sonin.mn
Сэтгэгдэл (4)

МАН-ын Бага хурлын II хуралдааны эхэнд УИХ-ын дарга, МАН-ын дарга Н.Учрал илтгэл тавихдаа: "Монгол Ардын намын даргын хувьд прокурорын байгууллагаас авлига, албан тушаалын хэрэгт яллагдагчаар татагдсан УИХ-ын гишүүн Д.Амарбаясгалан, Эрчим хүчний сайд асан Н.Тавинбэх, Үндсэн хууль зөрчсөн нь Үндсэн хуулийн Цэцийн дүгнэлтээр тогтоогдсон УИХ-ын гишүүн Х.Булгантуяа,


Нам дамнасан бүлэглэл байгуулж, нийгмийг эмх замбараагүй байдалд удаа дараа турхиран Монгол Ардын намын бодлого, үйл ажиллагааг зохион байгуулалттайгаар гүтгэн харлуулж, намын бодлогыг хувийн оффисоос гуйвуулан завхруулж, намын гишүүний ёс зүй, сахилга хариуцлагыг уландаа гишгэсэн Бага хурлын гишүүн асан А.Амундра


нарыг Монгол Ардын намын гишүүнээс чөлөөлөх нь зүйтэй гэж үзэж байна. Намын үндсэн дүрэмд заасны дагуу эдгээр гишүүдийг намаас түдгэлзүүлэх асуудлыг шийдвэрлүүлэхээр Хяналтын Ерөнхий хороонд албан ёсоор хандаж байна." гэсэн билээ.


Үүнтэй зэрэгцэн МАН-ын гишүүдээс орлогоо нотолж чадаагүй Л.Оюун-Эрдэнэ, авлигын хэрэгт холбогдсон Д.Тогтохсүрэн нарыг ч бас намаас хөөх шаардлага олноор ирүүлж байгаа болохыг эх сурвалжууд өгүүлж байна.


Иймээс ч МАН-ын Хяналтын хороо хуралдаж Д.Амарбаясгалан, Х.Булгантуяа, А.Амундра, Н.Тавинбэх нарыг чөлөөлөх асуудлыг авч хэлэлцэхдээ Л.Оюун-Эрдэнэ, Д.Тогтохсүрэн хоёрыг нэгтгэж магадгүй болжээ. Сонирхолтой нь Л.Оюун-Эрдэнэ, Д.Тогтохсүрэн нарыг намаас хөөх гомдол гаргагчид дотор Д.Амарбаясгалангийн фракцийнхан ч нилээн байгаа юм байна. Тэд Л.Оюун-Эрдэнэд ашиглагдаж хохирсоор байгаад дууслаа хэмээн ихэд ууртай байгаа бололтой.


Э.Солонго