sonin.mn
Сэтгэгдэл (19)

Монгол Улсын Ерөнхий сайд Н.Учрал өнгөрсөн тавдугаар сард Нийслэлийн Засаг дарга бөгөөд Улаанбаатар хотын захирагч Х.Нямбаатарыг албан тушаалаас нь огцруулсан билээ. Улс төрийн албан тушаалтныг томилох, чөлөөлөх нь төрийн хэвийн үйл явц. Харин Х.Нямбаатар энэ шийдвэрийг хэвийн хүлээж авсангүй.


Тэрбээр огцорсон оройдоо нийгмийн сүлжээгээр шууд дамжуулалт хийж, Ерөнхий сайд Н.Учрал руу дайрсан. “Миний нэр хүнд чинийхээс өндөр байгаа”, “Чи бантсандаа”, “Муу алиа бацаан минь, чамтай үзэлцэнэ” гэх зэргээр ярьсан нь төрийн өндөр албан тушаал хашиж ирсэн улстөрчийн үг гэхээсээ илүү хувийн өс хонзонгоо тайлж буй мэт үйлдэл байв.


Албан тушаал бол хэн нэгний насан туршийн өмч биш. Өнөөдөр сайд, хотын дарга байсан хүн маргааш ажлаа өгч болно. Харин албан тушаалаасаа буусныхаа төлөө өөрийг нь улс төрд оруулж, төрийн өндөр албан тушаалуудад хүргэсэн нам, түүний удирдлагатай “үзэлцэнэ” хэмээн мэдэгдэж байгаа нь тухайн этгээдийг л ямар өчүүхэн амьтан болохыг харуулна. Х.Нямбаатар үүнээс хойш ч нийгмийн сүлжээгээр МАН-ын эсрэг улс төрийн байр сууриа илэрхийлсээр байна.


Мэдээж иргэний хувьд үгээ хэлэх, эрх баригчдыг шүүмжлэх эрх түүнд бий. Гэхдээ Х.Нямбаатартай холбоотой гэж улс төрийн хүрээнд яригддаг олон тооны цахим хаяг, пэйж МАН, намын удирдлага, Засгийн газрын эсрэг ижил агуулгатай мэдээлэл зэрэг түгээж байгаа нь энэ бүхэн зохион байгуулалттай болохыг харуулж байна.


Эдгээр хаягууд үнэхээр Х.Нямбаатартай холбоотой юу? Хэрэв холбоотой бол үйл ажиллагааг нь хэн санхүүжүүлдэг вэ? Мэдээллийн бодлого, чиглэлийг нь хэн тодорхойлдог вэ? Намын удирдлага болон Засгийн газрын эсрэг ижил агуулгатай мэдээлэл олон сувгаар нэгэн зэрэг түгж байгаа нь жирийн давхцал уу, эсвэл зохион байгуулалттай ажиллагаа юу? Энэ бүхнийг таамгаар бус баримтаар тогтоох ёстой. Учир нь МАН-д үүнтэй төстэй асуудлаар намын гишүүний хариуцлагыг ярьсан жишиг бий. “Монголын үнэн” сонины ерөнхий эрхлэгч асан А.Амундрагийн намын гишүүнчлэлийн асуудлыг хөндөхдөө МАН-ын дарга Н.Учрал 2026 оны хоёрдугаар сарын 27-ны Бага хурлын үеэр намын бодлого, үйл ажиллагааг “зохион байгуулалттайгаар гүтгэн харлуулж”, намын бодлогыг гуйвуулсан гэх үндэслэлийг дурдсан байдаг.


Тэгвэл А.Амундрад тавьсан энэ шалгуур Х.Нямбаатарт яагаад үйлчлэхгүй байх ёстой гэж?


Намын дүрэм, сахилга, хариуцлага гэдэг тухайн гишүүний нэр нөлөө, өмнө нь хашиж байсан албан тушаалаас шалтгаалан өөрчлөгддөг зүйл биш. Нэг гишүүн намынхаа эсрэг зохион байгуулалттай мэдээлэл түгээсэн гэх үндэслэлээр хариуцлага хүлээдэг бол нөгөө гишүүнд ч ижил шалгуур тавих учиртай. Тиймээс Х.Нямбаатартай холбоотой гэх цахим сүлжээ, пэйж, хаягуудын асуудлыг МАН-ын Хяналтын ерөнхий хороо шалгах шаардлагатай болж байна. Хэрэв тэдгээр хаяг Х.Нямбаатарын нөлөөллийн хүрээнд ажилладаг, улмаар нам болон намын удирдлагын эсрэг зохион байгуулалттай мэдээллийн ажиллагаа явуулдаг нь баримтаар тогтоогдвол асуудал зөвхөн Х.Нямбаатарын “үг хэлэх эрх”-ээр хязгаарлагдахгүй. Харин намын дүрэм, сахилга хариуцлагын асуудал болно.


Х.Нямбаатар бол МАН-д өчигдөр орж ирсэн хүн биш. Тэрбээр МАН-ын нэрээр УИХ-ын гишүүн болж, Засгийн газрын гишүүн, Хууль зүй, дотоод хэргийн сайд, улмаар Нийслэлийн Засаг дарга бөгөөд Улаанбаатар хотын захирагч хүртэл ажилласан. Түүний улс төрийн карьерын бараг бүх шат МАН-тай холбоотой.


Тиймээс намынхаа дэмжлэгээр төрийн өндөр албан тушаалуудад хүрсэн хүн албан тушаалаасаа буусныхаа дараа намынхаа удирдлагатай “үзэлцэнэ” хэмээн зарлаж, улмаар намын эсрэг зохион байгуулалттай цахим ажиллагаанд оролцсон нь тогтоогдвол МАН өөрийн тогтоосон зарчмаа хэрэгжүүлэхээс өөр сонголтгүй.

А.Амундрад нэг дүрэм, Х.Нямбаатарт өөр дүрэм үйлчилдэг байж болохгүй. Энэ утгаараа асуудал “Х.Нямбаатарыг МАН-аас хөөх үү” гэдэгт бус, МАН өөрийнхөө тогтоосон зарчмыг Х.Нямбаатарт хэрэгжүүлж чадах уу гэдэг дээр ирээд байна. Шулуухан хэлэхэд Х.Нямбаатар МАН-аас хөөгдөх болзлоо хэдийнэ хангажээ.




Э.Солонго