sonin.mn
Сэтгэгдэл (4)

Хойд Америкийн Үндэсний хоккейн лигийн /NHL/ “Вашингтон Кэпиталз” багийн ахлагч, Оросын довтлогч Александр Овечкин “Бостон Брюинз” багтай талбайд нь хийсэн тоглолтын 16 дахь минутанд шайб орууллаа.


Ингэснээр өдгөө 39 настай тэрбээр тус лигт 891 дахь гоолоо оруулсан бөгөөд NHL-ийн түүхэнд хамгийн олон гоол оруулсан Канадын домогт хоккейчин Уэйн Гретцкигийн амжилтыг давтахын тулд 3 шайб, эвдэхийн тулд 4 шайб хийх үлдлээ. У.Гретцки 1487 тоглолтод оролцохдоо нийт 894 гоол оруулсан юм.


Энэ удаагийн тоглолтод вашингтончууд “Бостон” багийг талбайд нь 4:3 харьцаагаар хожсон байна. Одоогийн байдлаар Овечкин энэ улиралд 38 шайб оруулж, 26 гоолын дамжуулалт хийгээд байна. Мөн 140 дэх удаагаа нэг тоглолтод 3 ба түүнээс оноо авсан бөгөөд энэ үзүүлэлтээр 19 дүгээрт бичигджээ.


Түүнчлэн 30 ба түүнээс дээш насандаа оруулсан гоолын тоогоор Овечкин NHL-ийн дээд амжилтыг тогтоолоо. Тэрбээр “Бостон”-ы хаалганд шайб хийснээр тус лигт 416 дахь гоолоо оруулж, Канадын довтлогч Горди Хоугийн тогтоосон амжилтыг /415 гоол/ эвджээ.


Мөн NHL-ийн түүхэнд тоглолтын нэгдүгээр үед оруулсан гоолын тоогоор Гретцкигийн тогтоосон рекорд амжилтыг /241 гоол/ давтлаа.  


Одоогийн байдлаар “Вашингтон” баг 74 тоглолтод 105 оноо авснаар Нийслэлийн дивизионыг тэргүүлж байгаа бөгөөд улирал дуусах хүртэл 8 тоглолт хийх үлдсэн байна. Дараагийн удаад вашингтончууд 3-ны өдөр “Каролина Харрикейнз” багтай талбайд нь тоглоно. Өмнө нь NHL-ийн комиссар Гэри Беттмэн хэлэхдээ, Овечкин рекорд тогтооход 4 гоол үлдсэн тэр мөчөөс эхлэн У.Гретцкитэй хамт "Вашингтон" багийн тоглолтуудыг үзнэ гэж байв. 



Б.Адъяахүү