sonin.mn
Сэтгэгдэл (15)

ВАШИНГТОН, 2025 оны хоёрдугаар сарын 8 /DW/. АНУ-ын Олон улсын хөгжлийн агентлагийн /USAID/ дотоодод ба гадаад улсуудад ажиллаж буй ажилтнуудын эрх ашгийг хамгаалагч байгууллагууд тус агентлагийг татан буулгаж, гадаад улсуудад үзүүлж буй тусламжийг зогсоох тухай Ерөнхийлөгч Д.Трампын зарлигийг эсэргүүцэн шүүхэд нэхэмжлэл гаргажээ. Энэ тухай Америкийн NPR цахим хуудас ба The New York Times сонинд пүрэв гарагт мэдээлсэн байна.

“Энэхүү алхам нь агентлагийн ажилтнууд, тусламж хүлээн авагч талууд ба туслан гүйцэтгэгчдийн үйл ажиллагааг гэнэт зогсоосноор дэлхийг хамарсан хүмүүнлэгийн хямралд хүргэлээ. Америкийн олон мянган ажилчид ажлын байраа алдав. Трампын шийдвэр нь АНУ-ын үндэсний аюулгүй байдлын эрх ашигт аюул учрууллаа” гэж Вашингтоны Холбооны шүүхэд гаргасан нэхэмжлэлд дурджээ. Мөн USAID агентлагийг зөвхөн Конгресс татан буулгах эрхтэй бөгөөд Трампын шийдвэр бол Үндсэн хуулийг зөрчсөн хууль бус үйлдэл гэдгийг онцлон тэмдэглэсэн байна.  





Пүрэв гарагт The New York Times сонинд бичсэнээр бол, Д.Трампын засаг захиргаа USAID агентлагийн 10 мянган ажилтны ихэнхийг нь халж, эрүүл мэнд, хүмүүнлэгийн тусламжийн асуудал хариуцсан 290 хүнийг үлдээх шийдвэр гаргасан байна. Тодруулбал, хилийн чанадад ажиллаж буй бүх ажилтанд хугацаагүй амралт олгосон ба туслан гүйцэтгэгчидтэй байгуулсан бүх гэрээ хэлцлийг цуцалжээ. Түүнчлэн USAID-ийн хилийн чанад дахь ажилтнууд АНУ-д 30 хоногийн дотор буцаж ирэхийг мэдэгдсэн байна.





USAID бол гадаад орнуудад үзүүлэх тусламж ба хөгжлийн хамтын ажиллагааг хариуцсан агентлаг бөгөөд жилийн төсөв нь 42,8 тэрбум доллар юм. 

Энэ сарын 3-ны өдөр тус агентлагийг түр удирдаж буй АНУ-ын Төрийн нарийн бичгийн дарга Марко Рубио телевизийн Fox News сувгаар мэдэгдэхдээ, Ерөнхийлөгчийн шийдвэр бол гадаадад үзүүлэх тусламжийг зогсоох гэсэн хэрэг биш, харин тус агентлагийн ажилтнууд захирагдах, хамтран ажиллахаас татгалзаж байгаа тул үүссэн нөхцөл байдлыг хяналтандаа авахын тулд үүнээс өөр сонголт байгаагүй” гэжээ.


Б.Адъяахүү