sonin.mn
Сэтгэгдэл (56)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд Орост тун ээлгүй байна. Оросын зэвсэгт хүчин стратеги–оперативын нөөцөө шавхан байлдаж байна. Хойд Солонгосын дайчдыг оруулаад алуулж байна. Оросын Сири дэх фронт нь нурлаа. Цаашаа Орос орныг ба Путиныг ямар тавилан хүлээж буй тухай мэдээллүүдээс хөрвүүлж буулгая. ОХУ-ын нийслэлд нь, бүр төвд нь генералуудыг нь алж дэлбэлдэг болж байна.  


Сири улс Оросын нөлөөнөөс гараад явчихлаа. Бүрмөсөн болж таарах нь байна. Ассадын дэглэм нурсан шиг Путины дэглэм нурах нь ойртсон, гэнэт нэг л өдөр хөмөрнө, Путин Оросоос өөр аль нэг улс руу дүрвэхээр бэлтгэж байгаа тухай 1972-1991 онд КГБ-д чекист явсан хурандаа Владимир Попов, оросын нэртэй сэтгүүлч Андрей Мальгин нар сонирхолтой ярилцлага украины Дмитрий Гордоны нэвтрүүлэгт өгсөн нь сайтуудад нээлттэй байна. Алтайн хязгаарт тусгай бункер бариулсан, тийшээгээ зугтаж очоод цаашаа Хятад руу дүрвэнэ гэхчлэн оросын хүчний Ольга Курносова сошиалд ярилцлага өгчээ. Энэ мэт кремлийн хакерчид хакердаад арилгачихмаар ийм мэдээ маш олноороо өдөр бүр тавигдаж байна. Энэ ямар учиртай вэ?  



Хувь тавилангийн золиос болсон Путины алдаануудыг КГБ-д чекист явсан, хожим ФСБ-д генерал болсон Евгений Савостьянов шууд нэрлэжээ. Бодвол ФСБ-д Путины дарга явсан байх. Хожим Ельциний ЕТГ-т дарга байхдаа ойр дөт явсан байж таарна. “Фатальный” алдаа гэснийг бодохул заяа тавилангаараа үйлдэгдэж буй гэсэн утгатай юм болов уу. Путины өнгөн дээр гурван онцлог үзэгдэл байна. Энэ нь 1) Орос орны технологийн хоцрогдол; 2) Оросын эсрэг авсан олон хоригууд; 3) Ким Чен Унтай цэргийн холбоо байгуулсан явдал.  


Генерал Савостьянов гайхшаа барж ядан хэлжээ: Урьд өмнө дайтаж байсан улсууд ашиг хөөцөлдөн арилжиж (коммерц) байхыг би үзсэнгүй. Тэгвэл Орос яг тэгж байна.  


“Путины 5 алдаа” юув гэвэл: 


1. Нэгдүгээрт бүхэлдээ глобал түвшинд алдаж байна. Дайн бол түүний хувьд завсрын үйл ажиллагаа юм. Энэ бол Баруунтай хийж буй дайных нь нэг элемент. Ямар нэгэн маниак үзэл санаанд автан ийм дайн явуулж алдаж байна. 

2. Хоёрдугаарт хий хоосон мөрөөдөл нь том алдаа болно. Юу гэвэл “Би яваад очно, украинчууд сөхрөөд уначихна” гэсэн мөрөөдөл. 

3. Гуравдугаарт европчууд өөрсдөө алдаа гаргаж байна. Шантаажийн өмнө ямагт

буулт хийдэг. 

4. Дөрөвдүгээр алдаа нь Путин өөрийн армийн нөхцөл байдлыг ойлгодоггүй.

5. Тавдугаархи нь Путин эдийн засгийнхаа нөхцөл байдлыг огт ойлгодоггүй гэжээ.



