герасимов тэднийг удалгүй бут цохино гэж амласан. Гэвч украины цэргүүд Курск муж руу дахин 10 км-ийн гүнд нэвтрснийг Z-цэргийн сурвалжлагч нар халаглан ярьцгаана.
  • Курскт украинчуудад олзлогдсон 80 орос цэрэг Зеленскийд хандан Украины иргэншил олгохыг хүсч олзлогдогсдын солилцоонд хамруулахгүй байхыг гуйжээ. Бүгд Украины талд байлдахад бэлэн гэдгээ илэрхийлэв гэж мэдээлжээ.


Украин нь 48 цагийн дотор 2023 оны зун хийсэн сөрөг довтолгооноосоо илүү их газар нутгийг эзлэн авлаа хэмээн “The Telegraph” онцолжээ. Үүнд хэд хэдэн гол зорилго тавьсан байж болох магадлалтай.

 

  1. Оросын цэргийг Донецк мужаас гаргах.
  2. ОХУ-д сэтгэл зүйн дайралт өгч, цөхрөлд оруулах.
  3. Цаашид хийх хэлэлцээний бэлтгэл болгож, нутаг дэвсгэрээ солилцох гэрээнд бэлтгэх.
  4. Курскийн АЦС-ыг нь Запорожийн АЦС-аараа солих.
  5. Оросоос Европ руу нийлүүлэх бүх хийг тасалдуулж Оросын эдийн засагт ноцтой нөлөөлөх гэх мэт таамаглал бичжээ.

 

Таамаглал биеллээ олж эхэллээ. Өчигдөр, 8 дугаар сарын 11-ний байдлаар Курскийн АЦС дээр Украины далбаа мандаж, Украины арми давшсаар Белгородын хил давав. Брянск руу довтолсон мэдээ ирж байна. 


Украинчууд Курскт амжилттай байлдсаныг тайлбарлах өөр аргумент байна. Оросууд Луганск, Донецк, Запорожийн чиглэлд зай завсаргүй нуувч ухсан, минажуулсан болохоор Украин шууд довтлоход бэрхшээлтэй. Тиймээс Оросын мужуудыг эзлэж аваад өөрсдийн газар нутгаар солилцох замаар дайныг дуусгах төлөвлөгөө рүү шилжиж байж болох юм. Курск зөвхөн эхлэл нь. Курск ийнхүү баларч байх хойгуур С.Шойгу Иранд гэнэт айлчилж, ИЛ-76 онгоцоор баахан пуужин зөөж аваачаад дайнд бэлтгүүлэв. Ятгалга хийж байгаад Израиль, Америктай Ираныг байлдуулаад Ойрхи Дорнодыг дуусашгүй дайнд татан оруулчихвал Украины фронтоос дэлхий дахин анхаарлаа холдуулж, бас АНУ, Баруун зэр зэвсгээ Украинд өгөхөө болино, зөрүүлээд Орос Украиныг цохино, ялна гэсэн тооцоо Кремльд хийжээ. Гэвч үр дүнд хүрэхгүй бололтой. Иран нь хүссэн зоргоор нь тэгж байлдахгүй, байлдвал өөрсдөө годройтож ойчно, барууны ба жүүдийн зэвсгийн технологи олон дахин хэтрээд хөгжчихсөн, тиймээс өөртөө үхэл дуудахгүй гээд гүрийчихсэн байдалтай байна.


Англи, opoc хэлнээс хөрвүүлсэн Дүгэржавын Номиндарь