sonin.mn
Сэтгэгдэл (28)

УИХ дахь Ардчилсан намын бүлэг хэсгийн ахлагчийн ажлын байрыг байхгүй болгох талаар хуулийн төсөл санаачилна гэдгээ мэдэгдсэн. Тэдний хэлж буйгаар хэсгийн ахлагч тодорхой үүрэггүй, энэ ажлын байр байх шаардлагагүй гэж үзэж байна.


Тэгвэл Хан-Уул дүүргийн хороодын хэсгийн ахлагчдаас юу хийдэг талаар нь тодруулахад “Нийт 19 чиг үүргийн ажил хийдэг. Нэг хороо дунджаар 10 хэсэгтэй. 2400 өрхтэй. Нэг хэсгийн ахлагч 300-500 өрхтэй тулж ажилладаг.


Тухайн хэсгийнхээ өрх, иргэний дэлгэрэнгүй судалгааг гаргадаг. Энэ ажил тогтмол хийгддэг. Жишээлбэл, тэр айл нохой, мууртай юу, хүн амын шилжилт хөдөлгөөн гарсан уу, архидан согтуурдаг уу, цэрэгт явах насны хүн байгаа юу, хүүхэд хамгаалал, өндөр настай, халамжийн үйлчилгээ шаардлагатай юу гээд бүх судалгааг гаргаж, хяналтыг тавьдаг. Хогоо ачуулдаг уу, цэвэрлэгээнд оролцдог уу, ажлын байр хэрэгтэй юу гэдэг нь хүртэл хэрэгтэй” гэнэ. Тэр мэдээллийг л хамгийн анхан шатны хороондоо хэлээд, цааш дүүрэг, нийслэл, холбогдох шат шатны байгууллагад нь мэдээлж, төр, иргэнийг холбох гүүр нь болдог аж.


Ялангуяа ганц бие ахмад настай, хөгжлийн бэрхшээлтэй иргэд, зорилтот бүлгийн иргэд төрийн мэдээллээс маш хол, гэртээ ямар нөхцөлд амьдардаг болохыг хамгийн сайн мэддэг хүмүүс нь хэсгийн ахлагчид байдаг аж.


Хэсгийн ахлагчид амралтын өдрүүд, ажлын бус цагаар ажиллаж айл өрхүүдээ эргэх нь элбэг. Учир нь айлууд гэртээ байх цагаар л очвол илүү эзэнтэй байна гэдгээ учирлаж байв. Цалингийн хувьд ч 900 мянгаас эхэлдэг. Иргэдтэйгээ ойрхон байдаг, тэдний урмын үгсээр л урамшина ажилладаг гэнэ. Хэсгийн ахлагчийн ажлын байр байхгүй бол энэ бүх ажлуудыг хийх хүн байхгүй. Иргэдийн үгийг сонсож чадахгүй, ялангуяа зорилтот бүлгийн иргэд хөсөр хаягдах нөхцөл байдал үүснэ.