sonin.mn
Сэтгэгдэл (10)

Орос ба Беларусийн хоккейн шигшээ багууд 2025/2026 оны улиралд Олон улсын хоккейн холбооны /IIHF/ ивээл доор болох бүх насны ангиллын тэмцээнүүдэд оролцох боломжгүй болжээ.


Тус холбооны зөвлөлөөс гаргасан энэ шийдвэр нь ДАШТ-нд мөн хамаарах бөгөөд харин Оросын шигшээ багийг Олимпын тоглолтод оролцуулах эсэх асуудлыг Олон улсын Олимпын хороо хэлэлцэх юм. 


IIHF-ийн зөвлөлийн хурал 3-4-ний өдрүүдэд болж, өчигдөр дээрх шийдвэрийг гаргалаа. Өмнөх хурлуудаас ялгаатай нь гэвэл, Оросын хоккейн холбооны олон улсын асуудал эрхэлсэн тусгай төлөөлөгч, Олимпын наадмын мөнгө, хүрэл медальт Павел Буред Оросын талын байр суурийг илэрхийлэх боломж олдов. “Сүүлийн гурван жилийн хугацаанд манай холбоо болон миний бие Оросын шигшээ багийг олон улсын тавцанд буцаан ирүүлэхийн тулд IIHF ба хоккейн спортын гэр бүлийнхэнтэй идэвхтэй хамтран ажиллалаа. Хамгийн сүүлийн хуралдаанд би гурван удаа үг хэллээ, өмнө нь байр сууриа илэрхийлэх, тэр ч бүү хэл хуралдаанд оролцох боломж олгодоггүй байсан” гэж П.Буре ярилаа.


Олон улсын хоккейн холбоо 2022 оны гуравдугаар сард Орос, Беларусийн багуудыг ДАШТ-нд оролцуулахгүй гэсэн шийдвэр гаргасан юм.


Мөн 2023 онд Новосибирск, Омск хотуудад болох ёстой байсан залуучуудын ДАШТ, Санк-Петербургт болох насанд хүрэгчдийн ДАШТ-ийг тус тус цуцалжээ. Эдгээр шийдвэрийг гаргасан нь тэмцээнд оролцогчдын аюулгүй байдлыг хангах тал дээр IIHF итгэлтэй бус байснаас шалтгаалсан байна.  



Б.Адъяахүү