Дэлхийн худалдааны тогтвортой байдал, технологийн дэвшил, олон улсын бизнесийн хамтын ажиллагааг нэг дор зангидсан Canton Fair үзэсгэлэн худалдаа 70 жилийн түүхэн ойгоо тэмдэглэж байна. Хятадын импорт, экспортын үзэсгэлэн худалдаа хэмээх албан ёсны нэртэй энэхүү арга хэмжээ нь зөвхөн бараа бүтээгдэхүүн худалдах, худалдан авах талбар төдийгүй дэлхийн үйлдвэрлэл, нийлүүлэлтийн сүлжээ, инновац, эдийн засгийн хамтын ажиллагааг өргөжүүлэх стратегийн чухал гүүр болон хөгжөөд байна.

Дэлхийн худалдааны түүхэнд өөрийн байр суурийг эзэлсэн 70 жил

2026 оны аравдугаар сарын 15-наас арваннэгдүгээр сарын 4-ний хооронд БНХАУ-ын Гуандун мужийн төв Гуанжоу хотод зохион байгуулагдаж буй 140 дэх удаагийн “Canton Fair” үзэсгэлэн нь тус арга хэмжээний 70 жилийн ойтой давхцаж байгаагаараа онцлог юм. Уг үзэсгэлэн худалдааг жилд хоёр удаа буюу хавар болон намрын улиралд зохион байгуулдаг билээ.

БНХАУ-ын дарга Ши Жиньпин үзэсгэлэнгийн 140 дэх удаагийн арга хэмжээнд илгээсэн баярын захидалдаа Canton Fair нь байгуулагдсан цагаасаа хойш Хятад болон бусад улс орны худалдааны харилцааг хөгжүүлэхэд чухал үүрэг гүйцэтгэж ирснийг онцолжээ. Түүнчлэн тус үзэсгэлэн нь Хятадын нээлттэй хөгжлийн бодлогыг өргөжүүлэх, нээлттэй дэлхийн эдийн засгийг цогцлоох үр дүнтэй талбар болсныг тэмдэглэсэн байна.

1957 оны дөрөвдүгээр сард ердөө 9,600 хав.дөр.метр талбайд зохион байгуулагдаж, 1,200 худалдан авагчийг хүлээн авч байсан Canton Fair өнөөдөр 1.55 сая хав.дөр.метр талбайг хамарч, 220 гаруй улс, бүс нутгаас 310,000 орчим худалдан авагчийг татдаг дэлхийн худалдааны томоохон төв болжээ. Энэ удаагийн үзэсгэлэнд 30,000 гаруй компани оролцож, 340,000 орчим гадаадын худалдан авагч хүрэлцэн ирнэ гэж тооцоолжээ.

Анхны үзэсгэлэнгээс өнөөг хүртэл 140 удаа тасралтгүй зохион байгуулагдсан энэхүү арга хэмжээ нь Хятадын гадаад худалдааны хөгжлийг төдийгүй дэлхийн зах зээлтэй харилцах харилцаа нь хэрхэн өргөжсөнийг илтгэх бодит жишээ юм.

Худалдааны уулзалтаас дэлхийн бизнесийн сүлжээ хүртэл

Canton Fair-ийн хамгийн том давуу тал нь дэлхийн өнцөг булан бүрийн үйлдвэрлэгч, экспортлогч, импортлогч, худалдан авагчдыг нэг дор холбож, урт хугацааны бизнесийн харилцаа тогтоох боломж бүрдүүлдэгт оршино.

Энэхүү үзэсгэлэн худалдаа нь дэлхийн олон улс орны компаниудын хувьд Хятад хэмээх том зах зээлд хөл тавьж, бизнесээ сурталчилж, бизнесийн шинэ хамтрагчдыг олж, өргөжин тэлэх чухал боломж юм.

