sonin.mn
Сэтгэгдэл (48)

Украин дахь Оросын цэргийн тусгай ажиллагаа (СВО) бүтэн 2.6 жил буюу 900 орчим хоног тасралтгүй үргэлжилж байгаатай холбогдуулан мэдээллийн тэнцвэртэй байдал хангах үүднээс украины Savromat History, t.me/uniannet гэх хоёр сайт, мөн оросын The Moscow Times сонины мэдээнээс орчуулж сонирхуулъя. Энд sonin.mn сайтын байр суурь тусгагдаагүй болно.


Урьд социализмын үед Зөвлөлт нь нэр хүнд, хүч, нөлөөллөөрөө эргэн тойрныхоо социалист жижиг орнуудыг гартаа атган, хүссэн зоргоороо дарамтлан явсан түүх өнөөгийн оросуудад бат зууралдаастай үлджээ. Зөвлөлтийн үеийн уудам орон зайгаа санагалзаж шунан тэчъяадаж буй илрэл нь Украинд амжилтгүй явуулж буй энэхүү цэргийн тусгай ажиллагаа гэдгээс нь илт харагдана. Үй олон цэргээ мянга мянгаар нь хядуулаад хаширдаггүй. Заавал ялна дийлнэ, буулгаж авна гэсэн сэтгэхүйн дон шүглэчихээд зогсох шинжгүй.



Путин үнэхээр ахиад 6 жил засаглаж чадвал, бас оросуудын хүссэнээр Трамп ялах нь үнэн бол хагас жилийн дараа гэхэд Путин Трампын тусламжтайгаар Украиныг хэлэлцээнд тулгаж суулгах ба дайнаа одоогийн галын шугамаар зогсоож чадвал 2025 оны хавраас Гүрж, Армен юм уу, эсвэл Казахстан руу руу халдана. Гал зогсоохоос өмнө Одесс хотын зүг 2024 ондоо багтааж шинэ дайралт хийж шинэ газар нутаг эзлэн, Украиныг Хар далайгаас таслахаар оролдох болно. Гэвч Трамптай нь Франц, Их Британи, Польш, магадгүй Герман, бүр Европын Холбоо бүхэлдээ санал нийлэхгүй, тэд Украинд туслахаа зогсоохгүй тул Путины төлөвлөгөөний биелэлт бүтэлгүйтэн сунжирна. Украинд туслаагүй, мөн Оростой хуйвалдсан шалтгаанаар Трамп өөрөө огцорч магадгүй хэмээн t.me/uniannet сайтад оросын нэг блогер бичжээ.


The Moscow Times-ын мэдээ. Орос дахь амралт сувилалууд оросуудын 80%-д боломжгүй болсон ба дотоодын аялал жуулчлалын үнэ тэнгэрт хадсанаас хойш иргэдийн дийлэнх нь эх орондоо амарч зугаалж чадахгүй болсон. Дээрээс нь Өмнөд Орос, Баруун Орост үе үе украины дрон халдаж, нефтийн байгууламжуудаас эхлээд том том үйлдвэр, цэргийн үйлдвэрүүдийг онилон дэлбэлж шатааж байгаагаас оросын жирийн иргэд тайван суух сэтгэл зүйгүй боллоо. Оросын эдийн засгийн хямрал бугшсаар тэсрэлт рүүгээ дөхөж явна. Орост үндсэн бүтээгдэхүүний үнэ огцом өсч, инфляцаасаа хол давж гарлаа. 2024 оны зун өндөг 42%, гадил жимс 48%, улаан лооль 39.5%, манжин 53%, алим 33%, төмс 25% тус тус өссөн дүнтэй байна. Инфляц одоогоор 9.2 хувьтай, Орост сүйрэл ирж байна гэжээ.


Орос нь Украинд халдан түрэмгийлж, нацистуудаас нь тэр улсыг чөлөөлнө гэж байлдаад хоёр жил хагасыг туулахдаа 7 том алдаа гаргажээ хэмээн Savromat History сайтад жагсаав: 


1. Украин руу халдах шийдвэр нь эхний том алдаа байсан ба энэ шийдвэр Оросын ирээдүйг булшиллаа. 2022.02.24-нд дайн эхлүүлснээрээ Орос шууд л ялагдсан. Одоо ОХУ-ыг булшилна. Оросын төрт улс 500 жил оршин тогтносон. Одоо булшлагдана. 

2. Дайны эхний үе шатанд Оросын амссан их хохирол, украинчуудын баатарлаг эсэргүүцэл тов тодорхой хэлээд өгсөн. Оросын хохирол, зарлага, зардал хэрээсээ хэтэрсэн. Үүнийг цаг тухайд нь зогсоож чадаагүй. Ах дүү садан хоёр үндэстэн үүрдийн дайсан болцгоосон. Хорват-Сербиүдийн хоорондын харьцаанаас ч дордсон. Орос, Украин хоёр мөддөө эвлэрэхгүй. Энэ бол хоёр дахь том алдаа.

