sonin.mn
Сэтгэгдэл (72)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд анхнаасаа Орост ээлгүй байсан. Одоо ч тэр. Орос Курскээ 100% чөлөөлж чадаагүй байхдаа л Белгород муж руугаа Украины цэргийг тавиад туучихлаа. Оросын зэвсэгт хүчин стратеги–оперативын нөөцөө шавхан фронтод байлдаж байна.


Гурван өдрийн “чөлөөлөх ЦТА”-ны бүтэн гурван жилд стратегийн ганц ч том ялалтгүй, маш их хохиролтой байлдаж байгаатай нь холбогдуулан фронт дээр өрнөсөн байлдааныг цэргийн урлаг талаас нь үргэлжлүүлэн тайлбарлая.


Орост дээр доргүй нэг л үнэнийг ойлгож мэдэрч байна. Төв Банк нь аль дээрээс сануулсан. Тэр нь энэ дайн үргэлжлэх тусам Оросын хувьд сүйрэл болно. Сүйрэл ойртох тусам Орос ялалтын тухай дэмий ярих нь ихсэж, Украиныг Европтой нь хамт буулгаж авах шаардлагаа цөхөртлөө тавьж, ялалт ойртсон тухай Путины суртал нэтрүүлэгчид үлгэр зохионо. Хараалаа ч урсгана.


Эрчим хүч рүү харилцан довтлохгүй гэсэн тохиролцооны хамгийн эхэнд “Оросын нефтийн байгууламжууд” гэж бичээтэй байгаа нь Орос ойрын үед нефтийн салбарт маш том катастроф амсах нээ гэдгийн дохио сануулга юм.


Тийм учраас Оросын чин хүсэл бол Трампын тэнэгтэлийг ашиглаад Барууны хоригоос Оросыг нэн даруй гаргах явдал хэмээн украины ба барууны экспертүүд үздэг. Украин эрчим хүчиндээ цохилт амсаад сурчихсан, Орос дахин дахин цохилоо ч тэсч тэвчээд, тэвчиж гараад, хажуугаар нь дэлхийн II том армийг тогтоон бариад байна. Харин Оросын иргэд украины агаарын тасралтгүй халдлагыг хэр удаан тэсэх вэ гэдэг нь өөрөө Орост тавигдах зүй ёсны асуудал юм. Орос мэдээж цэргийнхээ тооны болон техникийн давуу талаа ашиглаад давшиж болно, ганц нэг тосгон сууринг эзэлж болно. Гэхдээ л Сталин-Жуковын үеийн “хүний махан шуурга”-аа орхихгүй, “Алуулж үхэж байсан ч ялах л ёстой”, “Хохирол гол биш”, “Энэ дайнд Украинаас булааж авсан 4 мужийг 100% болгож байж сална” гэсэн Сталины “цэргийн урлаг”-аараа муйхарлаад байж байна. Украины агаарын цэргийн хүчний шинэ мэдээлэл байна. Энэ дайнд Орос нь 22 мянга орчим  “Шахед” типийн дрон нисгэсний 17 мянгыг нь Украин устгаж чадсан, гэхдээ Орос шахедын тоогоо нэмнэ гэсэн байна. Цаана нь хоёр төрлийн пуужин хэрэглэн байлджээ. Ихэнхийг нь украины ард түмнийг хашраах, залхаах зорилгоор хотууд руу харважээ. Баллистик пуужин анх удаа 2024 оны нэгдүгээр сараас дайнд хэрэглэсэн, тэр нь голдуу “Искандер-М”, “KN-23” загварынх. Ийм пуужинг Украины тэнгэрт эх орноо хамгаалагчид 100 гаруйг устгасан, Орос ч тийм үнэтэй пуужингаа тэгтлээ олон зуугаар нь харваагүй гэж байна. Далавчит пуужинг Украины эх орноо хамгаалагчид 1500-аас дээш тоотойг устгасан гэсэн мэдээ байна. Бас олон мянгыг харваагүй. Бас л Орост үнэтэй тусна.


Оросын ТВ-ийн сувгуудыг би нэлээд үздэг. Магтаал биш шүүмжлэл, Оросын армиа голсон чамласан яриа өрнөдөг болж байна. Оросын цэргийн шинжээч Z-патриот Юрий Евич ингэж ярив. Агаарын довтолгоонд Оросын цэрэг яагаад бүтэлгүй байна вэ гэдэг “Дайсны РЭБ манайхаас хамаагүй хүчтэй байна” гэж хэлж байна. РЭБ гэдэг нь радио электроны тэмцэл гэсэн үг.