Өөрөөр хэлбэл, оролцогч компаниудын хувьд Canton Fair-ийн үнэ цэнэ нь зөвхөн тухайн үеийн борлуулалтаар хэмжигдэхгүй бөгөөд найдвартай нийлүүлэгч олох, шинэ зах зээлд нэвтрэх, бүтээгдэхүүний шаардлага болон хэрэглэгчдийн хэрэгцээг ойлгох, урт хугацааны хамтын ажиллагаа эхлүүлэх бодит боломж билээ.

2007 онд 101 дэх удаагийн үзэсгэлэнгээс эхлэн импортын хэсгийг нэвтрүүлснээр Canton Fair нэг чиглэлтэй экспортын талбараас хоёр талын худалдааг дэмжих платформ болон өргөжсөн. Харин 2021 онд цахим болон танхимын хэлбэрийг хослуулснаар газарзүйн байршлаас үл хамааран илүү олон бизнес эрхлэгчийг хамруулах боломж нэмэгджээ. Өнөөдрийг хүртэл үзэсгэлэнд танхимаар болон цахимаар оролцсон гадаадын худалдан авагчдын нийт тоо 10 сая давсан байна.

Инновац, ногоон хөгжил, ухаалаг үйлдвэрлэлийн шинэ эрин

Canton Fair-ийн хөгжлийг тодорхойлж буй бас нэг чухал чиглэл бол технологи, инновац, нэмүү өртөг шингэсэн үйлдвэрлэл юм.

Эхний жилүүдэд хөдөө аж ахуйн болон өргөн хэрэглээний бүтээгдэхүүн худалдаанд голлох байр суурь эзэлж байсан бол өнөөдөр хиймэл оюун ухаан, аж үйлдвэрийн интернет, үйлчилгээний робот, дрон, эрчим хүчний шинэ үеийн хуримтлуур, өндөр хүчин чадлын чип зэрэг дэвшилтэт технологиуд үзэсгэлэнгийн анхаарлын төвд байна.

140 дэх удаагийн үзэсгэлэнгийн эхний үе шат нь дэвшилтэт үйлдвэрлэлд төвлөрч, ирээдүйн хөгжлийн чиг хандлагыг тодорхойлох 17 төрөлжсөн үзэсгэлэнгийн бүсийг багтаажээ. Үзэсгэлэнд оролцогч компаниудын 64 хувь нь аж үйлдвэрийн интернет, хиймэл оюун ухаан зэрэг шинэ технологи нэвтрүүлсэн бол шинэ бүтээгдэхүүний эзлэх хувь 23.2 хувьд хүрч, өмнөх үзүүлэлтүүдээс өссөн байна. Мөн ногоон буюу байгаль орчинд ээлтэй бүтээгдэхүүний эзлэх хувь 26 хувьд хүрчээ.

Үүнээс гадна 700 гаруй шинэ бүтээгдэхүүний танилцуулга зохион байгуулахаар төлөвлөсөн нь Canton Fair бүтээгдэхүүн дэлгэн үзүүлэх уламжлалт арга хэмжээнээс инновацийг олон улсын зах зээлд нэвтрүүлэх, хэрэглэгчдийн эрэлт хэрэгцээг судлах, шинэ технологийн хэрэглээг таниулах чухал талбар болсныг илтгэнэ.

Эдгээр өөрчлөлт нь Хятадын үйлдвэрлэл зөвхөн их хэмжээний бараа бүтээгдэхүүн үйлдвэрлэхэд бус, технологийн шинэчлэл, чанар, бүтээмж, байгаль орчинд ээлтэй шийдэлд улам бүр анхаарч байгааг харуулж байна.

Дэлхийн үйлдвэрлэл, нийлүүлэлтийн сүлжээний чухал түшиг

Өнөөгийн дэлхийн эдийн засагт бараа бүтээгдэхүүний худалдаанаас гадна үйлдвэрлэлийн тасралтгүй ажиллагаа, түүхий эд, эд анги, тоног төхөөрөмжийн найдвартай нийлүүлэлт онцгой ач холбогдолтой болсон. Энэ нөхцөлд Canton Fair нь үйлдвэрлэгчдийг худалдан авагчидтай холбохоос гадна улс орнуудын үйлдвэрлэлийн чадавхыг харилцан нөхөхөд хувь нэмэр оруулж байна.

