sonin.mn
Сэтгэгдэл (2)

Ерөнхий сайд Г.Занданшатар шатахууны зохиомол хомсдол үүсгэж байгаа компанийг олж тогтоож, тусгай зөвшөөрлийг нь цуцлах хүртэл хариуцлага тооцохыг албан тушаалтнуудад үүрэг болгосон. Түүний энэ үг шатахууны зохиомол хомсдол үүсгэх зорилготой хүмүүс бодитоор байгааг нэг талаас нотолж байна. УИХ-ын дарга асан Д.Амарбаясгалангийн зөвлөхөөр О.Содбилэг ажиллах болсонтой шатахууны хомсдол яагаад ч юм цаг хугацааны хувьд давхцаж байгаа нь хачирхалтай. УИХ-ын гишүүн асан О.Содбилэг "Петровис" компанийн эзэн гэдгийг монголчууд мэднэ. Анх "Нефть импорт концерн" улсын мэдэлд байхад "Эрдэнэт" үйлдвэрийн мөнгөөр хувьчилж авсан гэж тухайн үед хэвлэлээр шуугиж байв. Хэрэг хуучирдаггүй, хэрээ цайдаггүй гэдэгчлэн энэ хувьчлалын хуудуутай маапаантай асуудлыг дахин сөхөж, мухарлах шаардлагатай. 


О.Содбилэг УИХ-ын даргын зөвлөхөөр ажиллах болсноор улс төрд эргэн иржээ.


Хачирхалтай нь түүний шинэ албан тушаалтай хамт шатахууны хомсдол гэнэт нүүрлэсэн. Шатахуун импортлогч компаниуд эрвийх дэрвийхээрээ ажиллаж байгаа ч "Петровис-ын ШТС-ууд нөөцтэй хэрнээ өгөхгүй байгаа талаар жолооч нар гомдоллох боллоо. Учир нь АҮЭБЯ-ны албан мэдээлэлд сүүлийн 48 цагийн хугацаанд Петровисын нөөцийн агуулахад 1200 тонн АИ92 шатахуун буусан гэжээ. Эндээс харвал О.Содбилэг шатахуун борлуулах тусгай зөвшөөрлөөрөө улс төр хийж, зохиомол хомсдол үүсгээд байна уу гэх асуулт, хардлага гарна. Зуд болоход нохой зоолно гэдэг шиг зохиомол хомсдол үүсгэж, Засгийн газрыг муухай харагдуулах хуйвалдаан зохион байгуулсан гэх үндэслэл, учиг байгаа учраас Ерөнхий сайд шалгаж тогтоох үүрэг өгсөн байж таарна. Шатахууны зохиомол хомсдол үүсгэх замаар улс төрийн шантааж хийсэн нь нотлогдвол тусгай зөвшөөрлийг нь цуцлах хүртэл арга хэмжээ авах ёстой. Шатахуун бол төр юм гэх үгийн цаана ч иймэрхүү зохиомол хомсдол үүсгэдэг, үгсэн хуйвалдаж үнээ нэмдэг шударга бус өрсөлдөөн энэ салбарт амь бөхтэй оршсоор байгааг илтгэсээр байна.


Б.Намуун