sonin.mn
Сэтгэгдэл (19)

2012-2016 онд нийслэлийн Засаг дарга бөгөөд Улаанбаатар хотын захирагчаар Э.Бат-Үүл ажиллаж байсан. Тухайн жилүүдийн нийтийн эзэмшлийн газрыг хувьчилсан хууль бус наймаанаас үүдсэн газрын зөрчил өнөөг хүртэл арилаагүй хэвээр. Тухайлбал, хуучнаар “Ард” кино театрын 3595 ам.метр газрыг 2014 оны нийслэлийн Засаг дарга Э.Бат-үүлийн А/500 дугаар захирамжаар “Од театр” ХХК-д шилжүүлжээ. Саяхан одоогийн хотын дарга Х.Нямбаатар театрын урд талын ногоон байгууламжийг буцаан нийтийн эзэмшилд шилжүүлсэн. “Ард” кино театрын газраас ойролцоогоор 1541 ам.метр талбайг нийтийн эзэмшилд шилжүүлсэн нь энэ. 


Мөн Э.Бат-Үүлийн хотын дарга байх үед буюу 2015 оны нэгдүгээр сарын 20-ны өдрийн А/54 захирамжаар Баянгол дүүргийн 2 дугаар хороо, Соёлын төв ордны зүүн талд байрлалтай Монголын үйлдвэрчний эвлэлийн холбооны 13757 ам.метр хэмжээтэй газраас 640 ам.метрийг нь үйлчилгээ, соёл урлагийн зориулалтаар ашиглуулахаар газрыг олгосон байна. Дахин Э.Бат-Үүлийн 2016 оны А/150 тоот захирамжаар 1681000560 нэгж талбарын дугаартай 1769 ам.метр газарт үйлчилгээ, соёл урлагийн зориулалттай барилга бариулахыг зөвшөөрчээ. 


Э.Бат-Үүл энэ бүх нийтийн эзэмшлийн газрыг хууль бусаар, өөрийн эрх ашигт нийцүүлэн хувьчилсны уршгаар өнөөдөр “Луминари” ХХК, Монголын үйлдвэрчний эвлэлийн холбооны 1769 ам.метр болон 13757 ам.метр эзэмших эрхийн газарт Соёл, сургалт, үйлчилгээний зоорьтой 16 давхар цутгамал төмөр бетон карказан барилга баригдахаар болжээ. “Ард” кино театрын барилгын газар дээр ч гэсэн 26 давхар худалдаа, үйлчилгээний төв бариулахаар олон жил яригдаж байгаа. 

Э.Бат-Үүлийн нийтийн эзэмшлийн газрыг өөрийн ах дүү, садан төрөл, ажлын хамаарал бүхий хүмүүсийн мэдэлд хууль бусаар шилжүүлсний балаг түүнийг хотын даргын эрх мэдлээ хэрэгжүүлж эхэлснээс хойш 13 жилийн дараа ч гэсэн үргэлжилсээр байна.