“Хятад, Лаосын хувь заяаны цогц нэгдэл илүү өндөр түвшинд хүрнэ”, “Энэхүү айлчлал нь уламжлалт нөхөрлөлийг бэхжүүлж, янз бүрийн салбарт харилцан ашигтай хамтын ажиллагааг өргөжүүлэх зорилготой”, “Лаос Хятадын хөгжлийн туршлагаас суралцахыг хүсэж байна”... Лаосын Ардын Хувьсгалт Намын Төв Хорооны Ерөнхий нарийн бичгийн дарга, Лаос улсын дарга Тонглун Сисулитын 6-р сарын 2-ноос 6-ны хооронд Хятадад хийсэн төрийн айлчлал Хятад, Лаос болон олон улсын хэвлэл мэдээллийн хэрэгслээс эерэг үнэлгээ авч байна.

Айлчлалын үеэр хоёр нам, төрийн дээд удирдагчид Хятад, Лаосын харилцаанд шинэ үсрэлтийг ахиулж, шинэ эрин үед бүх цагт хувиршгүй Хятад, Лаосын хувь заяаны цогц нэгдлийг хамтран байгуулахаар санал нэгтэй тохиролцов. Шинжээчид энэ нь хоёр нам, улс орнуудын харилцааг шинэ түүхэн эхлэлийн цэг дээр хөгжүүлэх зураг төслийг гаргаж, Хятад-Лаосын харилцаа, тэдгээрийн орчин үеийн шинэчлэлийн хүчин чармайлтыг шинэ шатанд гаргахад хүчтэй түлхэц өгч, хүн төрөлхтний хувь заяаны цогц нэгдлийг байгуулах үлгэр жишээ болно гэж үзэж байна.

Тонглун Сисулитын Хятадад хийсэн айлчлал нь Лаосын Ардын Хувьсгалт Намын Төв Хорооны Ерөнхий нарийн бичгийн дарга, Лаос улсын даргаар дахин сонгогдсоноос хойш хийсэн анхны албан ёсны гадаад айлчлал байсан бөгөөд Хятад, Лаосын хооронд дипломат харилцаа тогтоосны 65 жилийн ой, "Хятад-Лаосын найрамдлын жил"-тэй давхцаж байгаа нь маш чухал ач холбогдолтой юм. 2017 онд хоёр нам, улс орны дээд удирдагчид стратегийн ач холбогдолтой Хятад-Лаосын хувь заяаны цогц нэгдлийг хамтран байгуулахаар санал нэгтэй тохиролцсон. 2019, 2023 онд хоёр орны тэргүүн мөн "Хятад-Лаосын хувь заяаны цогц нэгдлийг байгуулах тухай Хятадын Коммунист Нам болон Лаосын Ардын Хувьсгалт Намын хоорондын үйл ажиллагааны төлөвлөгөө"-нд гарын үсэг зурж, хамтран хэрэгжүүлэхийг дэмжсэн юм.

Шинэ нөхцөлд Хятад, Лаосын харилцаа, хувь заяаны цогц нэгдлийг хэрхэн илүү өндөр стандарт, илүү өндөр чанар, илүү өндөр түвшинд тасралтгүй урагшлуулах вэ? Ши Жиньпин Тонглун Сисулиттэй хийсэн хэлэлцээний үеэр социалист чиглэлийг баримтлах, харилцан ашигтай хамтын ажиллагааны суурийг бататгах, ард түмний уламжлалт нөхөрлөлийг бэхжүүлэх, гадаад бодлогын уялдаа холбоог сайжруулахыг санал болгов. Шинжээчид эдгээр дөрвөн зүйл нь "Шинэ эрин үед бүх цагт хувиршгүй Хятад, Лаосын хувь заяаны цогц нэгдлийг хамтран байгуулах" замыг тодорхой болгож, хоёр талын харилцааны ирээдүйн хөгжлийн стратегийн удирдамж болж байгааг онцолжээ.

Улс төрийн харилцан итгэлцэл бол үндсэн зүйл юм. Хятад улс Лаосыг хөршийн дипломат харилцааныхаа чухал чиглэл гэж үзсээр ирсэн бөгөөд Лаосыг өөрийн улсын нөхцөл байдалд тохирсон социалист замыг баримтлахад нь тууштай дэмжиж ирсэн юм. Дэлхий ертөнц болон бүс нутгийн нарийн төвөгтэй, өөрчлөгдөж буй нөхцөл байдалтай тулгарч буй энэ үед Хятад, Лаосын хооронд өндөр түвшний улс төрийн харилцан итгэлцлийг бэхжүүлэх нь зөвхөн тус тусын хөгжил, сэргэлтэд ашиг тусаа өгөхөөс гадна дэлхийн социалист үйл хэргийн хөгжлийг дэмжих болно.

Өндөр чанартай харилцан ашигтай хамтын ажиллагааг гүнзгийрүүлэх нь Хятад, Лаосын хоёр талын харилцааны статусыг дээшлүүлэх чухал зүйл юм. Одоогийн байдлаар Хятад улс Лаосын хамгийн том хөрөнгө оруулагч, хоёр дахь том худалдааны түнш юм. Хоёр талын худалдаа 2025 онд 9.82 тэрбум ам.долларт хүрч, өмнөх оны мөн үеэс 19.3%-иар өсжээ. "Бүс ба Зам" санаачилгын түүхэн төсөл болох Хятад-Лаосын төмөр зам ашиглалтад орсноос хойш дөрвөн жилийн хугацаанд зорчигч тээврийн галт тэрэг 100 мянга гаруй удаа ажиллуулж, 73 сая гаруй зорчигч, 84 сая гаруй тонн ачаа тээвэрлэж, Хятад, Лаосын хооронд харилцан ашигтай хамтын ажиллагаа, бүс нутгийн эдийн засгийн хөгжлийг дэмжих "алтан гарц" болсон юм.

Тонглун Сисулит Хятадад айлчлах үеэрээ Жэжян мужийн Ханжөү хотод роботын ур чадварын үзүүлбэрийг сонирхож, Бээжин дэх Хятадын Сансрын Технологийн Академид зочилж, Хятадын сансрын технологийн салбарын ололт амжилтын талаар мэдээлэл авчээ. Лаосын хэвлэл мэдээллийн хэрэгслүүд энэ нь Хятад-Лаосын хоёр талын хамтын ажиллагаанд инновацийн үйлдвэрлэл, дижиталчлал улам бүр чухал үүрэг гүйцэтгэж байгааг харуулж байна гэж үзэж байна.

Хэлэлцээрийн үеэр Хятад улс Хятад-Лаосын эдийн засгийн коридорын дагуух хамтын ажиллагааг сайжруулах; Хятад-Лаос-Тайландын төмөр замын холболтыг хурдасгах; хөдөө аж ахуй, цахилгаан эрчим хүч зэрэг уламжлалт салбаруудын хамтын ажиллагааг бэхжүүлэх; хиймэл оюун ухаан, дижитал эдийн засаг зэрэг шинээр гарч ирж буй салбаруудад хамтын ажиллагааг өргөжүүлэхийг санал болгов.

Уул усаар залгалдсан социалист орнууд болох Хятад, Лаос хоёр орон газарзүйн хувьд ойрхон, соёлын хувьд ижил төстэй байдаг. Хоёр тал энэ жилийн "Хятад, Лаосын найрамдлын жил"-ийг янз бүрийн салбарын хамтын ажиллагааг өргөжүүлэх, хоёр ард түмний харилцан ойлголцол, нөхөрлөлийг бэхжүүлэх боломж болгон бүрэн ашиглах болно.