sonin.mn
Сэтгэгдэл (8)

МОСКВА, 2025 оны арваннэгдүгээр сарын 28 /DW/. Америкийн төлөөлөгчид Украины асуудлаар хэлэлцээ хийхээр ирэх долоо хоногт Орост ирнэ гэдгийг ОХУ-ын Ерөнхийлөгч Владимир Путин баталжээ. 

Киргизийн нийслэл Бишкек хотод хийсэн айлчлалынхаа төгсгөлд В.Путин хэлэхдээ, Оросын талыг Гадаад хэргийн яам болон Ерөнхийлөгчийн Тамгын газрын албан тушаалтнууд төлөөлнө гээд, Владимир Мединский, Юрий Ушаков нарын зөвлөхүүдээ нэрлэсэн байна.




Кремлийн төлөөлөгчдийн мэдээлснээр, Украины дайныг зогсоох тухай маргаан дагуулсан 28 заалт бүхий төлөвлөгөөг боловсруулах хэлэлцээнд өнгөрсөн долоо хоногт оролцсон АНУ-ын тусгай төлөөлөгч Стив Уиткофф мөн Москвад айлчлах төлөвтэй байна.




“Ерөнхийдөө энэ нь ирээдүйд байгуулах хэлэлцээрүүдийн үндэс суурь болж чадна гэдэгтэй бид санал нэг байна” гэж В.Путин уг төлөвлөгөөний талаар хэлээд, Швейцарт АНУ, Украины төлөөлөгчдийн саяхан хэлэлцсэн төлөвлөгөөний хувилбарыг Орост дамжуулсан гэдгийг нэмж хэлжээ.




Харин Украины Ерөнхийлөгч Владимир Зеленский мэдэгдэхдээ, Оростой хийх гал зогсоох хэлэлцээрийн талаарх нарийн ширийн зүйлсийг тохиролцохоор Украин, АНУ-ын төлөөлөгчид энэ долоо хоногт уулзана гэсэн байна. “Манай баг Америкийн төлөөлөгчидтэй хамтран Женевт болсон хэлэлцээний дүнд боловсруулсан заалтуудыг энх тайван, аюулгүй байдлын баталгаанд хөтлөх хэлбэрт оруулахын тулд энэ долоо хоногийн сүүлчээр уулзана” гэж В.Зеленский хэлжээ.



Э.Хулан


Эх сурвалж: "Монцамэ" агентлаг