Нийслэлийн Засаг дарга бөгөөд Улаанбаатар хотын Захирагч Д.Сумъяабазар өнөөдөр Итали Улсаас Монгол Улсад суугаа Онц бөгөөд Бүрэн эрхт Элчин сайд Лаура Ботта тэргүүтэй Италийн үндэсний судалгааны зөвлөлийн төлөөлөгчидтэй уулзаж, “3R4UB” төслийн талаар санал солилцлоо. Улаанбаатар хотын байгалийн нөөцийн тогтвортой хэрэглээг хангах 3R /ариглая, ангилъя, ашиглая/ дадал буюу “3R4UB” төсөл нь нийслэлийн хог хаягдлын менежментийг сайжруулах, ногоон эдийн засгийг дэмжих зорилготой юм.
Уулзалтын эхэнд Нийслэлийн Засаг дарга “Улаанбаатар хот эдийн засгийн хувьд бие даан хөгжихөөр зорьж буй энэ цаг үед байгалийн нөөцийн тогтвортой хэрэглээг хангах “3R4UB” төслийг 2024 он хүртэл хамтран хэрэгжүүлэх болсонд баяртай байна. Дэлхий нийтийн хөгжлийн чиг хандлага болсон ногоон хөгжлийг бий болгох, нүүрстөрөгчийн ялгарлыг багасгах, улмаар байгалийн нөөцийг үр ашигтай ашиглахад чиглэсэн энэхүү төсөл нь хог хаягдлын менежментийг сайжруулах, иргэд олон нийтэд хог хаягдлыг багасгах, зүй зохистой ангилан ялгах зэрэг зөв уриалгыг хүргэхэд чухал ач холбогдолтой. Иймд Хотын даргын хувьд бүх талаар дэмжин ажиллахад бэлэн байна. Мөн төсөл хэрэгжиж буй салбарт хүний нөөц бэлтгэх чиглэлээр хамтран ажиллахад таатай байх болно” хэмээлээ.
Элчин сайд Лаура Ботта судалгаа болон түүнээс гарах дүгнэлт чухал хэдий ч үүнийг үр дүнтэй болгох гол хүчин зүйл бол бодлого, шийдвэр гэдгийг онцолж байв. Мөн Италийн үндэсний судалгааны зөвлөлийн төлөөлөгчдийн зүгээс төслийн хүрээнд Улаанбаатар хотын хог хаягдлын менежмент, тулгамдаж буй асуудал зэрэгт үндэслэн мастер төлөвлөгөө гаргахаа хэлж байлаа. Нийслэлийн хэмжээнд жилд дунджаар 1.3 сая тонн ахуйн болон үйлдвэрлэлийн хог хаягдал бий болдог бөгөөд Улаанбаатар хот үүнээс 11.4 хувийг нь дахин боловсруулах хүчин чадалтай. Нийслэлд бүртгэлтэй нийт 34 хог хаягдал дахин боловсруулах үйлдвэр байгаагаас одоогийн байдлаар 14 байгууллага идэвхтэй үйл ажиллагаа явуулж байна. Тэдгээр нь гол төлөв хуванцар болон бор цаасны дахин боловсруулалт хийдэг.
Сэтгэгдэл0
Баянгол дүүргийн хогны менежментийг сайжруулна уу, үнэхээр хэцүү байна. Цагтаа хогоо ачиж тээвэрлэнэ гэж байхгүй, дандаа араасаа утасдуулна, яриулна, сүүлдээ муудах болно. Яагаад яагаад ийм юм бэ. Хог тээвэрлэлтээ хувийн хэвшилдээ өг л дөө. Төрийн үйлчилгээний байгууллага нь чадахгүй бна. Хогондоо дарагдаж суумааргүй байна, төлбөрөө төлсөн ч хогоо ачуулж чадахгүй бна. Нэг л их гоё ярьсан хүмүүс. МАН нь ч АН нь ч дүүргийн ЗД хийгээд хогны асуудлаа шийдэж чадсангүй, тэгээд УИХ-н гишүүн болоод том том юм ярьцгаана. Хог новшноос тухай бүр салгаж чаддаг ажилсаг хичээнгүй, чин сэтгэлтэй хот, дүүргийн ЗД хотын иргэд бидэнд хэрэгтэй.
Хог хаягдалаа маш олон төрлөөр ялгаж чаддаг,эргээд хог хаягдалаасаа дулаанаа гаргаж авч чаддаг,хуванцар савнуудыг үртэс болтол нунтаглаад юутай хольж буйг нь мэдэхгүй үнэхээр авто замаа барихдаа маш сайн зам барьж бнга тордож бдаг Улс бол Дэлхийн диваажин гэгддэг Швейцари орон шүүү! Итали бол хөгжлөөр тааруу орон мэдээж яаэ Швейцарийн мундаг Хариуцалгатайг гүйцэх вээ