Генерал Савостьянов бичиж байна:–Би түүнийг танина. Түүнд би ингэж хэлэх эрхтэй. Битгий туйлшир гэж. Путин бол гений биш, бас усан тэнэг биш. Тэр бол зүгээр л дундаж хүн. Ямар улсад сууж байгаа вэ гэвэл энэ нөхцөлд өөртөө зориулж өөрийнхөө захиалгаар бий болгосон тэр улсдаа л амьдарч байгаа хүн. Бүх асуудал, гай зовлонгийн үндэс нь Путин өөрөө энэ дайныг тооцоолж чадаагүйгээс болсон. Тэр зөвхөн амжилттай давшина гэсэн аян дайнаа л тооцоолсон. Тэр Украины өмнөд хэсгээс цэргээ оруулаад эсэргүүцэлгүйгээр хэдэн зуун км ахисныгаа ялалт гээд бодчихсон. Гэтэл тэр үед Украины умардад, дорнодод юу болж өрнөж байсныг тооцоолоогүй. Хэрэв түүнийг урьдчилан тооцоолсонсон бол маш богино хугацаанд зорилгодоо хүрчих байсан биз.


Путины бас нэг том алдаа бол украинчуудын сэтгэл санааны байдлыг огтоос ойлгоогүй явдал юм. Ийм тэнэглэл (идиотизм) нэг хүнд бус, бүр нэг улс үндэстэнд байдаг жишээг би эшлэх дуртай. Генерал Деникиний дурсамжийг би хөх инээд хүрээд уншдаг байлаа. Тэр ингэж бичиж байжээ. “Украинчууд 9-10 сарын турш бие даасан үндэстэн болоод өөрсдийгөө орос биш гэж мэдэрдэг болчихсон гэдгийг би тархиндаа суулгаж чадахгүй байлаа” гэж. Гэтэл юу вэ, одоо чинь 9-10 сар биш, бүр Крымын тусгай ажиллагаанаас хойш 9 жил өнгөрчихсөн байна шүү дээ.


Нэгэнт л тэр улс, тэр ард түмнийг ойлгоогүй бол дараагийнх нь алхмыг юу хүлээж байгаа нь мэдээж. Хэрэв украинчууд эсэргүүцэн байлдаагүй бол Путины төлөвлөгөө тэр дороо хэрэгжих байсан биз. Гэхдээ өөрийн хувийн дур хүслийг хангах гэсэн нь хамгийн том алдаа юм. Путины арми том дайн явуулахад бэлтгэгдээгүй гэдгийг тэр өөрөө мэдээгүй гэжээ.


Эх сурвалжид ойр дөрвөн орос эрхмийн хэлсэн үгс юу харуулж байна вэ? Путин том зураглалаараа үхлээ өөртөө бэлтгэсэн, тэр нь цаашаа зогсолтгүй үргэлжлэн мухардал руугаа ойртож явааг дөрвүүлээ хэлээд өгчихжээ. Тэр дөрөв бол гудамжны архичин орос биш, жирийн орос ч биш, тэргүүлэх зэргийн сэхээтнүүд, зарим нь эрдэмтэд. Сэтгэл нь зовинохдоо л тэгж хэлж сэрэмжлүүлжээ. Тэдний яриаг орос хэлнээс нь хөрвүүллээ. Сэрэмжлүүлэг ч цаг үеэ олжээ. Оросын зэвсэгт хүчний радиац, хими, биологийн зэвсгээс хамгаалах цэргийн дарга дэслэгч генерал Игорь Кирилловыг Москвад Рязанскийн өргөн чөлөөнд тусгайлан бэлтгэсэн тэсрэх бөмбөгөөр өнгөрөгч 17-нд дэлбэлэн алжээ. Дэглэм сул дорой, хяналтаа алдаж байгаагийн эхний шинж тэмдэг биш гэж үү? Украинд үйлдсэн яргаллынхаа төлөө цээрлэлийг Олон улсын шүүх хүлээлгүйгээр хүртээд эхлэж байгаа юм биш биз дээ? Оросын эрх баригчид ийм зохиомжинд бэлэн үү?


Оросын ялалтад шал дэмий итгэж, Монгол-Зөвлөлтийн найрамдал сэргэнэ хэмээн сэтгэлээ чилтэл гурван жил горьдлоо. Гэтэл санаснаар чинь болохгүй хяслан биднийг яг баглаад авлаа! Гэнэн монголчууд минь! 


 

                                           Адьяaгийн Батсайхан (бэлтгэл хошууч)