sonin.mn
Сэтгэгдэл (6)

Трансжендер тамирчинтай тулалдахаас татгалзсан Америкийн туялзуур сэлэмчин Стефани Тернерийг Мэрилэнд муж улсад болсон орон нутгийн чанартай тэмцээнээс хасжээ.


3 дугаар сарын 30-нд болсон уг тэмцээнийг АНУ-ын Туялзуур сэлмийн холбоо зохион байгуулсан бөгөөд Үндэсний оюутны спортын холбооны /NCAA/ тэмцээнүүдийн хуваарьт ороогүй байна.


Тулаан эхлэхийн өмнө Тернер хамгаалалтын дуулгаа авч, өвдөг дээрээ сөхрөн суугаад трансжендер тамирчин Редмонд Салливантай тулалдахгүй хэмээн эсэргүүцлээ илэрхийлсэн байна. АНУ-ын Туялзуур сэлмийн холбоо мэдэгдэхдээ “Тернерийг зөвхөн энэ удаагийн тэмцээнээс хассан бөгөөд энэ нь өрсөлдөгчтэйгээ тулалдахаас татгалзсантай шууд холбоотой” гэжээ. 


“Намайг тулалдах гэж байна хэмээн Редмонд бодсон байж магадгүй. Харин би өвдөг дээрээ сөхрөн суугаад шүүгчид хандан “Уучлаарай, би тулалдаж чадахгүй нь. Би бол эмэгтэй хүн, тэр бол эрэгтэй хүн. Энэ бол эмэгтэйчүүдийн тэмцээн” гэж хэлсэн хэмээн Тернер Fox News телевизээр ярилаа.


Ташрамд дурдахад, АНУ-ын Ерөнхийлөгч Д.Трамп 2028 оны Лос-Анжелесын Олимпын наадамд трансжендер тамирчдыг оролцуулахгүй мэдэгдсэний сацуу Америкийн их сургуулиудын эмэгтэйчүүдийн тэмцээнд трансжендерүүдийг оролцохыг хориглосон зарлигт гарын үсэг зурсан юм. 




Б.Адъяахүү