sonin.mn
Сэтгэгдэл (43)

Монгол Улсын Ерөнхийлөгч Ухнаагийн Хүрэлсүх танаа


Өөрөө ямар ч эд, эрхтэнд гар хүрээгүй, мэс бариагүй, хагалгааны өрөө рүү ороо ч үгүй байж, тийм үйлдэл хийсэн мэтээр ял аваад, эдэлж буй түүнийг яах вэ. Эрхтэн шилжүүлэн суулгахтай холбоотой бүхий л асуудлыг хуулийн дагуу, нууцлалын өндөр зэрэгт зохицуулах төрийн албыг ахалж байсан албан тушаалтан, гэдгээр яг гардаж үйлдэл хийсэн хүмүүсийн өмнөөс ял эдлэх нь хэр оновчтой вэ?


Ийм дээрээ тулахад амьгүй болсон донороос эд огтолж авсан эмч нарын үгийг шүүхийнхэн яагаад сонсохгүй байгаа юм бол. Бүх бурууг яагаад ганцхан, алсаас зохицуулах үүргийнхээ дагуу ажилласан П.Батчулуун эмчид тохоод байгаа вэ. Хэн нэгэнд ямар нэг далдын зорилго, хорлол байгаа мэт ч санагдах боллоо.


Манай улсад саяхнаас бий болсон, онцлог ихтэй, минут, секундтэй уралдаж амжуулдаг энэ ажлын мөн чанарыг шуугчид, бусад хамаарах хүмүүс хэр ойлгодог бол хэдхэн хоногийн өмнө болсон шүүхийн нийслэлийн шатны хуралдаанд асуудлыг оруулахын өмнө Д.Батчулуун эмчид найз нөхөд нь бүхнийг илэн далангүй ярихыг сануулсан юм.


Тэгэхэд "Зүгээр ээ, бүх юм ойлгомжтой юм чинь, юу ч ярих хэрэггүй, санаа зоволтгүй" гэсэн. Гэтэл нийслэлд доод шатны шүүхийн шийдвэрийг хэвээр үлдээв. Өөрийнхөө төлөө тэмцдэггүй нь уужуу дотор, тэнэг толгойтойнх уу, эсвэл буруугүй тул эрдэж, бардсаных юм болов уу.


Залуу эмч, мэргэжилтнүүдийн урмыг мохоож, ууцыг хугалахгүй, зохицуулах албаны нэр хүндийг унагахгүй, манай улсад эрхтэн шилжүүлэн суулгах ажил хорон санаа, холион бантангаас болж зогсох ёсгүй, улам хөгжих ёстой, олон нийт бултаараа ойлгох өдөр ирнэ, бид л хийхгүй бол өөр хэн гэж хэмээн өдөр, шөнийг ялгалгүй гүйсээр өнөөдөр өөрөө ийм байдалд орчихоод байгаа анд нөхрөө бодохоор дуугүй байж болохгүй байна. Хүний гавьяат эмч, Төрийн соёрхолт П.Батчулуун эмчийн бие тун ядруу байгаа. Сахар нь унаж, жин ихээр алдаад, нүднээс гарахдаа тулаад байж, юун ч бардам, эрэлхэг юм. Тэрбээр үхэл, амьдралын тухай гүн бат ойлголттой нэгэн л дээ. Багаасаа 12 настайгаасаа үхэл гэж юу юм гэдгийг мэдсэн, мэдэрсэн.


Тэрбээр алдарт Ж.Хайрулла эмчээр нийт 10 удаа тархиндаа мэс засал хийлгэж, амьд үлдсэн нөхөр. Хожим мэс засалч эмчээр олон жил ажиллаад байхдаа мэс заслын явцад ухаан алдаж унах үед зүрх нь 16 минут зогсоод эргэж ажилласан тухай тэмдэглэл бий. Тэр үхэхээр байв. Гэсэн ч сэхсэн. Харин одоо бие нь муу байна.


Эрхтэн шилжүүлэн суулгах, үүний тулд тархины үхэлтэй хүний ар гэрийнхнээс зөвшөөрөл авах зэрэг тун нарийн, нандин, чин сэтгэл, хариу нэхээгүй хайр шаардсан ажлыг эхлүүлсэн, амжилтад хүргэж явсан мэргэшсэн мэргэжилтэнд яг юу тохиолдсон тухайд төр эргэн харж, шүүхийн шийдвэр зэрэгт анхаарал хандуулаасай гэж хүсэж байна аа. Тэр минь, энэ минь гэсээр өөрийгөө умартсан тэнэг эмчтэн бол ингээд дуусах шинжтэй болоод ирлээ. Хайран байна. Эрхэм хүндэт Ерөнхийлөгч Танд ингэж тайлбарлахаас аргагүйд хүрээд захидал бичлээ. Хүлээж авч, болгооно уу. 



БХЛКЗЭ-ийн нэрэмжит нийслэлийн 10 жилийн 6 дугаар дунд сургуулийн 1984 оны төгсөгчид