Хятадын аж үйлдвэрийн өргөн суурь, үйлдвэрлэлийн иж бүрэн тогтолцоо нь үндсэн эд ангиас эхлээд өндөр технологийн тоног төхөөрөмж, үйлдвэрлэлийн нэгдсэн шийдэл хүртэлх олон төрлийн бүтээгдэхүүн нийлүүлэх боломжийг бүрдүүлдэг. Ийм чадавх нь бусад улс орны үйлдвэрүүдэд үйлдвэрлэлээ шинэчлэх, автоматжуулалтыг нэмэгдүүлэх, олон улсын нийлүүлэлтийн сүлжээнд нэгдэхэд дэмжлэг үзүүлдэг.

Үзэсгэлэнд оролцож буй 32,000 компанийн бараг 20 хувь нь гадаадын зах зээлд хөрөнгө оруулалт хийж, хүлээн авагч орнууддаа нийт 200,000 гаруй ажлын байр бий болгосон гэх мэдээлэл нь Canton Fair-тэй холбоотой бизнесийн харилцаа олон улсын үйлдвэрлэл, үйлчилгээний бодит үйл ажиллагаа болон өргөжиж байгааг мөн илтгэж байна.

Ийнхүү Canton Fair нь зөвхөн захиалга авах, бүтээгдэхүүн борлуулах талбар бус, гадаад зах зээлд үйлдвэрлэл, үйлчилгээ, борлуулалтын сүлжээ бий болгох боломж бүрдүүлдэг платформ болжээ.

Хятадын зах зээл - дэлхийн бизнес эрхлэгчдийн шинэ боломж

Canton Fair-ийн ач холбогдлын нэг хэсэг нь Хятад улс дэлхийн томоохон үйлдвэрлэлийн төв байхын зэрэгцээ импортын эрэлт хэрэгцээ өсөн нэмэгдэж буй зах зээл гэдгээ улам бүр бататгаж байгаад оршино.

Үзэсгэлэнгийн импортын хэсэгт олон улс орны компаниуд бүтээгдэхүүнээ танилцуулж, Хятадын хэрэглэгчид болон үйлдвэрлэгчдэд хүргэх боломжтой.

Хятадын Гаалийн ерөнхий газрын мэдээллээр, 2026 оны эхний гурван улиралд тус улсын импорт өмнөх оны мөн үеэс 22.3 хувиар өссөн нь экспортын өсөлтөөс 5.9 нэгж хувиар өндөр үзүүлэлт аж. Энэ нь Хятадын дотоодын үйлдвэрлэл, хэрэглээний эрэлт болон гадаад зах зээлээс бүтээгдэхүүн татах хэрэгцээ нэмэгдэж байгааг илтгэж байна.

Мөн 2026 оны тавдугаар сарын 1-нээс Хятад улс дипломат харилцаатай Африкийн 53 оронд тэг тарифын бодлого нэвтрүүлсэн бөгөөд ингэснээр энэ бодлогод хамрагдаж буй орнуудын нийт тоо 63 болсон байна. Эдгээр орноос хийсэн импорт эхний гурван улиралд 867.53 тэрбум юаньд хүрч, өмнөх оны мөн үеэс 15.3 хувиар нэмэгджээ.

Ийм нөхцөлд Canton Fair нь гадаадын үйлдвэрлэгчид, экспортлогчдод Хятадын зах зээлд нэвтрэх, бүтээгдэхүүнийхээ эрэлтийг тодорхойлох, Хятадын худалдан авагчидтай шууд харилцах чухал боломж олгож байна. Нөгөө талаас, Хятадын компаниуд ч гадаадын шинэ бүтээгдэхүүн, технологи, нийлүүлэгчидтэй танилцаж, бизнесийн харилцаагаа өргөжүүлэх боломжтой.

