Монголын томоохон хувийн хэвшлийн нэг “Говь” ХК-ийн нэр хүндэд сүүлийн өдрүүдэд нэгэн залуу эрхмийн хууль зөрчсөн байж болзошгүй үйлдлээс болж хар толбо суулгаад байна. “Говь”-ийн гүйцэтгэх захирал Б.Амарсайхан нь Монголын толгой баячуудын нэг, “Таванбогд” группийн үүсгэн байгуулагч Ц.Баатарсайхан болон түүний гэргий Д.Хулан нарын хүү. Гэвч тэрбээр өөрийнхөө гэр бүлийн нэр хүнд, компанийн брэндийг уландаа гишгэсэн байж болзошгүй үйлдлээрээ олон нийтийн шүүмжлэлд өртөж, өөрийн карьер төдийгүй байгууллагын нэр хүндэд хүнд цохилт өгөөд байна.

Б.Амарсайхан бусдыг бүлэглэн зодсон гэх хэрэгт холбогдож, хуулийн байгууллагад мэдүүлэг өгөх үүрэгтэй байсан ч гадагшаа зорчиж, өнөөдрийг хүртэл эх орондоо ирээгүй нь олон нийтийн дунд “эр зориггүй зугтагч” хэмээх нэр хоч авахад хүргээд байна.

Тэрбээр “найз бүсгүйн бие гэнэт муудсан тул яаралтай очих шаардлагатай. Энэ сарын 27-нд буцаж ирнэ” хэмээн мэдэгдсэн ч хугацаа хэтэрч, сураггүй болсон нь түүнийг санаатайгаар оргон зайлсан болохыг харуулж байна.

Энэхүү үйл явдал нь зөвхөн нэгэн залуугийн хариуцлагагүй байдал биш, харин “Говь” ХК-ийн олон зуун ажилтны нэр төр, хөдөлмөрийг гутаасан хэрэг хэмээн зарим ажилчид нь дүгнэж байна. “Бид үнэнчээр хөдөлмөрлөж, дэлхийд танигдсан брэндийг бүтээж байхад, компанийн удирдлагын ийм хариуцлагагүй үйлдэл бид бүгдийн нүүрийг улайлгаж байна” хэмээн нэрээ нууцалсан нэгэн ажилтан ярилаа.

“Говь” бол Монголын үйлдвэрлэлийн салбарын нүүр царай, үндэсний бахархал билээ. Гэтэл энэхүү брэндийг толгойлж буй хүн нь хувийн сахилга батгүй, хууль хүндэтгэх соёлгүй, шүүмжлэлээс зугтаж буй хулчгар нэгэн байж болох уу? гэдэг асуулт өнөөдөр олон нийтийн дунд хөндөгдөж байна.

Эцэст нь хэлэхэд, “Говь”-ийн эгэл жирийн ажилчид л энэ бүхний хохирогчид болж байна. Тэд компанийн нэр хүндийг хамгаалж, өдөр бүр хөдөлмөрлөж байгаа ч удирдлагын хариуцлагагүй үйлдлээс болж ичиж, уурлаж, нэр төр нь гутаагдаж байна. Б.Амарсайхан зөвхөн өөрийгөө бус, нийт байгууллагынхаа нүүрийг шившигтэй хутгалаа.

С.Сарнай