sonin.mn
Сэтгэгдэл (17)

Монгол төрд тооноор орсон Э.Болормаа монгол төрийн босгонд нь бүдрээд гарах гэж байна. Гадаадын уул уурхайн “Ханбогд Эксплорайшн” компаниас сонгуулийн хандив авсан нь илэрч, төрд тооноор орсон ч босгоор нь гарах нь цаг хугацааны асуудал болсон Э.Болормаад төсвийн хөрөнгийг зүй бусаар зарцуулсан хэрэг нэмэгдсэн байна. Э.Болормаа Ховдын засаг дарга байхдаа 2024 оны 4-р сард Д.Амарбаясгалангийн “Соёмбо принтинг”, “Соёмбо пресс”, “Тайшир-Өргөө” болон “Ви Ай Пи лоор” компаниудтай 17-19 сая 900 мянган төгрөгийн гэрээ байгуулан жижиглэж, тендерийн босго үнэд хүргэлгүй хувааж сэтгүүл хэвлүүлэн, өрх бүрд тарааж, сонгуулийн сурталчилгаанд зориулсан байж болзошгүй гэж аймгийн аудит дүгнэж, хуулиар шалгуулах саналаа Ерөнхий аудитортоо гаргажээ.


УИХ-ын дийлэнх олонх 67 гишүүн Д.Амарбаясгаланг нүүрсний нэр холбогдсон хэргээ албан тушаалгүйгээр шалгуулах шаардлага тавьсан байхад Э.Болормаа улайран өмөөрч байгаа нь нэг ашиг сонирхлоос үүдэлтэй байна.


Монгол төрд гадаадын иргэн, компаниас хандив мөнгө авч тооноор орохыг хуулиар тас хориглодог. Төрөө сонгон байгуулах эрхэнд гадаадын этгээд хандив мөнгөөр халдах, нөлөөлөх, худалдан авахаа сэргийлсэн хуультай. Үндэсний, аймгийн аудитын газрууд удаа дараалан илрүүлж, санал дүгнэлтээ гаргасаар байтал хуулийн хариуцлага тооцохгүй байгаа нь тооноор орж ирэгсдийг өөгшүүлж байна. Э.Болормааг сонгууль, төсөв, Худалдан авах ажиллагааны хуулиуд зөрчсөн гэж үзэн, авлига, албан тушаалын хэргээр шалгаж байгаа нь УИХ-ын гишүүнээс эргүүлэн татах үндэслэл юм. Э. Болормаа төрд тооноор орж ирсэн ч тотгонд нь мөргөөд, босгонд нь бүдрээд буцаж гарах цаг ойрхон байна. 


 



Б.Уянга