УИХ-ын гишүүн Лу.Гантөмөр сэтгүүлчдийн асуултад хариулав.

Тэрээр: Засгийн газрын бүтцийн асуудал нь Ерөнхий сайдын бодлого, байр суурьтай шууд холбоотой юм. Ерөнхий сайд өөрийн зүгээс либерал чиг баримжаатай бодлого хэрэгжүүлнэ гэж мэдэгдсэн.

Түүний энэхүү мэдэгдэл бодитой эсэх нь шинээр бүрдэх Засгийн газрын гишүүдийн бүрэлдэхүүнээс тодорхой харагдах болно. Өөрөөр хэлбэл, коммунист чиг хандлагатай эсвэл либерал үзэл баримтлалтай хүмүүс томилогдохоос шалтгаалан цаашдын бодлого тодорхойлогдоно гэж үзэж байна.

Одоогоор Засгийн газрын шинэ бүрэлдэхүүн хэзээ томилогдох талаар тодорхой мэдээлэл байхгүй байна. Өчигдөр нэг цагийн завсарлага авч, Ардчилсан намын бүлгийн хурал дээр уг асуудлыг хэлэлцэж, Ерөнхий сайдын баримтлах бодлогын талаар тодруулга авсан.

Ерөнхий сайд 2024–2028 оны Засгийн газрын хөтөлбөрийг хэрэгжүүлнэ гэдгээ илэрхийлсэн. Тэрээр бизнесийн орчныг сайжруулах, хувийн хэвшлийг дэмжих бодлого баримтлахаа онцолсон. Мөн авлигатай тэмцэх асуудал нь нэн чухал болохыг Ардчилсан намын гишүүд тэмдэглэсэн бөгөөд Ерөнхий сайд уг чиглэлд үйл ажиллагаагаа эрчимжүүлэхээ мэдэгдсэн.

Авлигатай тэмцэх болон хувийн хэвшлийг дэмжих бодлогыг зэрэг хэрэгжүүлэхийн тулд төрийн албыг цомхон болгох шаардлагатай гэж үзэж байна. Үүний хүрээнд төрийн албаны бүтэц, бүрэлдэхүүнийг оновчтой болгох, дэд сайдын орон тоог цөөлөх талаар мөн дурдсан.

Түүнчлэн яамдын үндсэн чиг үүргийг тодорхой болгож, голлох дөрвөн чиглэлд төвлөрүүлэх тухай санал дэвшүүлсэн. Өмнөх Ерөнхий сайд болон дэд сайд нарт холбогдуулан дэд сайдын албан тушаалыг цомхотгох шаардлага тавьж байсан. Иймд Ерөнхий сайд солигдсон ч уг шаардлагаас ухрахгүй байх нь зүйтэй гэж үзэж байна.

Энэ үндэслэлээр бүлгийн хурлын үеэр дэд сайдын албан тушаалыг цомхотгох зарчмын шаардлагыг Ерөнхий сайдад хүргүүлсэн бөгөөд тэрээр үүнийг тодорхой хэмжээнд хүлээн зөвшөөрсөн байр суурь илэрхийлсэн.

Ерөнхий сайдын албан тушаал нь улс төрч хүний хувьд ховор боломж тул энэхүү боломжийг үр ашигтай ашиглаж, бодит шинэчлэл хийх нь зүйтэй. Хэрэв өөрийн зорьж буй Засгийн газрын бүтцийг хэрэгжүүлж чадвал ойролцоогоор 10 яам бүхий, илүү цомхон бүтэц бүрдүүлэх боломжтой гэж үзэж байна. Харин өмнөх тогтолцоондоо баригдвал бодит өөрчлөлт гарахгүй, хуучин хэвээр үргэлжлэх эрсдэлтэй юм." гэлээ.

Б.Төгсбаясгалан