sonin.mn
Сэтгэгдэл (1)

Саудын Арабын “Аль-Хилал” клуб Бразилын довтлогч Неймартай байгуулсан гэрээгээ цуцалсан тухай тус клубын хэвлэлийн алба мэдээллээ. Өдгөө 32 настай Неймар тамирчны замналаа эхлүүлж байсан Бразилын “Сантос” багтаа эргэн очиж тоглох ажээ. 


Тэрбээр 2023 оны наймдугаар сард “Ал-Хилал”-д шилжин ирсэн бөгөөд 2026 оны ДАШТ-ний урьдчилан шалгаруулах шатны Уругвайтай хийсэн /0:2/ тоглолтын явцад бэртэл авч, "өвдөгний үений хэрээс хэлбэрийн холбоос гэмтэж, мөгөөрсөн жийрэг урагдсан" гэсэн оноштойгоор эмчилгээ хийлгэх шаардлагатай болсон юм.


Жил гаруй хугацаанд талбайд гараагүй байсан Неймар 2024 оны 11 дүгээр сард Азийн аваргуудын лигийн дөрөвдүгээр тойрогт Ираны “Эстеглал” багтай хийсэн тоглолтод оролцохдоо дахин гэмтэл авчээ. Тэрбээр 2017 онд “Барселона”-гаас 222 сая евро буюу дэлхийн хөл бөмбөгийн түүхэнд дуулдаагүй өндөр үнээр Францын “Пари-Сен-Жермен” багт шилжиж ирсэн бөгөөд Францын аваргаар 5 удаа, Супер цомын эзнээр 4 удаа шалгарч, Францын цомын тэмцээнд 3 удаа, Лигийн цомын тэмцээнд 2 удаа түрүүлсэн байна.


Харин “Барселона”-гийн бүрэлдэхүүнд Испанийн аваргаар 2 удаа, Испанийн цомын аваргаар 3 удаа шалгарч, Аваргуудын лиг, УЕФА-гийн Супер цомын ба клубүүдийн ДАШТ-нд тус бүр 1 удаа түрүүлж байв.


Неймар хөлбөмбөгчний замналаа Бразилын “Сантос” клубт эхлүүлж, Бразилын цом ба Либертадосын цомын тэмцээнд түрүүлж байжээ. Тэрбээр Бразилын шигшээ багийн түүхэн дэх шилдэг довтлогч /79 гоол/ юм. 


Б.Адъяахүү