sonin.mn
Сэтгэгдэл (0)

ОУОХ-ны Гишүүн, МҮОХ-ны Ерөнхийлөгч Б.Баттүшиг Монголын хөнгөн атлетикийн холбоо /МХАХ/-ны Ерөнхийлөгч Э.Нарангэрэлийг Олимпик хауст хүлээн авч уулзлаа. Уулзалтад мөн МҮОХ-ны Тэргүүн дэд ерөнхийлөгч Ч.Наранбаатар, МХАХ-ны ерөнхий нарийн бичгийн дарга С.Аюушжав нар оролцов.


Уулзалтын үеэр МХАХ-ны Ерөнхийлөгч Э.Нарангэрэл хөнгөн атлетикийн Мастеруудын холбоо болон Пара хөнгөн атлетикийн холбоодтой нэгдэн 2030 он хүртэлх стратеги төлөвлөгөөгөө тодруулсныг дурдаж олон улсын төсөл, хөтөлбөрүүдийг түлхүү хэрэгжүүлэхээр төлөвлөж буйг онцоллоо.


Түүнчлэн “Улаанбаатар” марафон гүйлтийн тэмцээнийг олон улсын стандартад нийцүүлэх чиглэлээр БНХАУ-аас эксперт урьж замын хэмжилт хийлгэн баталгаажуулах ажлыг өрнүүлэхээ дуулгав. МҮОХ-ны Ерөнхийлөгч Б.Баттүшиг хөнгөн атлетикийн мастеруудын болон паралимпын тамирчдын оролцоог нэмэгдүүлэх чиглэлээр идэвхтэй ажиллахыг хүсэж, МҮОХ-ноос хөнгөн атлетикийн хөгжлийг дэмжих чиглэлээр тогтвортой дэмжлэг үзүүлэх бөгөөд “Улаанбаатар 2025” олон улсын марафон гүйлтийн тэмцээнийг өргөжүүлэх, олон улсын төсөл, хөтөлбөр, арга хэмжээг амжилттай зохион байгуулахад хамтран ажиллахаа илэрхийлэв.