sonin.mn
Сэтгэгдэл (37)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүдээс үзвэл Оросын зэвсэгт хүчин стратеги–оперативын нөөцөө бараад, асар их зэвсэг, сум, пуужингийн агуулахуудаа дэлбэлүүлээд, хариуд нь цөмийн дайнаар Украин ба түүний холбоотнуудыг заналхийлж, тэр нь ч шинэ зүйл биш болох тухай хөрвүүлж буулгая.

 

Бид хоёр л үзэгдлийг ойрмогхон олж харлаа. 1. Орос дахь энэ олон цувраа дэлбэрэлтүүд. 2. НҮБ-ын Ерөнхий Ассамблейн чуулган тэр чигтээ Оросын эсрэг уур амьсгалын дунд болж буй.  

 

Эхний тухайд мэдээж гол буруутан нь дайсан Украин нь. Гэхдээ дотоодын буруутнаа тодруулаад хариуцлага тооцох тухай Кремль, БХЯ, ЗХЖШ-т ид яригдаж байна. Түрүүчээсээ баригдаад эхэлсэн. ОХУ-ын Зэвсэгт хүчний Агаарын ба сансрын хүчний холбооны төвийн командир нь ойд амиа хорлосон байдалтай олдсон нь шинэлэг мэдээ, этгээд үзэгдэл ба оросын генерал офицеруудын цуврал амиа егүүтгэл эхэлж байх магадлалтай.

 

Ганц шөнийн мэдээ. Украины дронууд довтолгоо хийж, Оросын БХЯ-ны мэдээгээр 125 дрон устгасан гэсэн ч ийм ийм хохирол амсчээ.

 

  1. Волгоград мужийн Котлубань тосгонд зэвсгийн арсенал өртөв. NASA гал гарсан гурван байрлалыг тогтоов. Арсеналд ираны пуужингуудыг төмөр замаар тээвэрлэж авчраад удаагүй байсан ба бүрэн устгасан байх магадлалтай. Хэд хоног шатав.
  2. Краснодар хязгаарын Ейск аэродромд цохилт өгөв. Эндээс Ираны шахид дрон нисгэдэг, тэр нь шатсанаас гадна “Кинжалы горят как спички” хэмээн нүдээр харсан орос хүн нотлон бичжээ. Яг чүдэнз шиг дүрэлзэж байв.
  3. Ростов мужийн Миллерово аэродром түймэрт автав. Юу юу шатсан нь хожим тодорно.
  4. Волгодонск хотод цахилгаан станцын ойролцоо дэлбэрэлт сонсогдов.
  5. Приморско-Ахтарск хотод дрон хөөргөдөг газарт цохилт өгсөн ч амжилтгүй.
  6. Воронеж хотод дрон устгаж байхдаа алдаа гаргаснаас хэлтэрхий нь иргэний байгууламж дээр унасан гэжээ.

 

Ейскийн аэродром гэхэд л ер нь байхгүй болсонтой адил. Тус бүртээ 6 ширхэг Х-47 Кинжал пуужин хөөргөдөг байсан 10 суурь дэлбэрсэн мэдээ байна. Энэ нь ойролцоогоор 60 ширхэг пуужин дэлбэрсэн гэсэн үг юмУкраины зэвсэгт хүчний зэвсэглэлд лазерын эрчим хүчний зэвсэг (лазерное энергетическое оружие следующего поколения) нэвтэрч байлдаанд ашиглаж эхлэв. Оросуудыг ёстой хяргаж байна.

 

Путин ОХУ-ын ҮАБЗ-ийн хурлыг зарлан хуралдуулж “Цөмийн дайнаас сэргийлэх доктрина”-даа (номлол) өөрчлөлт оруулах болжээ:


  1. Цөмийн зэвсэггүй аливаа улс цөмийн зэвсэгтэй улсын оролцоо дэмжлэгтэйгээр түрэмгийлбэл Орос руу хийсэн хамтарсан дайралт гэж үзэх;
  2. ОХУ-ын эсрэг агаарын довтолгооны төрөл бүрийн зэвсэг нисгэх тухай найдвартай мэдээлэл байвал цөмийн зэвсгээр хариу арга хэмжээ авах;
  3. ОХУ-ын бүрэн эрхт байдал, ердийн зэвсэглэлд ноцтой аюул учруулах нь цөмийн зэвсгээр хариу арга хэмжээ авах үндэс болох;
  4. Холбооны улсын гишүүний хувьд Беларусийн эсрэг түрэмгийлсэн тохиолдолд ОХУ нь цөмийн зэвсэг ашиглах эрхтэй гэжээ.


