sonin.mn
Сэтгэгдэл (17)

УИХ-ын гишүүн С.Цэнгүүн сэтгүүлчдийн асуултанд хариуллаа.


Тэрээр: "Хоёр жилийн хугацаанд маш олон хүнийг шинээр сайдаар томилсон ч засаглаж чадахгүй байгаа хүмүүсээ дахин дахин сольж байгаа нь засаглалын гүн доройтлын нэг илрэл гэж харж байна.


Манай улсын хувьд төсвийн урсгал зардал жил бүр нэмэгдэж байна. Урсгал зардалд зөвхөн цалин, тэтгэвэр төдийгүй маш их хэмжээний захиргааны зардал багтдаг. Гэтэл төсвийн тодотголыг хэлэлцэх үед эдгээр зардлын нарийвчилсан задаргааг харах боломжгүйгээр УИХ-д өргөн барьдаг асуудал байна.


Үүний нэг жишээ нь Ерөнхий сайд Н.Учралтай хамаарал бүхий сургуульд 3.5 тэрбум төгрөг төсөвлөсөн гэх асуудал юм. Тухайн хөрөнгийн задаргааны файл Байнгын хорооны хуралдаанаар танилцуулагдаж байгаа. Гэтэл Ерөнхий сайд уг файлыг хуурамч гэж тайлбарлаж байна. Ийм нөхцөл байдал нь олон нийтийн дунд эргэлзээ, хардлага төрүүлэхээс өөр аргагүй. Ер нь төсвийн олон зүйлийн задаргааг нэгтгэн оруулж ирдэг. Харин бүх задаргааг нь цахимаар ил тод байршуулдаг болчихвол иргэд болон парламентын гишүүд хардлага, сэрдлэгт тулгуурлан асуудлыг ярих шаардлагагүй болно. Бодит мэдээлэл нь өөрөө ил тод байх ёстой. Төсөв гэдэг бол нийтийн төсөв. Тиймээс зөвхөн УИХ-ын гишүүд бус, иргэд нийтээрээ харж, хянаж чаддаг байх ёстой.


Төсөв хэлэлцэж байгаа энэ үед Байнгын хороо хуралдаж чадахгүй байна. Өчигдөр УИХ-ын чуулганы нэгдсэн хуралдаан ч хуралдаж чадсангүй. Иргэд ард түмний амьдралд шууд хамаарах олон шийдвэрийг хүлээж байгаа. Гэтэл танай нам зохион байгуулалттайгаар хуралдаанд суухгүй байна гэсэн хардлага олон нийтийн дунд үүсэж байна. Хувь гишүүний хувьд энэ асуудалд ямар байр суурьтай байна вэ?


Өнөөдөр засаглаж байгаа МАН 68 гишүүнтэй. Бусад гишүүдтэйгээ нийлээд нийт 80 хүн Засгийн газарт хамтарч ажиллаж байна. Гэтэл энэ Засгийн газрын бүрэлдэхүүнээс сайд нарыг сарын дотор хэд хэдээр нь сольж байна. Бүр энэ 80 хүний дунд сайд болж үзээгүй хүн бараг үлдээгүй гэхээр хэмжээнд хүрч байна. Тэгэхээр энд хүнийг нь сольсноор асуудал шийдэгдэх үү, эсвэл засаглалын тогтолцоо, бодлого, хариуцлагын тогтолцоондоо өөрчлөлт хийх шаардлагатай юу гэдэг асуудлыг ярих ёстой гэж үзэж байна." гэсэн юм.




Н.Отгончимэг