Нээлттэй дэлхийн эдийн засгийн төлөөх хамтын ажиллагаа

Дэлхийн худалдаанд нийлүүлэлтийн сүлжээний тасалдал, зах зээлийн тодорхойгүй байдал, технологийн хурдтай өөрчлөлт зэрэг сорилт тулгарч буй энэ үед Canton Fair үзэсгэлэн худалдааны үүрэг роль улам бүр өргөжиж байна.

БНХАУ-ын дарга Ши Жиньпин баярын захидалдаа Хятад улс дэлхийн улс орнуудтай хамтран олон талт худалдааны тогтолцоог хамгаалах, дэлхийн үйлдвэрлэл, нийлүүлэлтийн сүлжээний тогтвортой байдлыг хангах, харилцан ашигтай олон улсын эдийн засаг, худалдааны хамтын ажиллагааг өргөжүүлэхэд бэлэн байгааг онцолсон юм.

Энэ байр суурь нь Canton Fair-ийн 70 жилийн хөгжлийн үндсэн чиг хандлагатай уялдаж байна. Тус үзэсгэлэн нь худалдааны түншүүдийг холбохын зэрэгцээ улс орнуудын зах зээл, технологи, үйлдвэрлэлийн чадавхыг харилцан нөхөх боломж бүрдүүлдэг. Тиймээс түүний ач холбогдлыг зөвхөн үзэсгэлэнгийн талбайн хэмжээ, оролцогчдын тоо, байгуулсан гэрээний дүнгээр хэмжих боломжгүй. Харин олон улсын бизнесийн итгэлцэл, урт хугацааны түншлэл, инновацийн солилцоо, нийлүүлэлтийн сүлжээний уялдаа холбоонд оруулж буй хувь нэмрээр нь үнэлэх нь зүйтэй.

Canton Fair-ийн 70 жилийн түүх бол Хятадын гадаад худалдааны хөгжлийн түүх төдийгүй дэлхийн эдийн засаг хэрхэн харилцан хамааралтай болж, худалдаа технологи, үйлдвэрлэл, хөрөнгө оруулалттай нягт уялдаж ирсний илэрхийлэл юм.

1957 онд 1,200 худалдан авагчтай эхэлсэн энэхүү үзэсгэлэн өнөөдөр олон арван мянган компанийг нэгтгэж, дэлхийн 220 гаруй улс, бүс нутгийн бизнес эрхлэгчдийг холбосон олон улсын худалдааны томоохон платформ болон хөгжөөд буй нь худалдааны бодит эрэлт, шинэ технологи, үйлдвэрлэлийн чадавх, зах зээлийн боломжийг нэг дор уулзуулж, олон улсын хамтын ажиллагааг өргөжүүлэх боломжтойг харуулж байна.

Ирээдүйд дэлхийн худалдааны өрсөлдөх чадвар зөвхөн хямд өртгөөр бүтээгдэхүүн нийлүүлэхэд бус, инновац, чанар, ногоон хөгжил, найдвартай нийлүүлэлт, урт хугацааны түншлэлд улам бүр тулгуурлах төлөвтэй. Энэ нөхцөлд Canton Fair нь дэлхийн бизнес эрхлэгчдэд шинэ зах зээл нээх, үйлдвэрлэлээ хөгжүүлэх, технологи нэвтрүүлэх, харилцан ашигтай хамтын ажиллагаа бий болгох боломж олгосон хэвээр байх юм.

Тиймээс Canton Fair-ийг энгийн нэгэн үзэсгэлэн худалдаа гэж үзэхээс илүүтэйгээр дэлхийн эдийн засгийг холбосон, худалдааны боломжийг бодит хамтын ажиллагаа болгон хувиргах, улс орнуудын хөгжил цэцэглэлтэд хувь нэмэр оруулах олон улсын стратегийн чухал талбар хэмээн тодорхойлж болно.