3. Орос орон дорно зүг рүү эргэснээрээ маш том алдсан. Европын Орос биш болсон. Европ руу харах цонх ч үгүй болсон. Хөгжлөөрөө Европыг хөөж гүйцэх нь бүү хэл Хятадыг ч бараадахгүй хол хаягдсан. Хятадын эдийн засгийн колони болох замдаа орсон. Технологийн хувьд Орос нь хоёрдугаар сортын орон. Хоёрдугаар эгнээний орон. Одоо гуравдугаар сортын, гурав дахь ертөнцийн орон болж байна.

4. Эдийн засаг-санхүүгийн хувьд 300 тэрбум ам.доллараа баруунд үүрд алдсан. Оросын банкны асар их актив алдагдсан. Санхүүгийн ийм их хохирол түүхэндээ Орос амсаж байгаагүй. Эдийн засаг нь тэсэхгүй болсон.

5. Дайчилгаа явуулах төрийн механизм нурсан. Дайчлагдсан цэрэгт мөнгө төлж хөлсний арми болгосон нь стратегийн маш том алдаа. Оросын арми, оросын генералитет үүнд бэлэн байгаагүй. Хөлсний арми хэзээ ч хаана ч ялалт байгуулж байгаагүй. Ийм арми нурж унах нь ойлгомжтой. Хэн тэднийг фронт руу илгээсэн, тэдэн рүүгээ зэвсгээ эргүүлэх нь жам юм. Хөлсний арми нь Путины дэглэмийг булшлагч болж хувирна.

6. Умард потокийг дэлбэлж, байгалийн хийн зах зээлээ бүрмөсөн алдсан явдал маш том алдаа. Европыг хийгээр боймлох гэсэн биш өөрсдөө маш том алдаа гаргасан. ГАЗПРОМ өөрийгөө хорлосон. Одоо үхдэл болсон.

7. Стратегийн бас нэг том алдаа бол дотооддоо оросын фашизмд боломж гаргаж толгойг нь өндийлгөж өгсөн явдал юм. Оросын национализм, Оросын фашизм бол Путины өөрийнх нь дайсан. Оросын үндэсний цөөнхи дайнд ихээхэн хохирлоо. Тэд оросын национализм, фашизмын эсрэг босч ирэх нь гарцаагүй гэжээ.



Оросын ТВ-үүдийн элдэв ток-шоу нэвтрүүлгээр эвгүй эвгүй асуулт тавигдсаар. Ерөөсөө юуны төлөө Украинд хоёр жил хагас байлдав, яах гэж, юу хожих гэж ийм их цэргээ алдав, хэнд хэрэгтэй юм, Орост нутаг дэвсгэр багадлаа гэж үү гэхчлэн. Нэг нөхөр сайтад бичлэг оруулан “Бид нафталины маразматик үзэл санааны төлөө, мөнгөний төлөө л байлдаж байна” гэв.


Savromat History сайтын өөр нэг постод нэгэн блогер дээрхи 7 жагсаалтыг 16 болгож, яах гэж, юу хожих гэж ийм их цэргээ алдав, хэнд хэрэгтэй юм гэдэгт хариу бичжээ. 


1) НАТО-той хиллэдэг Оросын хуурай газрын хил хоёр дахин тэллээ;

2) НАТО-г сэргээж, бүр хөгжүүлж өгөв; 

3) Украиныг Европ дахь хамгийн их зэвсэглэсэн улс болгож хувиргав; 

4) Ертөнцийн хэдхэн диктатор, шаарнуудаас өөр бүх холбоотноо алдлаа; 

5) АНУ, Европт 300 тэрбум долларын алтны нөөцөө булаалгав; 

6) Нефть байгалийн хийн зах зээлээ АНУ, ОПЕК-т бараг шагналаар өгчихлөө;  

7) Энэтхэгтэй нефтиэ гадил жимсээр наймаалж байна; 

8) Төсвийн хямрал нүүрлэлээ; 

9) Хятадын вассаль болж хувирлаа; 

10) Хамгийн ухаалаг, авьяаслаг иргэдээ ОХУ эмиграцаар хил давуулж алдлаа; 

11) Эрүүгийн гэмт хэрэгтэн, маньяк гаж донтонгууд Орост эрх чөлөөтэй боллоо;  

12) Фронтоос буцаж ирсэн тархины, сэтгэхүйн гэмтэлтэй цэргийнхэн хүн амдаа аюул болж хувирлаа; 

13) Ойрын 50 жилдээ 15 000 санкцын зовлон амсах боллоо; 

14) Украинд асар их дайны төлбөр төлнө. Репарац өдрөөс өдөрт хуримтлагдан байна; 

15) Хар тэнгисийн флот устгагдлаа; 

16) Дэлхийн хоёр дахь том арми бүх дэлхийгээр сум галт хэрэгслийн гуйлганд гарлаа гээд “Энэ бүхэн бүгд төлөвлөгөөнийхөө дагуу явагдаж байна!” гэжээ.


Англи, орос хэлнээс хөрвүүлсэн Дүгэржавын Номиндарь