sonin.mn
Сэтгэгдэл (1)

ВАШИНГТОН, 2026 оны долоодугаар сарын 1 /TASS/. Дээд шүүхээс тус улсын АНУ-ын нутаг дэвсгэрт төрсөн хүүхдүүдэд автоматаар иргэншил олгохыг хязгаарласан зарлигийг нь Үндсэн хууль зөрчсөн гэж үзэж, хүчингүй болгох шийдвэр гаргасныг Дональд Трамп "Хятадын ялалт" хэмээн мэдэгджээ.


"БНХАУ-ын удирдагч Ши Жинпинь болон агуу Хятад улсад иргэншил авах асуудалд асар том ялалт байгуулсанд нь баяр хүргэе" гэж тэрбээр " Truth Social" нийгмийн сүлжээндээ бичсэн байна.


Д.Трамп мөн Дээд шүүхийн шийдвэрт сэтгэл дундуур байгаагаа илэрхийлж, уг шийдвэрийг хуулийн төсөл батлах замаар цуцлахыг Конгресст уриалжээ. Өмнө нь Трамп өөрийн гаргасан зарлигийг тайлбарлахдаа, АНУ-д төрсөн хүүхдүүдэд иргэншил олгох заалт нь "боолуудын хүүхдүүдэд зориулагдсан бөгөөд тэднийг хамгаалах зорилготой байсан" хэмээн олонтаа тэмдэглэж байв. "Энэ заалт Хятад болон бусад орны тэрбумтнуудад зориулагдаагүй" гэж тэрбээр онцлон хэлж байсан юм.


Д.Трамп АНУ-д төрсөн хүүхдүүдэд иргэншил олгохыг хязгаарлах тухай зарлигт 2025 оны нэгдүгээр сарын 20-нд ерөнхийлөгчийн тангараг өргөснийхөө дараа гарын үсэг зуржээ. 


Зарлигт эцэг эх нь АНУ-д хууль бусаар оршин сууж байгаа, мөн шинээр төрсөн хүүхдийн эх нь тус улсад түр хугацаагаар (бусад улстай байгуулсан визгүй зорчих журам, эсвэл сургалтын, ажлын, жуулчны визээр) нэвтэрсэн, эцэг нь АНУ-ын иргэншилгүй эсвэл байнгын оршин суух зөвшөөрөлгүй бол тус улсад төрсөн хүүхдүүдэд иргэншил олгохгүй байхыг төрийн байгууллагуудад үүрэг болгосон байна.



Д.Жаргал

Эх сурвалж: "Монцамэ" агентлаг