sonin.mn
Сэтгэгдэл (0)

Хойд Америкийн Үндэсний хоккейн лигийн /NHL/ “Вашингтон Кэпиталз” багийн ахлагч, Оросын довтлогч Александр Овечкин “Каролина Харрикейнз” багтай талбайд нь хийсэн тоглолтын 40 дэх минутанд шайб орууллаа.


Ингэснээр өдгөө 39 настай тэрбээр тус лигт 892 дахь гоолоо оруулсан бөгөөд NHL-ийн түүхэнд хамгийн олон гоол оруулсан Канадын домогт хоккейчин Уэйн Гретцкигийн амжилтыг давтахын тулд 2 шайб, эвдэхийн тулд 3 шайб хийх үлдлээ.


У.Гретцки 1487 тоглолтод оролцохдоо нийт 894 гоол оруулсан юм. Ташрамд дурдахад, А.Овечкин NHL-д нийт 1487 тоглолт хийсэн үзүүлэлтээр 27 дугаарт бичигдсэн бол 26 дугаарт Гретцки /1487/ орж байна. Түүнчлэн тэрбээр өчигдөр “Бостон” багтай хийсэн тоглолтод шайб оруулснаар 30 ба түүнээс дээших насандаа оруулсан гоолын тоогоор Канадын довтлогч Горди Хоугийн тогтоосон рекорд амжилтыг /415 гоол/ эвдсэн юм.


Энэ удаагийн тоглолтод "Каролина" баг өөрийн талбайд 5:1 харьцаагаар вашингтончуудыг хожсон байна. Тус багийн Шон Уокер (7 дахь минут), Жексон Блейк (11, 47), Сет Жарвис (14), Логан Стэнковен (30) нар “Вашингтон”-ы хаалганд гоол оруулжээ.


Нэгдүгээр үед хаалгандаа 3 гоол алдсан хаалгач Логан Томпсоны оронд Чарли Линдгрен талбайд гарсан байна. "Вашингтон" ба "Каролина" багууд Дорнод конференц ба Нийслэлийн дивизионд эхний хоёр байрыг эзэлж байгаа юм. “Вашингтон” баг 75 тоглолтын дараах байдлаар 105 оноо, “Каролина” 74 тоглолтод 96 оноо тус тус авчээ. Дараагийн удаад Овечкиний баг 5-нд шилжих шөнө өөрийн талбайд “Чикаго Блэкхокс” багийг хүлээн авч тоглоно. 




Б.Адъяахүү