sonin.mn
Сэтгэгдэл (12)

УИХ-ын гишүүн Ө.Шижир сэтгүүлчдийн асуултад хариулав. Тэрээр: "Өнөөдөр бид хоёр талын байр суурийг тэнцвэртэйгээр авч үзлээ.Сүүлийн долоо хоногт юу өрнөв гэвэл судлаачид болон иргэд өөрсдийн байр суурийг идэвхтэй илэрхийлж байна.Нэг талаас Туул голын дагуух хурдны зам нь экосистем, мод бутыг сүйтгэнэ гэсэн болгоомжлол байна. Нөгөө талаас уг зам зайлшгүй хэрэгтэй гэсэн байр суурь мөн хүчтэй яригдаж байна.Ийм нөхцөлд асуудлыг тодорхой нэг чиглэлд цэгцэлж, иргэдэд үнэн зөв ойлголт өгөхгүй бол сөрөг үр дагавар үүсэж байна. Үзэл бодлоо илэрхийлсэн иргэдийг хотын удирдлагын түвшинд зүй бус үг хэллэгээр дайрах, зохисгүй үйлдэл гаргах зэрэг нь нийгмийн уур амьсгалыг улам хурцатгаж байна.


Тиймээс иргэн, төрийн хоорондын ойлголцлыг хангах зорилгоор нээлттэй сонсгол зохион байгуулж байна.


Өнөөдрийн байдлаар асуудал нь хоёр талын маргаан бус, харин төр, иргэн хоорондын үл ойлголцол болон хувирчээ.Сүүлийн жилүүдэд эрх баригчид томоохон төсөл, хөтөлбөрүүдийг хэрэгжүүлэхдээ иргэдтэй зөрчилдөх хандлага ажиглагдаж ирсэн нь нууц биш.Өнөөдрийн сонсголоор Усны газрын албан ёсны дүгнэлт хараахан гараагүй байна гэсэн мэдээлэл өгөгдсөн. Энэ нь өөрөө ноцтой асуудал юм.Туул гол бол Монгол Улсын хүн амын ундны усны гол эх үүсвэрийн нэг байсаар ирсэн.Гэтэл ийм чухал асуудлаар судалгаа, дүгнэлт бүрэн хийгдээгүй байгаа нь бодлогын ноцтой алдаа гэж үзэх үндэслэлтэй.


Нөгөө талаас хотын удирдлагууд гадаадын туршлага судалж байна гэж тайлбарладаг. Гэвч олон улсын жишигт хотын төвөөр урсах гол, усан сангуудыг хамгаалж, нийтийн эзэмшлийн амралт, чөлөөт орон зай болгон хөгжүүлдэг. Харин манай нөхцөлд Туул голын дагуу хурдны зам барихаар төлөвлөж байгаа нь эсрэг хандлага мэт харагдаж байна.Өнөөдрийн хэлэлцүүлгийн зорилго нь аливаа төсөл, хөтөлбөрийг эсэргүүцэхдээ бус, харин зөв зохион байгуулалттай, шинжлэх ухааны үндэслэлтэйгээр хэрэгжүүлэх боломжийг эрэлхийлэхэд оршиж байна.Аль нэг тал өөрсдийгөө дандаа зөв гэж үзэх ёсгүй.


Иргэдийн санал бодол, мэргэжлийн байгууллагуудын дүгнэлтийг зайлшгүй сонсож, үндэслэлтэй шийдвэр гаргах шаардлагатай.


Гэтэл өнөөдрийн байдлаар байгаль орчны нарийвчилсан үнэлгээ ил тод, хүртээмжтэй байдлаар тавигдаагүй байна. 2022 оноос хойш холбогдох мэдээлэл олон нийтэд нээлттэй байршуулагдаагүй нь анхаарал татаж байна.Ийм нөхцөлд бодит мэдээлэлд тулгуурласан хэлэлцүүлэг өрнөх боломж хязгаарлагдаж байна.Иргэн, төр хоёрын ойлголцлыг нэг түвшинд хүргэх нь нэн чухал. Эс бөгөөс харилцан үл ойлголцол нь бухимдал, зөрчилдөөнд хүргэх эрсдэлтэй. Тиймээс асуудлыг бодит мэдээлэлд тулгуурлан, нэг мөр ойлголтод хүргэх шаардлагатай байна.

Мөн улс төрийн хүрээнд гарч буй зарим асуудлыг дурдах нь зүйтэй.


Нүүрсний жагсаалтай холбоотойгоор улс төрийн оролцоо байсан тухай мэдэгдлүүд гарч байсан нь үнэн. Түүнчлэн тухайн үеийн үйл явц хяналтаас гарсан нөхцөл байдал үүссэн нь ч бодит зүйл.Өнөөдрийн байдлаар улс төрийн томоохон нам доторх зөрчил бүрэн шийдэгдээгүй, тодорхой хэмжээнд үргэлжилж байна гэж харж байна. МАН хоёр хуваагдсан хэвээр байна.


Улсын төсөв өргөн баригдсаны дараахан үүссэн хуваагдал бүрэн арилаагүй, харин түр намжсан шинжтэй байна. Иймд одоогийн эв нэгдэл тогтвортой эсэхэд эргэлзэх үндэслэл бий.Үүнтэй холбоотойгоор дараах зарчмын байр суурийг илэрхийлж байна. 


Нэгдүгээрт, намын дарга нь Улсын Их Хурлыг удирдах нь ёс зүйн хувьд зохимжгүй. Учир нь УИХ-ын дарга нь хараат бус байх ёстой бөгөөд олон чухал байгууллагын удирдлагыг томилох эрх мэдэлтэй албан тушаал юм.

Хоёрдугаарт, Засгийн газар цомхон, чадварлаг байх ёстой. Хэрэв албан тушаалын тэнцвэр хангах зорилгоор хэт олон сайд томилбол энэ нь дэвшил биш, харин ухралт болно.

Гуравдугаарт, шинэчлэл, цахим шилжилт, үр ашигтай бүтэц ярьж ирсэн удирдлагууд хэлсэн үг, баримталсан зарчимдаа үнэнч байж, чанартай, цомхон Засгийн газрыг бүрдүүлэх нь зүйтэй гэж үзэж байна." гэлээ.


Н.Отгончимэг