Айлгаж эхлэжээ. Гэхдээ ээлжит. Путины өгсөн сануулга тоогоо алдсан. Оросын цөмийн зэвсгийн заналхийлэлд дэлхий нийтээрээ цочрохоо больсон. Украин бол бүр ч падгүй гэсэн царайтай. 1993-1994 оны Украины Батлан хамгаалахын сайд армийн генерал Виталий Радецкий “ОХУ нь цөмийн зэвсгээ арчилж тордож байлдаанд бэлэн байлгахын тулд батлан хамгалахын нийт зардлынхаа 40-өөс доошгүй хувийг (жилд наад зах нь 45-65 тэрбум $US) зарцуулах ёстой. Тэгж чадаагүй, одоо өнгөрсөн” гэжээ. Анхлан Украин руу довтлохдоо Путин барууныхныг тусалбал хариу нь маш хүнд бууна гэж шазруун занасан, эхний гурван өдөр Киевийг тойрч бүтэлгүй давшаад ухрахдаа “Цөмийн зэвсгүүдээ байнгын өндөржүүлсэн бэлэн байдалд оруул!” гэж Шойгу, Герасимовт үүрэгдээд гаргаж байсан. Түүнээс хойш цөмийн зэвсгээр үнсэн товрого болгоно, Лондонг далайд живүүлж, Берлиний тэнгэрт мөөгөн үүл үүсгэнэ гэж 2.7 жилийн турш Кремлийн хайртай суртал ухуулагчдаар байнга хараалган яриулав. Тийм учраас “ээлжит” заналхийлэл гэж үзнэ. Путин айлгаж л байдаг, цөмийн зэвсгээр хуйхлана л болдог, Сармат пуужин нь цооногтоо дэлбэрээд л. 

 

Оросын ТВ-ээр ярьж байна. Сансарт яваа барууны тагнуулын хиймэл дагуулыг эхлээд устгая, дараа нь бүх хиймэл дагуулыг нь устгая, тэд ч манайхыг устгаг, тэгээд хиймэл дагуулгүй амьдарцгаая. Тэгснээ “Йемений хуситуудад цөмийн зэвсэг өгөөд тэдний гараар АНУ-ын цэрэгт цохилт өгүүлье” гэж цуурав.

 

Оросын пуужинт цэргийн хурандаа ярьж байна: 2016 оноос хойш 5 удаа туршиж нисгэж байсан Сатана пуужингуудын 4 нь дэлбэрч, уурхайн цооногийнхоо ойролцоо унасан. Ийм байхад Оросын генералууд цөмийн дайнд АНУ-ыг ялна гэж итгэх үү? Пуужингийн салбарын хамаг ололт, амжилт, патент, ноу-хаунууд Хойд Солонгос, Хятад, Иран руу арилжигдсан. Оросоос өөр авах юм байхгүй гээд Иран, Хятад хоёр саяхан хоёул хоёулаа НҮБ-ын индэрт Оросын эсрэг үг хэлцгээлээ. Үүний цаана Орос нь Хойд Солонгостойгоо үлдэж, бусад түншүүддээ хаягдаж байна гэж аналитикууд уралдан дүгнэж байна. Байдал ийм л байна гэжээ. Агаарт замхарсан Путины заналхийллийн үгсийг сөргүүлэх баримт захаас аван ийм л байна. Түүх сөхөж үнэн баримт дэлгэсэн ч болно. Гитлерийн фашизмыг Улаан арми баатарлагаар сөнөөлөө гэдэг боловч хэрэв АНУ туслаагүй бол яагаад ч дийлэх аргагүй байв.


Сталин өөрөө хүртэл АНУ-ын лэндлизгүйгээр СССР дайнд ялах боломжгүй байсан гэжээ. Танкийн хуягны тусгай ган 100%, дарь тэсрэх бодис 90%, нисэх онгоцны түлш 100%, 22 000 байлдааны онгоц бүгдийг АНУ нийлүүлжээ.

 

Путины шахуу тушаал–“10 дугаар сарын 1 гэхэд Курскээ бүрэн чөлөөлсөн бай” гэсэн нь агаарт замхарлаа. Курсктээ оросын цэрэг өөрөө ялагдаж байна. Одоо буруутан оросын генерал хурандаа нар нэг бол шоронд, нэг бол өөрийгөө боймлоно. Цуврал амиа егүүтгэл оросын армийн дээдчүүдийн дундаас ундарна. Төгсгөлд нь Казахстаны Үндэсний аюулгүй байдлын хороог хоёр удаа толгойлсон хошууч генерал Альнур Мусаевын “Украины ялалт ойрхон байна” гэж ярьсныг дурдаад эндээс юу харагдаж байна, эрүүл ухаантай монголчууд аа гэж ам асууя? Оросын үзэл суртлын тархи угаалтад төөрч будилж, Путин ялахыг хүсэн хүлээж, тэр талын суртал нэвтрүүлэгт хөөрч, хараалаа урсгаж байгаа бол Та бүтэшгүй цөхрөлөөсөө яаралтай салах хэрэгтэй. Украин ялагдаасай гэж мянгантаа залбирч ламд очиж ном уншуулаад ч өнгөрлөө!


Адьяaгийн Батсайхан (бэлтгэл хошууч)