Евич ярихдаа “Энэ дайн гурван жил үргэлжиллээ. Тэр тоолонд манай хоцрогдол өслөө. Хэдийгээр дайнд асар их зардал урсгаж байгаа ч Оросын арми Украины армиас техникийн хувьд хоцрогдсон хэвээр байгаа төдийгүй хоцрогдол улам өсч байна” гэв.


Тун ноцтой сануулга юм биш үү? Оросын армийн хоцрогдол ба бүтэлгүйтлийн тодхон жишээ нь Украины зэвсэгт хүчний Белгород муж дахь давшилт болж байна. Орос өөрийнхөө нутаг дэвсгэрт нэг дор шахуу “Ка-52” гэх цохилтын 2 вертолет, мөн Ми-8 гэх 2 вертолет, нийт 4 вертолетоо украины HIMARS пуужингийн шуурган галд ниргүүлэв. Оросын зэвсэгт хүчний агаарын цэргийн хар өдөр хэмээн олон улсад нэрлэж байна. Трамп Путинд ач ивээлээ хайрлаж, дайнд ялуулна гэдгийг сөрж АНУ-ын ТТГ-ын тэргүүн Рэтклифф бүр шал эсрэгээр мэдэгдэл хийв.


“АНУ Украинд зэвсэг өгөхөө больж, украинчууд байлдахаа болино” гэж Трампын ярихыг ТТГ-ын захирал нь эрс үгүйсгэж:


–Украины ард түмэн, Украины армийг бид удаан хугацаанд дутуу үнэлж байжээ. Украинчууд гэр бүлээ, гэр орноо хамгаалж байна. Тэдний олонхид нь үргэлжлүүлэн тэмцэх цорын ганц шалтгаан энэ л байх болно. Та нар өөрсөддөө асуулт тавь л даа. Хэрэв Танай гэр орон руу халдсан бол Та өөрөө юу хийх байсан бэ гэж. Хэрэв украинчууд өөрсдөд нь хүлээн авахуйц энх тайвны нөхцөл бүрдэхгүй бол тэд бүр нүцгэн гараараа ч тулалдах юм байна гэдэгт би огт эргэлзэхгүй байна. Тагнуулын янз бүрийн мэдээ тэгж хэлээд байна. Тэд үхтлээ байлдана. Харин үүнийг Вашингтонд хэн нэгэн нь ядаж ойлгож байгаа байлгүй дээ гэжээ.


АНУ-ын ТТГ-ын захирлын хэлснийг нотлох мэт Украины иргэдийн санал асуулгын дүнг “Цэргийн тойм” сайтад тавьжээ. Украинчуудын 82% нь Оросын эсрэг тусгаар тогтнол, эрх чөлөөнийхөө төлөө дайнаа үргэлжлүүлнэ, АНУ-ын зүгээс цэргийн тусламж зогссон ч тэмцэнэ гэсэн бол иргэдийн 8% Оросын хүссэнээр эвлэрье гэжээ.


Үлдэх 10% орчим нь хариулахаас түтгэлзжээ. Энхийн замаар дайн зогсоох уу гэдэг асуултад 79% нь Оросын шаардлага нөхцлийг хүлээн авч огт болохгүй гэжээ.

 

Дээр юу өгүүлэв? Орост хайртайчуудад зориулан цэргийн урлагийн онол үзэж судалсан хүн үнэн бодит мэдээллээс дээр хөрвүүллээ. “Түрэмгийлэл” ба “Эх орноо хамгаалах дайн” гэдгийг цэргийн мэргэжлээрээ би зөв олж харсан, харин монгол уншигчиддаа тайлбарлахыг хичээсэн нь хараал зүхэл ба дэмжлэг зэрэг зэрэг хүлээж байгаа. Монгол троллуудын хараал зүхлийн цаад логик нь “Орос Украинд ялагдвал Хятад Монголыг эзлээд авна” гэх хий айдас, хар домог. Украиныг өмөөрч, Оросыг шүүмжилж байгаа болгон эрлийз, хужаа, хурлийз гэх хочтой нь тэр айдсаас нь үүдэлтэй. Хар тэнгист эвлэрээд, эрчим хүчний дэд бүтэц рүү галлахаа зогсоогоод 30 хонож болно, дараа нь дайн үргэлжилдэгээрээ үргэлжилнэ, хохирлын 60-70%-ийг Орос амсдагаараа амсана. Украин ялагдлаа гэсэн троллуудын хүсэл үлгэр болсон, горьдоод нэмэргүй!  


Адьяaгийн Батсайхан (бэлтгэл хошууч)