sonin.mn
Сэтгэгдэл (2)

ЛОНДОН, 2026 оны дөрөвдүгээр сарын 10 /Reuters/. Их Британийн усан хилийн ойр орчимд Оросын шумбагч онгоцууд нэг сар гаруйн хугацаанд байрласан тул далайн ёроолын кабель, хоолойн дэд бүтцийг хамгаалахаар байлдааны хөлөг онгоцуудыг илгээсэн тухай тус улсын Батлан хамгаалахын сайд Жон Хили пүрэв гарагт мэдэгдлээ.


ОХУ Ойрх Дорнодод өрнөж буй үйл явдлыг далимдуулан далайн тээврийн гол замууд, холбооны кабель зэрэг стратегийн чухал дэд бүтцүүд байдаг Хойд туйлын бүсэд нууц ажиллагаа явуулж байна гэж Их Британийн эрх баригчид  буруутгажээ. 


Ж.Хили хэлэхдээ, тус улсын болон Норвег зэрэг холбоотнуудын зэвсэгт хүчин Оросын хөлөг онгоцуудын "хорлон сүйтгэх" үйл ажиллагааг таслан зогсоосон гэж мэдэгдээд, Оросын шумбагч онгоцууд бүс нутгийг орхин гарсан бөгөөд далай доогуурх дэд бүтцэд ямар нэгэн хохирол учирсан шинж тэмдэг илрээгүй гэдгийг нэмж дурджээ. Ж.Хили хэвлэлийн бага хурлын үеэр энэ ажиллагааг олон нийтэд ил болгосон бөгөөд үүний зорилго нь Оросын Ерөнхийлөгч Владимир Путинд Оросын талын үйл ажиллагааг илрүүлсэн гэдгээ харуулах явдал байсан гэлээ.


“Манай зэвсэгт хүчин тэднийг байнга ажиглаж байсныг, тэдний хөдөлгөөн нууц байгаагүйг тодорхой ойлгуулсан. В.Путиний төлөвлөсөн шиг уг ажиллагаа нууц байж чадаагүй, нууц ажиллагааг илчилсэн” гэж тэрбээр хэлсэн байна.


ОХУ-аас Их Британид суугаа Элчин сайдын яамнаас Ж.Хилийн мэдэгдлийг "үндэслэлгүй, нотлох баримтгүй" гэж мэдэгджээ. Оросын хөлөг онгоцууд олон улсын бүсэд нэвтэрснийг илрүүлсэн даруйд Их Британийн тал тэдгээрийн хөдөлгөөнийг хянахаар харуулын хөлөг онгоц, түлш цэнэглэгч танкер болон тэнгисийн эргүүлийн нисэх онгоцыг илгээсэн байна. Орос-Украины дайн эхэлснээс хойш Атлантын далайн хойд хэсэг болон Балтийн тэнгис дэх эрчим хүч, харилцаа холбооны кабель болон хийн хоолойнууд хэд хэдэн удаа гэмтсэн юм. Үүнтэй холбогдуулан НАТО-гийн холбоотнууд тус бүс нутаг дахь цэргийн хүчээ зузаатгажээ.



Г.Энх-Од

Эх сурвалж: "Монцамэ" агентлаг